ORACIÓN

6 Ñee zanda gacaneni laanu la?

STALE tu qué runi cré pa ribeendú binni xiixa cosa galán ora runi orar. Peru Biblia maʼ gadxé ni rusiidiʼ (Lucas 22:40; Santiago 5:13). Ca oración ca racanécani laanu para chuʼnu gaxha de Dios, peru cadi ngasi, sínuque laaca racanécani laanu para chuʼnu nayecheʼ ne para chuʼnu nazaaca. Ximodo ndiʼ zanda gacanécani laanu yaʼ.

Quíxenu ejemplu stiʼ ti xcuidi. Xi rabi bixhózebe ne jñaabe laabe naquiiñeʼ gúnibe ora chuʼ tu gusigaʼdeʼ laabe xiixa yaʼ. Ni rusiidicabe laabe nga cadi naquiiñeʼ si gusihuínnibe nuube nayecheʼ pur ni bisigáʼdecabe laabe, sínuque naquiiñeʼ gudiibe xquíxepeʼ binni ca. Ne ora gudiʼnu xquíxepeʼ binni pur xiixa ni biʼniʼ pur laanu, jma rucaa ladxidoʼno laanu gusihuínninu ni runi sentirnu. Ngaca nga ni rizaaca ora rinínenu Dios. Guidúʼyanu xi guiráʼ clase oración zanda gúninu ne xi zabeendunu ora gúninu cani.

Ca oración ni rúninu para gudiʼnu xquíxepeʼ. Ora rudiʼnu xquíxepeʼ Dios pur guiráʼ cosa galán ni maʼ bidii laanu la? racaneni guiníʼ íquenu de ca ndaayaʼ ni maʼ gucuaanu. Ne laaca racaneni laanu gácanu binni ni nabé rudii xquixe pur xiixa ni gúnicabe pur laa, riuʼnu jma nayecheʼ ne jma ricá íquenu guidúʼyanu ca cosa galán ni nápanu lu xquendanabáninu (Filipenses 4:6).

Ejemplu: Oración ni biʼniʼ Jesús para gudii xquíxepeʼ Bixhoze pur rucaadiaga laabe (Juan 11:41).

Ca oración para guinábanu gutiidilaʼdxiʼ Dios stóndanu. Ora rinábanu Dios gutiidilaʼdxiʼ ca donda stinu, racaneni para cadi guchiiñaʼ xquendabiaaninu laanu. Laaca racaneni laanu para cadi gúninu ni sti biaje, purtiʼ rudiʼnu cuenta pabiáʼ malu nga ni bíninu ne zusihuínninu maʼ guca arrepentirnu.

Ejemplu: Oración ni biʼniʼ David dxi guca arrepentir (Salmo 51).

Ca oración para guinábanu gacané Dios laanu ne gudii laanu guendabiaaniʼ. Racanécani laanu para cadi gudxíʼbanu laca laanu, purtiʼ rudiʼnu cuenta qué zanda gúninu guiráʼ cosa. Laaca racanécani laanu guni crenu de guidubi ladxidoʼno zanda gacané Bixhózenu ni nuu guibáʼ laanu ne cadi guni crenu laasinu zanda gúninu guiráʼ cosa (Proverbios 3:5, 6).

Ejemplu: Oración ni biʼniʼ Salomón ra gunábabe Dios gudii laabe guendabiaaniʼ ne gacané laabe para ganda guni mandarbe Israel (1 Reyes 3:5-12).

Ca oración ni rúninu ora nápanu xiixa guendanagana ni naguu xizaa laanu. Ora nuu xiixa ni nabé riguu xizaa laanu la? ni jma zacané laanu nga gábinu Dios guiráʼ ni nuu ndaaniʼ ladxidoʼno. Ne laaca rizíʼdinu Jiobá si nga zanda gacané laanu lu intiica cosa ni gúninu (Salmo 62:8).

Ejemplu: Oración ni biʼniʼ rey Asá ora chitindené ti xhenemigu ni nabé nadipaʼ (2 Crónicas 14:11).

Ca oración ni rúninu pur ca binni ni caquiiñeʼ chuʼ tu gacané laacaʼ. Zacá zusihuínninu qué ruyúbinu puru si para laanu ne zacaneni laanu guianu binni ne guiénenu laacaʼ.

Ejemplu: Oración ni biʼniʼ Jesús pur ca discípulo stiʼ (Juan 17:9-17).

Ca oración ni rúninu para gusisácanu Dios. Rusihuínninu jma runi respetarnu Jiobá ne jma rannaxhiinu laa ora rusisácanu ca guenda stiʼ ne guiráʼ cosa galán ni bizáʼ. Ca oración ca laaca racanécani laanu chuʼnu jma gaxha de Dios, Bixhózenu ni nuu guibáʼ.

Ejemplu: Oración ni biʼniʼ David ra bisihuinni cudii xquixe Dios pur cani bizáʼ ne bisisácabe cani (Salmo 8).

Peru cadi ngasi nga cani ribeendunu ora runi orarnu, sínuque laaca riguixhedxí Dios ladxidoʼno «dede iruti zanda guiene ximodo ni» (Filipenses 4:7). Pur guiráʼ guendanagana nuu ndaaniʼ Guidxilayú riʼ, ni jma risaca para binni nga gatadxí ladxidóʼ. ¡Dede racaneni binni para chuʼ nazaaca! (Proverbios 14:30.) Peru ximodo nga ratadxí ladxidoʼno yaʼ. Ñee zanda gatadxini pur stipa si stinu la? o caquiiñeʼ gúninu sti cosa jma risaca.

[Ni caníʼ yaza 10]

Ca oración ca racanécani laanu para chuʼnu nazaaca, chuʼnu nayecheʼ, ne ti cosa jma galán rúnicani nga, racanécani laanu chuʼnu gaxha de Dios.