Chupa mensaje ni zeeda de Dios

Zanda guininu naca Biblia ti mensaje stiʼ Dios. Maʼ bidii Bixhózenu ni nuu guibáʼ ni laanu para gusiidiʼ laanu stale cosa. Peru yanna chiguininu de chupa mensaje nabé risaca ni bidii Dios, raca jma de chupa mil iza ne biquiiñebe ti ángel láʼ Gabriel para gudii ca mensaje riʼ. Biblia ruzeeteʼ zuhuaa ángel riʼ «nezalú Dios» (Lucas 1:19). ¿Padxí ne paraa bidii Gabriel ca mensaje nabé risaca riʼ yaʼ? Ne ¿tu bidiibe ca mensaje riʼ?

Bidii Gabriel primé mensaje que biaʼ lu iza 3 ante de ca dxi stiʼ Jesús. Lu ca dani stiʼ Judea, zándaca gaxha de Jerusalén, nabeza ti sacerdote stiʼ Jehová láʼ Zacarías. Laabe ne xheelabe, Elisabet, maʼ huaniisicabe ne qué gápacabe xiiñicabe. Yanna, guca caber Zacarías guni dxiiñaʼ casi sacerdote ndaaniʼ templu stiʼ Dios, ndaaniʼ guidxi Jerusalén. Laga nuube ndaaniʼ santuariu stiʼ templu que, málasi biiyabe zuhuaa Gabriel cueʼ altar ra riaʼquiʼ inciensu.

Bidxibi Zacarías ora biʼyaʼ ángel que, peru gudixhedxí ángel que ladxidoʼbe né ca diidxaʼ riʼ: «Cadi guidxíbiluʼ Zacarías, purtiʼ maʼ bicaadiaga Dios ni gunábaluʼ laa. Zapa Elisabet, xheelaluʼ, ti xiiñiluʼ, ne naquiiñeʼ cuee laluʼ laabe Juan». Laaca gudxi Gabriel laabe zaca xiiñibe «ti binni risaca nezalú Jehová». Ne laaca gudxi laabe, zuni preparar Juan ti guidxi para Jehová (Lucas 1:13-17).

Guca nagana para Zacarías guni cré ni gudxi ángel que laa, purtiʼ laabe né Elisabet maʼ huaniisicabe para gápacabe xiiñicabe. Nga runi gudxi Gabriel laabe: «Qué zanda guiniʼluʼ dede dxi gaca guiráʼ cosa riʼ, purtiʼ qué ñuni creluʼ ni gudxeʼ lii» (Lucas 1:20).

Laga cayaca guiráʼ ndiʼ, canabadiidxaʼ ca binni nuu fuera de santuariu que xiñee candaa Zacarías. Ne ora bireebe la? qué ñanda niniʼbe. Gupa xidé bíʼnibe seña lucaʼ. Rihuínnica bizaacabe xiixa ndaaniʼ santuariu que.

Biluxe si biʼniʼ Zacarías dxiiñaʼ ndaaniʼ templu que biguetaʼ ra lidxi. Qué nindaa, gucaxiiñiʼ Elisabet. Ne laga cabeza Elisabet gale xiiñiʼ, qué niree de ra lidxi gaayuʼ beeu.

Biguetaʼ bihuinni ángel Gabriel sti biaje. ¿Tu ra nuu guyebe yaʼ? Ra nuu ti binnidxaapaʼ láʼ María ni nabeza ndaaniʼ ti guidxi stiʼ Galilea, ni láʼ Nazaret, ni riaana ladu guiá de Jerusalén. ¿Xi gúdxibe laa yaʼ? «Cayuulaʼdxiʼ Dios ni rúniluʼ. Biiyaʼ, zacaxiiñiluʼ ne zápaluʼ ti hombrehuiiniʼ, ne naquiiñeʼ cuee laluʼ laabe Jesús. Zácabe ti binni risaca ne zábicabe laabe Xiiñiʼ Dios ni nuu guibáʼ [...], zuni mandarbe para siempre luguiáʼ ca xiiñiʼ Jacob. Qué zapa Reinu stibe fin» (Lucas 1:30-33).

Nánnanu ti privilegiu guizáʼ naroʼbaʼ gupa Gabriel ra bidii ca mensaje riʼ. Lu xcaadxi capítulo ca, zadúʼyanu xiñee nabé risaca guiropaʼ mensaje ni zeeda de Dios riʼ.