Ca hombre ni zaniruʼ ndaaniʼ religión stidu qué riáxacaʼ. Ndaaniʼ ca primé neza binni ridagulisaa ni guyuu dxiqué gulícabe tu gaca binnigola para gápacaʼ «ca xpinni Cristu», yanna riʼ laaca zacaca raca ndaaniʼ ca neza binni ridagulisaa (Hechos 20:28). Ca binnigola ca nácacabe hombre ni maʼ biziidiʼ stale de cani rusiidiʼ Biblia, ruuyacabe gaca dxiiñaʼ ndaaniʼ neza binni ridagulisaa ne rápacabe ca binni ni nuu ndaaniʼ ni. Ximodo rúnicabe ca dxiiñaʼ ca yaʼ. Rúnicabe ni ra chinándacabe conseju riʼ: «Laguni ni de idubi ladxidóʼ to casi racalaʼdxi Dios, ne cadi purti napa tu xidé guni tu ni, nin pur bidxichi, sínuque laguni ni de idubi ladxidóʼ to» (1 Pedro 5:1-3). Xi rúnicabe para gacanécabe laadu yaʼ.

Rápacabe laadu para cadi guizaacadu xiixa. Ca binnigola ca racanécabe ca binni ridagulisaa guiénecaʼ Stiidxaʼ Dios ne racanécabe laacaʼ chuʼcaʼ galán né Jiobá. Cumu nánnacabe Dios nga bidii laacabe dxiiñaʼ ca la? que rucaacabe laadu gúnidu xiixa purtiʼ si binnigola laacabe, sínuque racanécabe laadu chuʼdu galán ne nayecheʼ (2 Corintios 1:24). Cásica runi ti pastor stipa pur gapa cada tobi de ca dendxuʼ stiʼ, zacaca nga runi ca binnigola, purtiʼ laaca rúnicaʼ stipa pur gunibiaʼcaʼ cada tobi de ca dendxuʼ huiiniʼ sti Dios (Proverbios 27:23).

Rusiidicabe laadu gúnidu ni na Dios. Ca binnigola ca rusiidicabe laadu lu ca guendaridagulisaa ra riuudu guiráʼ semana ne racanécani laadu iguidxi fe stidu (Hechos 15:32). Ca hombre riʼ laca laacabe nga ruuyacabe ximodo guireeche diidxaʼ, rucheechenécabe laadu diidxaʼ ne rusiidicabe laadu ximodo gucheechedu diidxaʼ.

Riguucabe gana cada tobi de laadu. Para ganda gacané ca binnigola cada tobi de laadu chuʼdu galán né Jiobá la? rigánnacabe laadu ralídxidu ne ruiʼnécabe laadu diidxaʼ ndaaniʼ Yoo stiʼ Reinu. Riquiiñecabe Stiidxaʼ Dios para gacanécabe laadu ne quixhedxícabe ladxidoʼdo (Santiago 5:14, 15).

Laacabe cadi dxiiñaʼ si ni rúnicabe ndaaniʼ neza binni ridagulisaa nga nápacabe, sínuque stale de laacabe rúnicabe xhiiñacabe ne naquiiñeʼ chúʼcabe cuidadu binnilídxicabe ne gudiicabe ni caquiiñecaʼ. Nga runi naquiiñeʼ guni respetarnu ca xpinni Cristu riʼ, purtiʼ nabé rúnicabe dxiiñaʼ (1 Tesalonicenses 5:12, 13).

• Xi dxiiñaʼ runi ca binnigola ni nuu ndaaniʼ neza binni ridagulisaa.

• Ximodo rusihuínnicabe dxandíʼ rizaaláʼdxicabe cada tobi de laadu.

Biblia ruzeeteʼ chupa grupu de hombre ni naca xpinni Cristu ni ruuyaʼ ca dxiiñaʼ raca ndaaniʼ neza binni ridagulisaa. Ca testigu stiʼ Jiobá rábicaʼ laacabe «binnigola» ne «siervu ministerial» (Filipenses 1:1, TNM). Ndaaniʼ cada neza binni ridagulisaa nuu chupa chonna de ca hombre riʼ. Xi dxiiñaʼ runi ca siervu ministerial para gacanecaʼ laadu yaʼ.

Racanécabe ca binnigola. Ca siervu ministerial riʼ nácacabe hombre ni maʼ biziidiʼ stale de lu Biblia, rúnicabe stipa pur gúnicabe dxiiñaʼ ni rudii ca binnigola laacabe ne rúnicabe xhiiñacabe jneza, nuu de laacabe nahuiiniruʼ ne nuu ni maʼ huaniisi. Laacabe rúnicabe caadxi dxiiñaʼ huiiniʼ raca ndaaniʼ neza binni ridagulisaa, neca puru dxiiñaʼ nasisi rúnicabe la? nabé risaca cani. Ora rúnicabe zacá racanécabe guisisi xhiiñaʼ ca binnigola ne jma rápacaʼ tiempu para gusiidicaʼ ne gápacaʼ ca xpinni Cristu.

Nabé risaca dxiiñaʼ rúnicabe. Nuu siervu ministerial ridxaagalucaʼ binni ra ridagulisaadu ne ruluícabe laacaʼ paraa cuicaʼ. Xcaadxi de laacaʼ ruuyacaʼ guni sonidu riquiiñeʼ ndaaniʼ Yoo stiʼ Reinu dxiiñaʼ jneza, rudiicaʼ libru ne revista, rutópacaʼ ne rugábacaʼ bueltu ni rudii ca binni ridagulisaa ne laaca ruluiʼcaʼ ca xpinni Cristu paraa zanda gucheechecaʼ diidxaʼ. Ca siervu ministerial ca racanécabe guiá ra Yoo stiʼ Reinu ne racanécabe ca xpinni Cristu ni maʼ huaniisi ora gabi ca binnigola laacabe gúnicabe ni. Intiica dxiiñaʼ guicaacabe rúnicabe ni né stale guendanayecheʼ ne pur nga runi respetar ca binni ridagulisaa laacabe (1 Timoteo 3:13).

Rusihuínnicabe nácacabe hombre ni maʼ biziidiʼ stale de lu Biblia. Ribícabe ca xpinni Cristu para gácacaʼ siervu ministerial purtiʼ rusihuínnicaʼ lu xquendanabánicaʼ maʼ biziidicaʼ stale de Stiidxaʼ Dios. Ca libana ni rutiidicabe racanécani iguidxi fe stidu, ora rucheechecabe diidxaʼ rusiidicabe laadu gúnidu ni né stale gana, ne racanécabe laadu chuʼdu nayecheʼ ne chuʼdu tobi si purtiʼ riuuláʼdxicabe gacanécabe (Efesios 4:16). Despué laaca randa rácacabe binnigola lade ca binni ridagulisaa.

• Ximodo nga ca hombre ni naca siervu ministerial.

• Ximodo racané ca siervu ministerial para ganda gaca dxiiñaʼ ni raca ndaaniʼ neza binni ridagulisaa galán.

Lu Stiidxaʼ Dios ni gucuá lu diidxaʼ griegu nabé rieeteʼ de Bernabé ne apóstol Pablu. Ca hombre riʼ gúcacaʼ binnigola ni yeganna ca neza binni ridagulisaa ni guyuu dxiqué. Xi bicaa laacabe gúnicabe dxiiñaʼ riʼ yaʼ. Bíʼnicabe ni purtiʼ dxandíʼ rizaaláʼdxicabe chuʼ ca xpinni Cristu galán. Pablu bisihuinni dxandíʼ racalaʼdxiʼ guibiguetaʼ chiganna ca xpinni Cristu para guʼyaʼ ximodo nuucabe. Laabe yegácanebe laacaʼ neca guzabe gayuaa kilómetru (Hechos 15:36). Yanna riʼ, ngaca nga ni rucaa stale de ca binnigola ni riganna ca neza binni ridagulisaa gúnicaʼ xhiiñacaʼ.

Riguucabe gana laadu. Cada superintendente de circuito rigánnabe biaʼ gande neza binni ridagulisaa ne rindaabe ti semana ra nuu cada tobi de laani ne chupa biaje rigánnabe cada neza binni ridagulisaa lu ti iza. Zanda guizíʼdidu stale de ca xpinni Cristu riʼ ne de xheelacabe, pa maʼ bichaganácabe. Laacabe rúnicabe stipa pur gunibiáʼcabe ca hombrehuiiniʼ ne ca dxaapahuiiniʼ ne zaqueca cani maʼ huaniisi, ne nabé riuuláʼdxicabe gucheechenécabe laadu diidxaʼ ne chinécabe laadu ra nuu ca binni ni cadúʼndanedu Biblia. Ca binnigola ni riganna ca neza binni ridagulisaa, rinécabe ca binnigola ora maʼ zigánnacaʼ ca xpinni Cristu; ne laaca rutiidicabe caadxi libana ni riguu gana laacaʼ lu ca guendaridagulisaa ni raca cada semana ne lu ca guendaridagulisaa roʼ (Hechos 15:35).

Rizaaláʼdxicabe guiradu. Ca superintendente de circuito riʼ nabé rizaaláʼdxicaʼ gacanecaʼ ca xpinni Cristu para chuʼcaʼ galán né Dios. Ridagulisaanécabe ca binnigola ne ca siervu ministerial para gúʼyacabe xi guiráʼ dxiiñaʼ huayúnicaʼ lade ca binni ridagulisaa ne gudiicabe laacaʼ conseju ni zacané laacaʼ gúnicaʼ xhiiñacaʼ jma jneza. Racanécabe ca precursor ti ganda cueenducaʼ ni galán ora gucheechecaʼ diidxaʼ, ne nabé riuuláʼdxicabe gunibiáʼcabe ca binni ni cuzulú cadagulisaané laadu ne riéchecabe ora gánnacabe modo cayúnicaʼ ni na Dios lu xquendanabánicaʼ. Cada tobi de ca xpinni Cristu riʼ rudiicabe guiráʼ stipa stícabe para gacanécabe laadu chuʼdu galán (2 Corintios 8:23). Nga runi, galán gápanu fe cásica nápacabe ne guni adorarnu Dios cásica rúnicabe (Hebreos 13:7).

• Xi para riganna ca superintendente de circuito ca neza binni ridagulisaa.

• Xi zanda guiziidiluʼ de ca superintendente de circuito.

Ora guizaaca xiixa desgracia, laadu, ca testigu stiʼ Jiobá nagueendaca racanedu xcaadxi Testigu ni caquiiñeʼ gacanécabe laacaʼ. Cani rúnidu pur laacabe rusihuínnicani dxandíʼ nadxiisaadu (Juan 13:34, 35; 1 Juan 3:17, 18). Ximodo racanésaadu yaʼ.

Racanedu laacabe né bueltu. Ca xpinni Cristu de Antioquía biseendacaʼ bueltu para gucanecaʼ xcaadxi xpinni Cristu de Judea dxi guca ti gubiña neza ra nabézacaʼ (Hechos 11:27-30). Zacaca nga rúnidu yanna, ora rizaaca xiixa desgracia paxaraa rudiʼdu bueltu ra ridagulisaadu para gacanedu xcaadxi Testigu (2 Corintios 8:13-15).

Rigacanedu. Ca binnigola ni nabeza lugar ra bizaaca xiixa desgracia ruyúbicabe cada tobi de ca binni ridagulisaa para gúʼyacabe pa qué nizaacacaʼ xiixa. Nuu ti grupu de binnigola ni racané, riguixhe ximodo guicaacabe ni gócabe, nisa guécabe, lari gácucabe, medicina iquiiñecabe, ne guʼyaʼ paraa zanda guiaanacabe. Stale Testigu ni nanna dxiiñaʼ ni riquiiñeʼ para cuí yoo o para cuí Yoo stiʼ Reinu rinábacaʼ chigacanecaʼ ca lugar ra bizaaca xiixa desgracia ne laacaʼ xcuéntacaʼ gastu sticaʼ. Cumu nuudu tobi si ne maʼ nánnadu gúnidu dxiiñaʼ juntu la? randa riniibidu nagueenda ora caquiiñeʼ gacanedu. Dxandíʼ, «ca hermanu» stidu nga racanedu, peru laaca racanedu xcaadxi binni ora randa, neca de gadxé religión laacaʼ (Gálatas 6:10).

Riquiiñedu ni rusiidiʼ Biblia para quixhedxidu ladxidóʼcabe. Ora guizaaca xiixa desgracia, ni jma riquiiñeʼ binni nga chuʼ tu quixhedxí ladxidóʼ. Ora cazaaca binni zacá, Jiobá, Dios stidu ni riguixhedxí ladxidóʼ binni, rudii stipa laacabe (2 Corintios 1:3, 4). Nga runi, riuudu ra nuu ca binni ni cayacaná ladxidóʼ pur xiixa desgracia ne ruluidu laacabe ca ndaayaʼ ni zeeda lu Biblia, ra na maʼ qué zandaa zabee Reinu stiʼ Dios yuubaʼ ne guiráʼ ni cayuniná binni yanna (Apocalipsis 21:4).

• Xiñee nagueendaca racanesaa ca testigu stiʼ Jiobá ora guizaaca xiixa desgracia.

• Ximodo riquiiñedu Biblia para quixhedxidu ladxidóʼ ca binni ni bilá de xiixa desgracia.

Dxi mayaca gatiʼ Jesús guleechube Pedru, Santiagu, Juan ne Andrés para güínebe laacaʼ diidxaʼ stubisícabe. Nabé risaca ni gunabadiidxabe ora guniʼbe de seña ni zahuinni dxi maʼ nuube lade binni lu ca últimu dxi. Laabe gunabadiidxabe: «Uná nga mozo ni zanda gusaana xpixuaana laa guʼya irá xpinni ne gudii ni iquiiñe cabe yaʼ» (Mateo 24:3, 45; Marcos 13:3, 4). Ora guníʼ Jesús ca diidxaʼ riʼ cusihuinni laa nga xpixuaanaʼ ca xpinni ne guníʼ zuyubi ti mozo ni gudii laacaʼ guiráʼ ni guiquiiñecaʼ para guiziidicaʼ de Dios lu ca últimu dxi riʼ. Tuu nga zeeda gaca mozo riʼ yaʼ.

Ti grupuhuiiniʼ de xpinni Jesús ni bibí pur espíritu santu laacabe. «Mozo» ca nga Grupu ni Zaniruʼ stiʼ ca testigu stiʼ Jiobá. Laacabe nga rusiidicabe ca xpinni Cristu órapeʼ caquiiñeʼ gánnacaʼ xiixa de Jiobá. Ne riquiiñedu gusiidicabe laadu ni caquiiñeʼ gánnadu, zacá nga casi ora nuyaanacabe laadu «biaʼ nexhe» guidoʼdo ne «xhiora ni» (Lucas 12:42).

Ruuyaʼ mozo riʼ gaca dxiiñaʼ ndaaniʼ xquidxi Dios (1 Timoteo 3:15). Jesús bisaanané mozo riʼ ti dxiiñaʼ nabé risaca, gúʼyacabe ximodo gaca dxiiñaʼ ndaaniʼ xquidxi Jiobá ni nuu lu Guidxilayú, ne para ganda gúnicabe ni naquiiñeʼ gápacabe guiráʼ ni nápabe lu Guidxilayú, gúʼyacabe ximodo guireeche diidxaʼ ne riquiiñecabe ca neza binni ridagulisaa para gusiidicabe laadu. Yanna, ximodo runi «mozo ni nuu xpiaani ne ni runi jneza» para gusiidiʼ laadu de Dios órapeʼ caquiiñedu ni yaʼ. Rudiicabe laadu libru ne revista ni chigucheechenedu diidxaʼ ne rusiidicabe laadu lu ca guendaridagulisaa ni rápadu guiráʼ semana ne lu ca guendaridagulisaa roʼ.

«Mozo» riʼ rúnibe ni jneza purtiʼ rinándabe cani zeeda lu Biblia ne rúnibe dxiiñaʼ ni bisaananécabe laabe de gucheechebe diidxaʼ. Laaca nuu xpiaanibe purtiʼ jneza modo riquiiñebe ca cosa ni napa Cristu lu Guidxilayú riʼ (Hechos 10:42). Caguu Jiobá ndaayaʼ dxiiñaʼ ni cayuni mozo ca purtiʼ cadale ca Testigu ne cayacanebe laa para gudii ni iquiiñeʼ guiráʼ xixé xpinni Cristu ti ganda guiziidicaʼ de laabe (Isaías 60:22; 65:13).

• Tu gulí Jesús para gudii guiráʼ ni iquiiñeʼ ca discípulo stiʼ ti ganda guiziidicaʼ de Dios.

• Xiñee zanda guininu nuu xpiaaniʼ «mozo» riʼ ne runi ni jneza.

Lu primé siglu que guyuu «ca apóstol ne [ca binnigola ni guyuu Jerusalén]» lu ti grupu ni guzániruʼ ndaaniʼ xquidxi Dios, ne laacabe nga gudíxhecabe ximodo guni ca xpinni Cristu dxiiñaʼ, zaqué nga beeda gácacabe ti grupu huiiniʼ ni guníʼ pur ca xpinni Cristu ni bibí (Hechos 15:2). Para gunda guyuucabe tobi si ora gudixhe íquecabe gúnicabe xiixa, biiyacabe xiná Stiidxaʼ Dios ne bidiicabe lugar gacané espíritu santu stiʼ Dios laacabe (Hechos 15:25). Cásica dxiqué, yanna riʼ laaca nuu ti grupu de hombre ni zaniruʼ ndaaniʼ xquidxi Dios ne lácabe Grupu ni Zaniruʼ.

Laacabe nga riquiiñeʼ Dios para guni ni na. Ca xpinni Cristu ni bibí ni nuu lu Grupu ni Zaniruʼ nabé rucaa íquecabe gúʼndacabe Stiidxaʼ Dios ne nánnacabe ximodo zanda gaca dxiiñaʼ ndaaniʼ xquidxi Dios, ne ximodo gusiénecabe laacaʼ xiixa ni cadi cayénecaʼ. Guiráʼ semana ridagulisaacabe para gúʼyacabe xi caquiiñeʼ ca binni ridagulisaa ni nuu lu guidubi naca Guidxilayú. Ne cásica guca lu primé siglu que, riquiiñecabe cani zeeda lu Biblia para gábicabe ca xpinni Cristu xi zanda gúnicaʼ, nuu tiru rúnicabe ni pur carta ne nuu tiru riquiiñecabe ca binnigola ni riganna ca neza binni ridagulisaa o xcaadxi xpinni Cristu. Zacá racanécabe xquidxi Dios chuʼ tobi si lu cani riníʼ ique ne lu cani runi (Hechos 16:4, 5). Ne laaca Grupu ni Zaniruʼ ca nga riguixhe ximodo guiziidiʼ binni de Dios, riguucabe gana ca xpinni Cristu para gucheechecaʼ stiidxaʼ Reinu ne ruuyacabe tu laa zanda guni xiixa dxiiñaʼ ndaaniʼ xquidxi Dios.

Rinándacabe ni na espíritu stiʼ Dios. Grupu ni Zaniruʼ riʼ ruyubi gacané Jiobá laa, Dios ni runi mandar guibáʼ ne lu guidubi naca Guidxilayú. Laaca ruyubi mozo riʼ gacané Jesús laa, ni naca Xaíque stiʼ neza binni ridagulisaa (1 Corintios 11:3; Efesios 5:23). Cani nuu lu grupu riʼ qué riníʼ íquecaʼ laacaʼ nga xaíque stiʼ xquidxi Dios. Ne rihuinni zacá ni, purtiʼ laaca «canananda ca[be] Dendxu huiini [ni zeeda gaca Jesús] que ladu tiica cheʼ» cásica cayuni xcaadxi xpinni Cristu ni bibí ni (Apocalipsis 14:4). Grupu ni Zaniruʼ rudiicaʼ xquíxepeʼ laadu purtiʼ runi orardu pur laacaʼ.

• Tuu nga cani guyuu lu grupu huiiniʼ ni guzániruʼ ndaaniʼ xquidxi Dios lu primé siglu.

• Ca dxi stinu riʼ, ximodo ruyubi Grupu ni Zaniruʼ gacané Dios laa.

Diidxaʼ Betel ni gucuá lu diidxaʼ hebreu riniʼni «Lidxi Dios» (Génesis 28:17, 19, nota). Ne biáʼsipeʼ lá ca para ca yoo napa ca testigu stiʼ Jiobá lu guidubi Guidxilayú ne dede racá ruuyacabe ximodo guireeche diidxaʼ ne racanécabe para gácani. Grupu ni Zaniruʼ stiʼ ca testigu stiʼ Jiobá nuucabe Betel ni nuu Nueva York (Estados Unidos), ne dede racá ruuyacabe dxiiñaʼ ni raca ndaaniʼ guiráʼ Betel ni nuu lu stale guidxi roʼ. Guiráʼ ca xpinni Cristu ni runi dxiiñaʼ ca lugar riʼ runibiáʼcabe laacaʼ casi familia Betel. Cásica ti familia, rócabe gueta, rúnicabe dxiiñaʼ juntu, nabézacabe juntu ne ruundacabe Biblia juntu (Salmo 133:1).

Ti lugar risaca ra rúnicabe dxiiñaʼ biaʼ gándatiʼ. Ndaaniʼ guiráʼ ca familia Betel nuu hombre ne gunaa ni maʼ xadxí de cayuni xhiiñaʼ Dios ne riquiiñecabe xquendanabánicabe para gúnicabe ni nabe ne gúnicabe jma lu xhiiñaʼ Reinu (Mateo 6:33). Nin tobi de laacabe qué riaxa, peru guirácabe nápacabe ra gásicabe, ni gócabe, ne laaca ricaacabe ti ndaa bueltu para sícabe xiixa ni iquiiñecabe. Cada tobi de laacabe napa ti dxiiñaʼ ni runi: nuu tu laa runi dxiiñaʼ ndaaniʼ oficina, nuu tu runi dxiiñaʼ ra guzina o ndaaniʼ comedor; xcaadxi runi dxiiñaʼ ndaaniʼ imprenta o ndaaniʼ ti taller ra raca libru ne nuu tu laa rusiá ndaaniʼ cuartu, nuu tu runi dxiiñaʼ ra riaʼriʼ lari, xcaadxi rúnicaʼ dxiiñaʼ ra riá ne ra raca chaahuiʼ guiráʼ cani riquiiñecabe Betel ne rácaruʼ xcaadxi dxiiñaʼ.

Ti lugar ra raca stale dxiiñaʼ para gacanécabe guireeche stiidxaʼ Reinu. Guiráʼ dxiiñaʼ raca ndaaniʼ ca yoo Betel, rácacani para ganda guiziidiʼ jma binni de Biblia. Ne folletu riʼ rusihuinni zacá ni. Grupu ni Zaniruʼ nga biʼyaʼ xi guicá luni, ne biquiiñecabe computadora para guseendacabe ni ra nuu stale de ca equipu ni rutiixhi diidxaʼ ni nuu lu guidubi naca Guidxilayú, ne biquiiñecabe ca prensa ni nuu ndaaniʼ stale yoo Betel para biʼniʼ imprimírcabe ni. Últimu la? biseendacabe ni ra nuu jma de ti gayuaa chii mil de neza binni ridagulisaa. Lu cada dxiiñaʼ ni guca para gunda biree folletu riʼ, gucané ca familia Betel para ganda gaca dxiiñaʼ ni jma caquiiñeʼ gaca nagueenda: guireeche ca diidxaʼ nacubi ne galán (Marcos 13:10).

• Tu runi dxiiñaʼ Betel ne xi ricaacabe.

• Xi dxiiñaʼ nga jma caquiiñeʼ gaca nagueenda ne ximodo racané familia Betel gácani.

Cani nuu ndaaniʼ familia Betel rúnicaʼ dxiiñaʼ ndaaniʼ gadxé gadxé departamentu para ganda gacanecaʼ guireeche diidxaʼ ndaaniʼ ti guidxi o ndaaniʼ stale guidxi. Ne rúnicabe dxiiñaʼ ra ribiʼxhiʼ diidxaʼ, ra raca imprimir, ra raca libru, ra riguixhe chaahuicabe libru ne revista o ra raca grabar videu ne discu, ne rácaruʼ xcaadxi dxiiñaʼ racá.

Ni runi Grupu ni Ruuyaʼ Modo Raca Dxiiñaʼ Betel. Grupu ni Zaniruʼ rusaana guiráʼ dxiiñaʼ ni raca ndaaniʼ ti yoo Betel lu náʼ ti grupu de chonna binnigola o jma, ni zuni dxiiñaʼ riʼ jneza. Ca binnigola ni nuu lu grupu riʼ, rábicabe Grupu ni Zaniruʼ pabiáʼ dxiiñaʼ cayaca ndaaniʼ ca guidxi ni nuu lu nácabe gúʼyacabe ne xi guendanagana zándaca guidxagalúcabe, nga racané Grupu ni Zaniruʼ guʼyaʼ xi gucaa lu ca libru ne revista ni chindee despué, ne xi gusiidiʼ lu ca guendaridagulisaa ni raca guiráʼ semana ne lu ca guendaridagulisaa roʼ. Gatigá ruseendaʼ Grupu ni Zaniruʼ tuuxa para cheʼ lugar stiʼ chiganna ca yoo Betel. Laacabe ruluíʼcabe ca Grupu ni Ruuyaʼ Modo Raca Dxiiñaʼ ndaaniʼ ca yoo Betel ximodo gúnicaʼ xhiiñacaʼ jma jneza (Proverbios 11:14). Ora rigánnacabe ca yoo Betel, raca ti reunión especial ra rutiidiʼ ti representante sti’ oficina central ti libana para uguu gana ca xpinni Cristu ni nabeza biaʼ ra runi tender Betel.

Racanécabe ca neza binni ridagulisaa. Ndaaniʼ cada yoo Betel ruuyacabe pa zanda guzulú xiixa neza binni ridagulisaa. Laaca ruuyacabe dxiiñaʼ runi ca precursor, ca misioneru ne ca superintendente de circuito ni nuu ca lugar ra runi tendércabe. Ne riguíxhecabe ximodo gaca guendaridagulisaa roʼ, riguíxhecabe ximodo cuíʼ ca Yoo stiʼ Reinu ne ruseendacabe libru ne revista ra nuu ca neza binni ridagulisaa. Guiráʼ ca dxiiñaʼ raca ndaaniʼ ca yoo Betel, racaneni para guireeche diidxaʼ jneza (1 Corintios 14:33, 40).

• Ximodo racané ca Grupu ni Ruuyaʼ Modo Raca Dxiiñaʼ ndaaniʼ ca Betel Grupu ni Zaniruʼ.

• Xi dxiiñaʼ raca ndaaniʼ cada yoo Betel.

Para ganda gucheechedu diidxaʼ nacubi ne galán ra nuu «binni de irá ladu, de irá guidxi, ni riníʼ adxé adxé idioma», ribeedu libru ne revista lu jma de gadxe gayuaa cincuenta diidxaʼ (Apocalipsis 14:6). Ximodo rúnidu dxiiñaʼ riʼ neca nabé nadipaʼ ni yaʼ. Racané caadxi binni ni rucaa libru ne revista ni nuu lu guidubi naca Guidxilayú laadu ne nuu stale traductor ni runi xhiiñaʼ de guidubi ladxidóʼ, guirácabe nácacabe testigu stiʼ Jiobá.

Primé ricácani lu diidxaʼ inglés. Grupu ni Zaniruʼ nga ruuyaʼ xi dxiiñaʼ cayaca ndaaniʼ oficina ni ruuyaʼ xi guicá lu ca guiʼchiʼ ricaanu, ni nuu Estados Unidos. Ndaaniʼ oficina ca nga riguíxhecabe xi dxiiñaʼ guni ca binni ni rucaa libru ne revista ni runi dxiiñaʼ Betel ni nuu Estados Unidos ne cani nuu ndaaniʼ xcaadxi Betel. Cumu de gadxé gadxé guidxi nga cani nuu lu equipu ni rucaa ca libru ne ca revista ca la? randa rucaacabe stale tema ni caníʼ de gadxé gadxé costumbre, nga runi riuulaʼdxiʼ binni de guiráʼ guidxi guʼndaʼ cani.

Ruseendacabe ni gucaacabe ra nuu cani rutiixhi diidxaʼ. Ora maʼ biluxe bicaacabe xiixa tema ne maʼ biiyacabe maʼ biaʼsi nuuni la? ruseendacabe ni pur computadora ra nuu ca equipu ni rutiixhi diidxaʼ ni nuu lu guidubi naca Guidxilayú ne laacaʼ rutiixhicaʼ ni lu stiidxacaʼ, ruuyaʼ chaahuicaʼ pa jneza bitiixhicaʼ ni ne ruuyacaʼ xi bidxaa luni ante gaca imprimir ni. Cani rutiixhi diidxaʼ riʼ rúnicaʼ stipa pur iquiiñecaʼ «diidxaʼ ni dxandíʼ jneza» para ganda guiniʼcaʼ ni lu stiidxacaʼ cásipeʼ modo gucuá ni lu inglés (Eclesiastés 12:10).

Racané computadora para gaca dxiiñaʼ riʼ jma naguenda. Ti computadora qué zanda diʼ guni dxiiñaʼ ni runi ti binni rucaa libru ne revista ne laaca qué zanda diʼ gúnini dxiiñaʼ runi ti binni ni rutiixhi diidxaʼ. Peru racaneni para gaca ca dxiiñaʼ riʼ jma nagueenda ora iquiiñecabe ca diccionariu ne ca programa stini ne xiixa libru nuu lu Internet. Ca testigu stiʼ Jiobá maʼ bíʼnicaʼ ti programa ni láʼ Sistema Electrónico de Edición Plurilingüe (MEPS, lani zacá pur ca letra ni ruzuluneni inglés), pur programa ca zanda uguucabe gadxé gadxé clase letra ni riquiiñeʼ gayuaa de diidxaʼ ni riníʼ binni lu ca computadora ca, ne rucaacabe ca letra ca cueʼ ca foto ni zeeda lu ca libru ne ca revista ca ne runi chaahuicabe cani para ganda gaca imprimir cani.

Xiñee rúnidu stipa pur gutiixhidu libru ne revista lu stale diidxaʼ dede né ca diidxaʼ ni riníʼ chupa chonna mil si binni yaʼ. Rúnidu zacá purtiʼ «racalaʼdxi [Jiobá] ulá irá binni, ne ganna ca ni dxandíʼ» (1 Timoteo 2:3, 4).

• Xi guiráʼ dxiiñaʼ raca para guidxela xi guicá lu ca libru ne revista stidu.

• Xiñee rutiixhidu libru ne revista lu stale diidxaʼ.

Guiráʼ iza, laadu, ca testigu stiʼ Jiobá rúnidu gayuaa millón de Biblia ne xcaadxi libru ne revista ne riguíʼzidu cani ra nuu binni sin guinábadu bueltu pur laacani. Laaca rucuidu stale Yoo stiʼ Reinu, yoo Betel ne runi chaahuidu cani. Rudiʼdu ni iquiiñeʼ stale mil binni ni runi dxiiñaʼ Betel ne misioneru ne ruséʼndadu ni iquiiñeʼ ca xpinni Cristu ora guizaaca xiixa desgracia. Paraa riree bueltu para gaca guiráʼ dxiiñaʼ ni rúnidu riʼ yaʼ.

Qué rinábadu diezmu, qué riguíxhedu pabiáʼ gudii cada tobi ne qué rinábadu guna. Nécapeʼ rúnidu stale gastu para gusíʼdidu binni de Dios, qué rinábadu laacaʼ bueltu. Ra biropa revista Torre stiʼ ni rapa ni biree raca jma de ti gayuaa iza, bizeeteʼ runi credu de guidubi ladxidoʼdo cayacané Jioba laadu. Ne bizeeteruni: «[Laadu ca Testigu] qué ziuu dxi guinábadu guna, ne qué ziuu dxi guinábadu binni gacané laadu». Ne zacá huayaca ni (Mateo 10:8).

Riáxacani né ni rudii binni de guidubi ladxidóʼ. Stale binni rusisaca dxiiñaʼ ni rúnidu ora rusíʼdidu laacaʼ de Biblia ne rudiicaʼ laadu bueltu para gacané gaca dxiiñaʼ riʼ. Laadu, ca Testigu laaca rudiʼdu tiempu, stipa stidu ne cani nápadu para ganda gaca ni na Dios lu guidubi naca Guidxilayú (1 Crónicas 29:9). Ne guiráʼ tu gacalaʼdxiʼ gudii bueltu la? zanda gusaba ni ndaaniʼ ca caja ni nuu ndaaniʼ ca Yoo stiʼ Reinu ne ra raca ca guendaridagulisaa roʼ. Laaca zanda gudiiluʼ donación stiluʼ lu sitiu ni nápadu lu Internet jw.org. Jma stale binni pobre rusaba bueltu ndaaniʼ ca caja riʼ. Laacabe zeeda gácacabe casi xa viuda caquiiñeʼ tu gacané laa ni bisisaca Jesús laa pur bisaba chupa de gaayuʼ huiiniʼ ndaaniʼ caja ni nuu ndaaniʼ yuʼduʼ que (Lucas 21:1-4). Tutiica gacalaʼdxiʼ zanda cueechú ti ndaa bueltu gatigá ne «udii biaʼ ruluiʼlaʼdxiʼ» (1 Corintios 16:2; 2 Corintios 9:7).

Runi credu de guidubi ladxidoʼdo que zusaana Jiobá de uguu gana binni para gusisácacaʼ laabe né ca cosa risaca ni nápacaʼ, ti ganda gacanecaʼ gaca xhiiñaʼ Reinu ne zacá gaca ni maʼ gudixhe ique Dios guni (Proverbios 3:9).

• Xi rusihuinni gadxé religión stiʼ ca testigu stiʼ Jiobá de xcaadxi religión.

• Ximodo riquiiñeʼ bueltu ni rudii binni de guidubi ladxidóʼ.

Ca lugar ra runi adorardu Dios lácani Yoo stiʼ Reinu. Lácani zacá purtiʼ ndaaniʼ cani rizíʼdidu de Biblia ne de Reinu stiʼ Dios, ne ngapeʼ nga ni jma bisiidiʼ Jesús dxi bicheeche diidxaʼ (Lucas 8:1).

Cada lugar nabézadu nuu ca yoo riʼ para guni adorardu Dios. Ndaaniʼ cani ruluíʼcabe ca xpinni Cristu ximodo gucheechecaʼ diidxaʼ xquídxicaʼ (Mateo 24:14). Nuu de ca Yoo stiʼ Reinu riʼ naroʼbaʼ cani ne nuu de laacani nahuiiniʼ ne gadxé gadxé modo ribí cani, peru guiráʼ cani qué gapa diʼ cani stale luju; ne stale de laacani riquiiñeʼ chupa chonna neza binni ridagulisaa cani. Lu ca últimu iza gudiʼdiʼ ca, maʼ bicuidu stale mil de Yoo stiʼ Reinu (ribí biaʼ gaayuʼ guiráʼ dxi) zacatiʼ nga randa rucuidu Yoo stiʼ Reinu ni iquiiñeʼ guiráʼ neza binni ridagulisaa ni cadale. Ximodo randa raca nga yaʼ (Mateo 19:26).

Ribícani né bueltu ni ruseendaʼ ca xpinni Cristu para cuíʼ Yoo stiʼ Reinu. Bueltu ni ridopa ruseendacabe ni Betel ne maʼ Betel rutiiñeʼ ni ca neza binni ridagulisaa ni caquiiñeʼ gucuí ti Yoo stiʼ Reinu o cani chiguni chaahuiʼ ra ridagulisaacaʼ, sin guquíxecabe laacaʼ interés pur bueltu gudiiñecaʼ.

De gadxé gadxé lugar ca xpinni Cristu ni racané cuíʼ Yoo stiʼ Reinu ne qué riáxacaʼ. Ndaaniʼ stale guidxi nuu Grupu ni Rucuí Yoo stiʼ Reinu. Lu grupu riʼ nuu caadxi xpinni Cristu ni rábicabe laacaʼ «siervu», purtiʼ riquiiñecaʼ guiráʼ tiempu sticaʼ para gucuicaʼ Yoo stiʼ Reinu ne nuu xcaadxi Testigu ni rinábacabe laacaʼ chigacanecaʼ ti tiempu si. Grupu ca rigacané ca neza binni ridagulisaa ni cucuí Yoo stiʼ Reinu ni nuu ndaaniʼ xquídxicaʼ dede né cani nuu zitu racanécabe laacaʼ cuiʼ Yoo stiʼ Reinu sticaʼ. Ndaaniʼ caadxi guidxi maʼ gulícabe caadxi Testigu ni nanna ximodo ribí yoo para gacanecaʼ cuíʼ Yoo stiʼ Reinu ni nuu xiixa lugar ne xi dxiiñaʼ caquiiñeʼ gaca para gaca chaahuiʼ xcaadxi de laacani. Stale hermanu ni nanna ximodo ribí yoo, racanecaʼ sin guiaxacaʼ ne stale de cani rigacané para cuíʼ ti Yoo stiʼ Reinu nuucabe lade neza binni ridagulisaa ni chiguiquiiñeʼ yoo ca. Espíritu stiʼ Jiobá nga racané gaca ca dxiiñaʼ riʼ ne laaca randa rácacani pur dxiiñaʼ ni runi ca xpínnibe de guidubi ladxidoʼcaʼ (Salmo 127:1; Colosenses 3:23).

• Xiñee láʼ ca lugar ra runi adorardu Dios Yoo stiʼ Reinu.

• Ximodo randa rucuidu Yoo stiʼ Reinu lu guidubi naca Guidxilayú.

Guiráʼ Yoo stiʼ Reinu stiʼ ca testigu stiʼ Jiobá nápacani ti letreru ra cá lá Dios, nga runi naquiiñeʼ guiácani ne guihuinni cani galán. Guiradu zanda gacanedu para chuʼ Yoo stiʼ Reinu nayá ne nabé risaca dxiiñaʼ ca, purtiʼ laaca cayuni adorardu Dios ora rúnidu ni.

Riuʼdu listu para gacanedu guiá Yoo stiʼ Reinu ora guiluxe guendaridagulisaa. Despué de cada guendaridagulisaa, ca binni ridagulisaa riuucaʼ listu para gusiacaʼ ndaaniʼ Yoo stiʼ Reinu; ne gatigá rusiá chaahuicabe ndaaniʼ ni. Ti binnigola o ti siervu ministerial ruuyaʼ guni ca xpinni Cristu caadxi dxiiñaʼ casi gusiacaʼ, gunduubacaʼ, guni trapiarcaʼ o guni aspirarcaʼ; gusiacaʼ lu ca cosa nuu ndaaniʼ ni, guzuhuaa chaahuicaʼ banguʼ, quiʼbiʼ chaahuicaʼ bañu, gusiacaʼ ventana ne ca speju stini; chisáʼbicaʼ guixi, ne gusiacaʼ fuera de laani. Ne ribeecabe neca ti dxi lu ti iza para gusiá chaahuicabe ni. Cani jma nahuiiniʼ zanda gacanecaʼ guiá ndaaniʼ Yoo stiʼ Reinu, zacá rusíʼdidu laacaʼ guni respetarcaʼ lugar ra runi adorardu Dios (Eclesiastés 5:1).

Racanedu gaca chaahuiʼ ni. Guiráʼ iza ribeedu ti tiempu para guidúʼyadu ximodo nuu ndaaniʼ Yoo stiʼ Reinu ne fuera de laani ti gánnadu xi caquiiñeʼ gaca chaahuiʼ ne xi cayaadxaʼ gaca para chuʼni galán, pacaa jma stale zunítidu despué (2 Crónicas 24:13; 34:10). Ora nayá nuu Yoo stiʼ Reinu ne nuuni galán la? reeda gácani ti lugar risaca ra runi adorardu Dios. Pa gacanedu guiani ne gaca chaahuiʼ ni, zusihuínnidu pabiáʼ risaca lugar ca para laadu ne pabiáʼ nadxiidu Jiobá (Salmo 122:1). Ora rúnidu zacá dede ridxagayaa binni xquídxidu ora guʼyaʼ pabiáʼ sicarú rihuínnini (2 Corintios 6:3).

• Xiñee qué rusaanadu de gusiadu lugar ra runi adorardu Dios.

• Xi guiráʼ dxiiñaʼ raca para ganda chuʼ Yoo stiʼ Reinu nayá.

Ñuuláʼdxiluʼ ñánnaluʼ jma de ni rusiidiʼ Biblia la? Ñuuláʼdxiluʼ ñánnaluʼ jma de xiixa versículo stiʼ Biblia, de tuuxa binni ruzeeteni, de xiixa lugar o de xiixa relatu ruzeeteni la? Ñee huaníʼ íqueluʼ pa zanda gacané Stiidxaʼ Dios lii para guni chaahuiluʼ xiixa guendanagana nápaluʼ la? Pa zacá ni, galán iquiiñeluʼ biblioteca ni nuu ndaaniʼ Yoo stiʼ Reinu.

Ndaaniʼ biblioteca riʼ ridxéladu ni racané laadu guidúʼndadu ni racaláʼdxidu. Zándaca qué gápaluʼ guiráʼ libru ne revista ni maʼ gulee ca testigu stiʼ Jiobá lu stiidxaluʼ, peru biblioteca ni nuu ra Yoo stiʼ Reinu nápani stale de ca libru ne revista ni nacubi biree. Ne laaca zándaca nápani stale clase Biblia, ti diccionariu ni nabé jneza rusiene diidxaʼ, ne xcaadxi libru ni rusiene de gadxé gadxé tema. Zanda iquiiñeluʼ cani ante ne despué de guiluxe guendaridagulisaa. Pa nuu ti computadora ndaaniʼ biblioteca riʼ, zándaca maʼ guluucabe programa ni láʼ Watchtower Library luni, ne lu programa ca zeeda stale de ca libru ne ca revista ni nápadu, ne cadi nagana diʼ para guidxélaluʼ xiixa tema, xiixa diidxaʼ o versículo luni.

Nabé racaneni cani rutiidiʼ libana lu Xhiiñaʼ Dios ne modo nabáninu. Pa maʼ cá laluʼ para tiidiluʼ lu scuela riʼ la? zanda iquiiñeluʼ cani nuu ndaaniʼ biblioteca riʼ para cueeluʼ libana stiluʼ. Superintendente stiʼ reunión Xhiiñaʼ Dios ne modo nabáninu nga encargadu stiʼ biblioteca riʼ, ne laaca naquiiñeʼ gúʼyabe gata chaahuiʼ cani. Binnigola ca o Testigu ni ruundané lii zanda guluíʼ lii ximodo guidxélaluʼ ni caquiiñeluʼ. Ne galán gánnaluʼ qué zanda diʼ cueeluʼ ca libru ca de ndaaniʼ Yoo stiʼ Reinu; ne naquiiñeʼ chuʼluʼ cuidadu cani ne cadi guzaaluʼ raya lúcani.

Biblia na para ganda gunibiáʼ chaahuinu Dios la? naquiiñeʼ quixhe íquenu guyúbinu laabe casi ñaca nuyúbinu «tesoro ni gaʼchiʼ» (Proverbios 2:1-5). Ne ti lugar ra zanda guyubi binni de xiixa tema ni racalaʼdxiʼ ganna nga ra biblioteca ni nuu ndaaniʼ Yoo stiʼ Reinu.

• Xi guiráʼ napa biblioteca ni nuu ndaaniʼ Yoo stiʼ Reinu ni racané laadu guidxéladu tema ni racaláʼdxidu gánnadu.

• Tu laa zanda gusiidiʼ lii iquiiñeluʼ biblioteca ni nuu ndaaniʼ Yoo stiʼ Reinu.

Jesucristu gudxi ca discípulo stiʼ: «Lagaca casi biaani [...] ti guʼya binni pabiáʼ jneza runi tu ne usisaca ca Bixhoze tu ni nuu ibáʼ» (Mateo 5:16). Para ganda gúnidu nga riquiiñedu ca cosa ni nacubi caree, casi Internet. Sitiu jw.org/zai ni nápadu lu Internet rusiéneni xi guiráʼ runi credu, laadu ca testigu stiʼ Jiobá ne xi guiráʼ rúnidu. Xi zeeda luni yaʼ.

Ricábini cani nabé rinabadiidxaʼ binni de Biblia. Zuuyaluʼ ximodo huacábicabe caadxi de ca cosa risaca ni huanabadiidxaʼ binni. Ca tratadu ni láʼ Ñee ziuu dxi guiree guiráʼ yuubaʼ la? ne Ñee zanda guibani ca binni ni maʼ guti sti biaje la? zanda guni descargarluʼ cani lu sitiu ni nápadu lu Internet ne nuu cani lu jma de xhoopaʼ gayuaa idioma. Laaca zanda guni descargarluʼ Traducción del Nuevo Mundo ni nuu lu jma de ti gayuaa treinta idioma; ne nuuruʼ stale libru ne revista ni riquiiñedu para gacanedu binni guiziidiʼ de Biblia, casi libru Xipeʼ ndiʼ cusiidiʼ Biblia, ne revista Torre stiʼ ni rapa ne ¡Despertad! ni jma nacubi biree. Stale de ca libru ne revista riʼ zanda gúʼndaluʼ cani lu Internet o zanda guindeteluʼ cani para gucaadiágaluʼ cani, ne nuucani lu formatu MP3, PDF o EPUB. Pa racaláʼdxiluʼ la? zanda guni imprimirluʼ chupa chonna yaza stícani lu idioma ni riniʼluʼ ne guluiʼluʼ ni ca binni ni riuulaʼdxiʼ guiziidiʼ de Reinu stiʼ Dios. Ne lu sitiu ni nápadu lu Internet riʼ zadxélaluʼ videu ra zeeda libru ne revista ni nuu lu diidxaʼ seña ni riquiiñecabe ndaaniʼ stale guidxi, ne nuu ra zanda guindeteʼ binni ra ruundacabe Biblia casi ñácani ti drama, ne zeeda drama ni biree lu Biblia, ne nuu diidxaʼ riuundaʼ ni zanda gucaadiaga binni ora maʼ caziilaʼdxiʼ.

Cani jma naquiiñeʼ ganna binni de ca testigu stiʼ Jiobá. Lu sitiu ca zánnaluʼ xi guiráʼ cayaca ne xi dxiiñaʼ cayúnidu lu guidubi naca Guidxilayú ne laaca nuu videoclip ni cusiene de dxiiñaʼ ca, ne guiráʼ ni cazaaca ca testigu stiʼ Jiobá lu guidubi naca Guidxilayú, nuu de laacani nabé feu cani ne nuu de laacani nabé sicarú cani, ne laaca zanda gúʼyaluʼ ximodo racanedu ca xpinni Cristu ora iquiiñecaʼ xiixa. Laaca zanda gúʼyaluʼ padxí chigaca guendaridagulisaa roʼ, ne luni zeeda ximodo zanda guiníʼ binni ra nuu yoo Betel stidu.

Pur ca cosa ni nacubi caree, casi Internet, cayanda cucheechedu stiidxaʼ Dios dede ca lugar ni nuu jma zitu lu Guidxilayú riʼ, para ganna binni ni nabeza lu guiráʼ continente de laani dede ne lugar ra jma nananda ni runibiáʼcabe casi Antártida. Runi orardu ti ganda «ireeche stiidxa» Jiobá lu guidubi naca Guidxilayú ne gusisaca binni laabe (2 Tesalonicenses 3:1).

• Ximodo racané sitiu jw.org/zai ganda gunibiáʼ jma binni de cani rusiidiʼ Biblia.

• Xi ñuuláʼdxiluʼ nuyúbiluʼ lu sitiu nápadu lu Internet.