Oración
1 Xiñee naquiiñeʼ guni orarnu
ORACIÓN. Laani nga tobi de ca tema zeeda lu Biblia ni jma riuulaʼdxiʼ binni ganna. Lu ca primé tema zeeda lu revista riʼ zadúʼyanu gadxe cosa ni nabé rinabadiidxaʼ binni de oración ne xi cusiene Stiidxaʼ Dios de laacani. Ca tema riʼ zacanécani binni guni chupa cosa: Gucaacani binni ni qué runi orar guzulú gúnini, ne cani maʼ rúnini zacanécani laacaʼ gúnicaʼ ni jma jneza.
NAGANA guidxélanu ti guidxi o ti religión ra qué runi orar binni. Rúnicabe ni gadxé gadxé lugar —yuʼduʼ, sinagoga, mezquita, pagoda o santuariu— ne riquiiñecabe caadxi cosa casi rosariu, libru ra cá oración, bidóʼ, alfombra ni riquiiñeʼ para guni orárcabe, tabla ne cilindru ra cá oración. Pa gúnicabe ni stúbicabe o pa gúnicabe ni lade binni, ni nánnanu nga guiráʼ binni runi orar.
Oración ca nga ni rusihuinni gadxé binni de xcaadxi ni nabani lu Guidxilayú riʼ. Cásica ca maniʼ ca, laanu laaca caquiiñeʼ guidoʼno, guideʼnu nisa ne guicaanu bi. Laaca rálenu, riniisinu ne rátinu (Eclesiastés 3:19). Peru binni si nga runi orar. Xiñee yaʼ.
Purtiʼ caquiiñeʼ gúnicabe ni. Oración ca ruuyaʼ binni ni casi ti puente ni zanda guchiña laacaʼ gaxha de Dios. Biblia ruzeeteʼ bizáʼ Dios binni maca para chuulaʼdxiʼ chuʼ gaxha de laa (Eclesiastés 3:11). Ne Jesús bisiene ni sicaríʼ: «Nayecheʼ nga cani nanna naquiiñeʼ chuʼ gaxha de Dios» (Mateo 5: 3, NM).
Cumu riuulaʼdxiʼ binni chuʼ gaxha de Dios la? nga runi nuu stale yuʼduʼ, ne nuu stale cosa ni riquiiñecabe para guni adorárcabe Dios ne laaca ribeecabe stale tiempu para guni orárcabe. Dxandíʼ, nuu binni laasi racalaʼdxiʼ guyubi xi zanda gacané laa o ruyubi sti binni gacané laa. Peru cadi dxandíʼ qué randa riuu binni gaxha de Dios ora gacalaʼdxiʼ gúnini laasi la? Binni guidxilayú zeeda gaca casi xiixa cosa nadá, huaxiéʼ tiempu ribani ne huaxiéʼ riene guiráʼ ni cayaca lu Guidxilayú. Ti binni si ni zanda gudii laanu ni caquiiñenu nga tuuxa ni qué rati, ni jma nuu xpiaaniʼ ne ni napa stale poder. Yanna, xi rucaa laanu guni orarnu para chuʼnu gaxha de Dios yaʼ.
Ñee huadxagaluluʼ xiixa guendanagana ne guirutiʼ huayabi lii xi zanda guʼnuʼ, nudii lii xiixa conseju o ñabi lii ni racaláʼdxiluʼ gánnaluʼ la? Ñee runi sentirluʼ guirutiʼ ñanda niguixhedxí ladxidoʼloʼ ora guti tuuxa binni ni nadxiiluʼ la? Ora chitixhe íqueluʼ gúniluʼ xiixa cosa risaca, ñee runi sentirluʼ caquiiñeruʼ chuʼ tu gudii lii xiixa conseju ni gacané lii la? Ora gucheeluʼ, ñee ruchiiñaruʼ xiixa lii neca maʼ bitiidiláʼdxicabe stóndaluʼ la?
Ni cusiene Biblia de tema riʼ nga ni jma zanda guni crenu, laani ruzeeteni zacané oración ca laanu ora guidxaagalunu guendanagana casi cani maʼ bizéʼtenu ca. Ne luni zeeda stale de ca oración ni biʼniʼ ca hombre ne ca gunaa ni qué nusaana de ñuni ni na Dios. Laacabe gunábacabe Dios quixhedxí ladxidóʼcabe, gusiene laacabe xi gúnicabe ne gutiidilaʼdxiʼ stóndacabe. Laaca racaneni binni guiene xiixa ni raca nagana para laa (Salmo 23:3; 71:21; Daniel 9:4, 5, 19; Habacuc 1:3).
Guiráʼ ca oración ca rusihuínnicani ti cosa. Ca binni ni ruzeeteʼ Biblia ca gúnnacaʼ naquiiñeʼ gúnicaʼ ti cosa nabé risaca ora guni orarcaʼ para chuʼ tu gucaadiaga laacaʼ. Nga nga ni qué runi binni yanna, ne stale de laacaʼ qué rúnicani purtiʼ qué gánnacaʼ ni. Xi laani yaʼ. Ca binni que gúnnacaʼ tu laa naquiiñeʼ guni orarcaʼ.