Cani ruundaʼ revista riʼ racaláʼdxicaʼ gánnacaʼ
Ñee jneza ruuyaʼ Dios gapa binni stale xheelaʼ la?
Coʼ, cadi jneza diʼ ruuyabe ni. Dxi gudixhestí Dios guendaxheelaʼ ndaaniʼ jardín ni guyuu Edén que, guniʼbe ti xheelaʼ si binni nga naquiiñeʼ gapa. Dxi guyuu Jesús ndaaniʼ Guidxilayú riʼ gúdxibe ca discípulo stibe maca gudixhe Dios gapa binni ti xheelaʼ si ne guniʼbe naquiiñeʼ gúnicaʼ zaqué (Génesis 2:18-24; Mateo 19:4-6).
Peru, xiñee guyuu xpinni Dios ni bibani dxiqué ni gúpacaʼ stale xheelacaʼ, casi Abrahán, Jacob, David ne Salomón yaʼ. Ante guicábinu nga, guidúʼyanu xi riníʼ Biblia de ora rapa binni stale xheelaʼ. Ruzeeteni ca guendanagana ni gupa ca binnilidxi Abrahán ne Jacob pur costumbre riʼ (Génesis 16:1-4; 29:18–30:24). Guietenaláʼdxinu Salomón, laa qué ñuni ni na tobi de ca ni biʼniʼ mandar Jiobá lu Ley ni gucuaa Moisés ra na: Cadi naquiiñeʼ diʼ gapa ti rey stale xheelaʼ, ti cadi guixélebe de Dios (Deuteronomio 17:15, 17). Biblia na beeda gápabe 700 xheelabe. Nabé bichaa ca gunaa que modo riníʼ íquebe, dede bixélebe de Jiobá (1 Reyes 11:1-4). Racá ridúʼyanu cadi galán diʼ ni riníʼ Biblia de ora rapa binni stale xheelaʼ.
Pur cani maʼ bizéʼtenu riʼ, zándaca chuʼ tu guiníʼ xiñee bidii Dios lugar guni ca xpinni zacá. Quíxenu ti ejemplu: cadi dxandíʼ nuu tiru qué riná binni gusaana ti dxiiñaʼ ni qué riuulaʼdxiʼ purtiʼ gastiʼ stobi jma galán guni óraque la? Zacagá nga ni guca para bidii Jiobá lugar gupa ca binni que stale xheelacaʼ. Neca qué guiene chaahuinu xiñee bidiibe lugar gúcani, nánnanu jneza ni bíʼnibe, purtiʼ jma jneza modo riníʼ íquebe ne cani rúnibe que laanu (Isaías 55:8, 9). Guidúʼyanu xi zándaca bicaa laabe gúnibe ni.
Guietenaláʼdxinu guníʼ Dios ndaaniʼ Jardín ni guyuu Edén que zeeda tuuxa ni gunitilú Binidxabaʼ. Despué gúdxibe Abrahán zaree ti guidxi naroʼbaʼ de laa ne zale ni gunitilú Binidxabaʼ que lade ca xiiñiʼ (Génesis 3:15; 22:18). Ngue runi biraruʼ ni biʼniʼ Binidxabaʼ para nunduuxeʼ guidxi Israel que. Cumu nanna Binidxabaʼ maʼ qué záparuʼ Jiobá laacabe pa guixelécabe de laa la? ngue runi stale biaje bicaa laacabe gucheenécabe Dios.
Biseendaʼ Jiobá ca profeta stiʼ para gacané ca israelita que cadi guiábacaʼ lu ca trampa stiʼ Binidxabaʼ, ne para uguu jnézabe laacaʼ ora qué guzuubacaʼ diidxaʼ. Peru maca nanna Jiobá qué zuzuubacabe diidxaʼ dede lu ca cosa ni jma naquiiñeʼ gúnicabe, casi cadi guni adorárcabe sti dios (Éxodo 32:9). Pa nagana ngue zaca para laacabe gúnicabe ni na ca mandatu riʼ la? jmaruʼ si nagana ñaca para laacabe ñúnicabe ni na ti ley ni niníʼ gápacabe ti xheelasícabe. Xiñee yaʼ. Purtiʼ ca binni ni bibani tiempu stícabe que gúpacaʼ costumbre de gápacaʼ stale xheelacaʼ. Cumu runibiáʼ Jiobá binni la? biiyabe cadi tiempu diʼ ngue para quíxhebe ti ley ra na gápacabe ti xheelasícabe. Pa ñúnibe ni la? jma nagueenda nucaa Binidxabaʼ ca israelita que nucheecaʼ.
Peru laaca jneza ngue bidii Jiobá lugar gápacabe stale xheelacabe dxiqué. Xiñee yaʼ. Purtiʼ zaqué nga qué nindaa para guca Israel ti guidxi naroʼbaʼ ni qué ninitilú dede dxi bedandá Mesías que. Ne laaca biquiiñeni para gapa ca gunaa que tu guʼyaʼ laacaʼ ne tu gudii ni iquiiñecaʼ.
Zacá ridúʼyanu cadi Jiobá diʼ nga gudixhe gapa binni stale xheelaʼ. Ne neca bidiibe lugar gúcani pur ti tiempu la? laaca bidiibe Ley Moisés ra na cadi guninácabe ca gunaa que (Éxodo 21:10, 11; Deuteronomio 21:15-17). Dxi bidxiña dxi guníʼ Jiobá maʼ qué zácani, biquiiñebe Xiiñibe para gábini ca xpínnibe. Ora bisietenalaʼdxiʼ Jesús ca discípulo stiʼ ni gudixhestí Dios para cani maʼ bichaganáʼ la? bisihuínnibe naquiiñeʼ gápacaʼ ti xheelasicaʼ (Marcos 10:8). Guiráʼ ni maʼ bidúʼyanu ca rusihuinni jneza nga Ley ni bidii Dios Moisés tiempu que, peru «ni gudixhe Cristu» jma risaca ni que Ley ni gucuaa Moisés (Gálatas 6:2).