LECCIÓN 26

¿Xiñee nuu stale cosa malu ne guendananá?

Casi zeeda ni lu libru

Ora rizaaca ti desgracia, stale binni rinabadiidxaʼ «¿Xiñee bizaaca ndiʼ pue?». Guizáʼ riéchenu gánnanu modo ricabi Biblia pregunta riʼ.

1. ¿Xi biʼniʼ Binidxabaʼ para guyuu cosa malu lu Guidxilayú riʼ?

Ni biʼniʼ Binidxabaʼ nga bicaalú Dios. Cumu gucaláʼdxibe maʼ laabe nga ñuni mandarbe la? gudxítebe primé hombre ne primé gunaa—Adán ne Eva—para gucaalucaʼ Dios. Ne bíʼnibe ni ra bisiguiibe Eva (Génesis 3:1-5). Bicaabe Eva guni cré malu Dios ne qué racalaʼdxiʼ guibánicabe galán. Peru ni gucalaʼdxiʼ Binidxabaʼ ñabi laabe nga zabani binni jma galán pa qué guzuubaʼ stiidxaʼ Dios. Dxi gudxi Binidxabaʼ Eva qué zati neca gucheené Dios, dxiqué nga beedachuu guendarusiguii lu Guidxilayú. Nga runi, Biblia ná rusiguii Binidxabaʼ «ne laabe nga bixhoze guiráʼ ni rusiguii» (Juan 8:44).

2. ¿Xi biʼniʼ Adán ne Eva?

Guizáʼ galán modo biʼniʼ tratar Jehová Adán ne Eva ne gúcabe nachaʼhuiʼ né laacaʼ. Gúdxibe laacaʼ de lade guiráʼ yaga ni zuhuaa ndaaniʼ jardín que, tobi si cadi naquiiñeʼ gócabe cuananaxhi stiʼ (Génesis 2:15-17). Neca zaqué, qué nuzuubacabe stiidxaʼ Jehová ne gudócabe cuananaxhi stiʼ yaga que. Gucuaa Eva cuananaxhi stiʼ yaga que «ne gudobe ni». Ne despué laaca gucuaa Adán ni ne «gudó ni» (Génesis 3:6). Ngue runi, guirópacabe qué nuzuubacabe stiidxaʼ Dios. Cadi para nuchee Adán ne Eva purtiʼ perfectu modo bizáʼ Dios laacaʼ. Peru laapecabe nga gulícabe gucheenécabe Dios, ne casi ñaca ñábicabe laa qué gapa derechu gabi laacabe xi caquiiñeʼ gúnicabe. Guizáʼ stale yuubaʼ bedané decisión ni gucuaacabe riʼ (Génesis 3:16-19).

3. ¿Xiñee dede né laanu cayuniná ni biʼniʼ Adán ne Eva?

Cumu qué nuzuubaʼ Adán ne Eva stiidxaʼ Dios la? beeda gácacaʼ binni ruchee ne bitiidicabe guendaruchee riʼ guiráʼ xiiñicabe. Biblia ná: «Pur ti hombre si biuu pecadu ndaaniʼ guidxilayú, ne pur pecadu ca biuu guendaguti, ne zacá gucuá guendaguti que guiráʼ binni, purtiʼ maʼ biʼniʼ pecar guiracaʼ» (Romanos 5:12).

Yanna, ¿xiñee ridídinu lu stale guendananá yaʼ? Nuu tiru la? pur ca decisión ni cadi jneza ricaanu o pur ca decisión ni cadi jneza ricaa stiʼ binni. Ne nuu biaje ridídinu lu guendanagana purtiʼ málasi rizaacanu xiixa cosa ni cadi caníʼ íquenu ne ora cadi cabézanu (biindaʼ Eclesiastés 9:11).

GUIZÍʼDIRUNU JMA

Guidúʼyanu xiñee cadi jneza nga ugáʼninu donda ique Dios pur guiráʼ cosa malu ne guiráʼ guendananá ni nuu lu Guidxilayú, ne xi runi sentir Dios ora guʼyaʼ laanu cayacananu.

4. Xi pur racananu

Stale binni riníʼ ique Dios nga cayuni mandar guidxilayú. Peru ¿ñee dxandíʼ zacá ni la? Laguuyaʼ VIDEU riʼ.

VIDEU: ¿Tu cayuni mandar guidxilayú? (1:24)

Laguundaʼ Santiago 1:13 ne 1 Juan 5:19, ne laiquiiñeʼ pregunta riʼ para güitu diidxaʼ:

¿Ñee Dios nga napa donda pur guiráʼ guendananá ne ca cosa malu nuu lu Guidxilayú riʼ la?

5. Guiráʼ ni huayaca pur cayuni mandar Binidxabaʼ guidxilayú

Laguuyaʼ VIDEU riʼ.

VIDEU: ¿Xiñee cudii Dios lugar chuʼ guendananá? (fragmentu) (3:07)

Laguundaʼ Génesis 3:1-6 ne laiquiiñeʼ ca pregunta riʼ para güitu diidxaʼ:

¿Xii nga ti cosa ni cadi dxandíʼ guníʼ Binidxabaʼ? (Biiyaʼ versículo 4 ne 5).
¿Ximodo bicaa Binidxabaʼ Adán ne Eva guiníʼ íquecaʼ qué racalaʼdxiʼ Jehová guibánicaʼ galán?
¿Ñee dxandíʼ nga cadi caquiiñeʼ binni guni mandar Dios laa para ganda guibani nayecheʼ casi ná Binidxabaʼ la?

Laguundaʼ Eclesiastés 8:9 ne laiquiiñeʼ pregunta riʼ para güitu diidxaʼ:

¿Xi guiráʼ huazaaca biaʼ tiempu huayuni mandar Binidxabaʼ?

Caadxi imagen ra rihuinni modo nuu Guidxilayú dede dxi bizáʼ Dios ni hasta dxi gúnibe ni ti Paraísu: A. Ti paraísu nabé sicarú. B. Biaʼ tiempu huayuni mandar binni maʼ bidxá guidxilayú riʼ de religión ni qué rusiidiʼ ni dxandíʼ, guendaridinde ne maʼ guca contaminar ni. Laaca rihuinni caadxi imagen ni runi representar gobiernu stiʼ Egipto, China, Grecia, Roma, Gran Bretaña ne Estados Unidos. C. Maʼ naca Guidxilayú riʼ ti paraísu ne maʼ nabeza binni luni.

Bibani Adán ne Eva ndaaniʼ ti Paraísu sicarú ne gúcacaʼ perfectu, peru cumu bicaadiágacabe ni gudxi Binidxabaʼ laacabe la? maʼ qué nuzuubacabe stiidxaʼ Jehová.
Bicheené si Adán ne Eva Jehová, beeda chuu guendaruchee, guendananá ne guendaguti lu guidubi naca Guidxilayú riʼ.
Maʼ cadi candaa, zabee Jehová guendaruchee, guendananá ne guendaguti. Zaca guiráʼ binni perfectu ne zabánicaʼ ndaaniʼ ti Paraísu.

6. Riuubaʼ ladxidóʼ Jehová guʼyaʼ laanu cayacananu

¿Ñee dxandíʼ rizaalaʼdxiʼ Dios laanu ora cayacananu la? Biiyaʼ xi bicaa rey David ne apóstol Pedro de ni caninu riʼ. Laguundaʼ Salmo 31:7 ne 1 Pedro 5:7, ne laiquiiñeʼ pregunta riʼ para güitu diidxaʼ:

¿Ximodo runi sentirluʼ ora gánnaluʼ ruuyaʼ Jehová guiráʼ guendananá ridídinu ne rizaaláʼdxibe laanu?

7. Zabee Dios guiráʼ yuubaʼ ne guendananá rapa binni guidxilayú

Laguundaʼ Isaías 65:17 ne Apocalipsis 21:3, 4 ne laiquiiñeʼ ca pregunta riʼ para güitu diidxaʼ:

Cayuni prometer Jehová laanu zabee guiráʼ ni runiná binni. ¿Ñee riguixhedxí promesa riʼ ladxidoʼloʼ la? ¿Xiñee yaʼ?

¿Ñee nannuʼ ndiʼ la?

Dxi bisiguii Binidxabaʼ ndaaniʼ jardín de Edén que, guníʼ mal de Jehová. Ne gucalaʼdxiʼ nusihuinni cadi jneza modo runi mandar Jehová ne malu laa. Peru maʼ cadi candaa, zabee Jehová guiráʼ yuubaʼ ni rapa binni, ne zusihuínnibe cadi dxandíʼ guiráʼ ni guníʼ Binidxabaʼ. Laaca zusihuínnibe jneza modo mandarbe. Ni jma risaca lu guidubi naca universu nga guihuinni cadi dxandíʼ guiráʼ ni guníʼ Binidxabaʼ de Jehová (Mateo 6:9, 10).

NUU TU NÁ: «Ti castigu stiʼ Dios nga ca guendanagana rapa binni guidxilayú».

¿Lii xi riníʼ íqueluʼ yaʼ?

XI BIZÍʼDINU

Ca ni napa donda pur ca cosa malu nuu lu Guidxilayú riʼ nga Binidxabaʼ, Adán ne Eva. Riuubaʼ ladxidóʼ Jehová guʼyaʼ laanu gacananu. Nga runi, maʼ cadi candaa, zabeebe guiráʼ yuubaʼ ni runiná laanu.