Gunna nuu cosa jma galán runi xcaadxi que lii
Ni rizaaca
Ora orgulloso tuuxa rucaani laa gapa prejuiciu. Ne ora zacá ti binni riníʼ ique puru cosa galán de laa. Riníʼ ique jma risaca que xcaadxi ne ruuyaʼ huaxiéʼ risaca ca binni gadxé peʼ de laa. Tutiica zanda guiaba lu trampa riʼ. Sicaríʼ ná Encyclopædia Britannica: «Stale de ca cultura ca riníʼ íquecaʼ jma galán modo nabánicaʼ, guendaró sticaʼ, modo rácucaʼ lari, costumbre, creencia ne xcaadxi cosa sticaʼ que stiʼ xcaadxi». ¿Xi zanda gúninu para cadi guiábanu lu trampa riʼ?
Conseju zeeda lu Biblia
«Lagusihuinni humilde laatu ora guiníʼ íquetu jma risaca xcaadxi que laatu» (FILIPENSES 2:3).
¿Xi riníʼ ni? Naquiiñeʼ gácanu humilde para cadi gácanu orgulloso. Pa humilde laanu la? zudiʼnu cuenta nuu cosa jma galán runi xcaadxi que laanu. Nin ti cultura jma galán que stobi.
Guidúʼyanu xi bizaaca Stefan. Biniisibe ndaaniʼ ti guidxi comunista ne gunda bisaanabe de gápabe prejuiciu ca binni de sti guidxi ni cadi comunista. Sicaríʼ guniʼbe: «Rabeʼ naa, para cadi gápanu prejuiciu, nabé risaca guiníʼ íquenu jma risaca xcaadxi que laanu. Naa la? qué gannaʼ diaʼ stale cosa ne siempre riziideʼ xiixa de xcaadxi».
Ni zanda gúniluʼ
Gunnaʼ laaca rucheeluʼ. Naquiiñeʼ gudiiluʼ cuenta nuu binni runi caadxi cosa jma galán que lii. Ne cadi guiníʼ íqueluʼ tobi si modo naca ti grupu de binni.
Lugar de guiníʼ íqueluʼ mal de ti binni ni nuu lu ti grupu la? guníʼ ique ndiʼ:
Gunna nuu binni runi xiixa jma galán que lii.
¿Ñee dxandíʼ peʼ nga malu ni qué riuuladxeʼ de binni ca la? o cadi biaaʼ guuyaʼ ni?
¿Zanda guʼyaʼ binni ca xiixa ni cadi jneza de naa la?
¿Runi binni riʼ xiixa jma galán que naa la?
Pa guicábiluʼ ca pregunta riʼ de guidubi ladxidoʼloʼ, maʼ qué zuni juzgarluʼ binni ne ziuuláʼdxiluʼ ca cosa galán ni rúnicabe.