ORACIÓN

7 Ñee rucaadiaga Dios ca oración ni rúninu la?

NDIʼ nga tobi de ca cosa ni jma rinabadiidxaʼ binni ne ruyúbicaʼ gánnacaʼ de laani. Maʼ bidúʼyanu cadi guiráʼ diʼ ca oración ca rucaadiaga Dios, sínuque chupa chonna si de laacani. Peru ñee zucaadiágabe ca oración ni gúninu la? Maʼ de laanu nga riaana pa gucaadiágabe cani.

Jesús gudxi ca xaíque yuʼduʼ bibani tiempu stiʼ que cadi jneza ni rúnicaʼ ora runi orarcaʼ, purtiʼ ni jma gucuá íquecabe nga guʼyaʼ binni rúnicabe ni na Dios. Ne Jesús guníʼ guiráʼ ni rúnicabe que «ngue si nga laani». Ca xaíque yuʼduʼ ca qué nuyúbicaʼ nucaadiaga Dios oración sticaʼ, sínuque ni gucaláʼdxicabe nga guidxagayaa binni ni cayúnicabe, ne ngue si nga laani (Mateo 6:5). Zacagá nga rizaaca yanna. Stale binni puru de laasicaʼ riníʼ íquecaʼ ora maʼ cayuni orarcaʼ ne qué riníʼ íquecaʼ de Dios. Ne cumu qué rinándacabe ca conseju stiʼ Biblia ni zeeda lu ca tema ni maʼ bidúʼndanu ca la? nga runi qué ricabi diʼ Dios ca oración stícabe.

Xi zanda guininu de cada tobi de laanu yaʼ. Para guicabi Jiobá ca oración stinu, cadi caquiiñepeʼ gácanu de ti raza, de ti guidxi, gácanu ricu o pobre. Biblia ruzeeteʼ: «Biaʼca risaca irá binni nezalú Dios». Ne laaca ruzeeteni «tutiica idxibi laabe ne guni jneza, runi xiiñi be laa» (Hechos 10:34, 35). Nga runi, ca binni ni rusihuinni ridxibi Dios nabé nadxiicaʼ laabe ne qué racaláʼdxicaʼ gúnicaʼ xiixa ni qué riuuláʼdxibe. Ne ca binni ni runi ni jneza rúnicaʼ stipa para gúnicaʼ ni na Dios ne cadi ni nacaʼ o ni gabi xcaadxi binni laacaʼ. Nga runi, pa racaláʼdxinu gucaadiaga Dios ca oración ni rúninu la? naquiiñeʼ chinándanu ca conseju ni rudii Stiidxaʼ Dios laanu.a

Stale binni ribeza guni Dios ti milagru para guicabi ca oración sticaʼ. Nin dxiqué cadi guiráʼ diʼ biaje bicabi Dios ca oración stiʼ binni né ti milagru. Lu ca relatu ni ruzeeteʼ Biblia guyuu biaje gudiʼdiʼ gayuaa iza de guca ti milagru para beeda gaca stobi. Ne Stiidxaʼ Dios bizeeteʼ maʼ qué zácaruʼ milagru gati si ca apóstol que (1 Corintios 13:8-10). Neca maʼ qué raca milagru yanna, peru cadi pur nga guininu qué ricabi Dios ca oración ni runi binni. Guidúʼyanu caadxi ejemplu ni cusihuinni ximodo ricabi Jiobá ca oración ni runi binni yanna.

Rudiibe guendabiaaniʼ. Ra nuu Dios nga cadá guendabiaaniʼ ni dxandíʼ, ne rudiibe ni ca binni ni cuyubi gacanebe laacaʼ ne rúnicaʼ stipa pur guzuubacaʼ stiidxabe (Santiago 1:5).

Rudiibe espíritu santu. Gastiʼ qué zanda guchaaganu espíritu santu stiʼ Dios, laani nga stipa stibe. Racané ni laanu lu stale cosa, casi ora gudxíʼlunu ca guendanagana rápanu, riguixhedxini ladxidoʼno ora nuunu xizaa ne racaneni laanu gápanu xcaadxi guenda sicarú (Gálatas 5:22, 23). Ne Jesús guníʼ zudii Dios laanu espíritu stiʼ biaʼ caquiiñenu (Lucas 11:13).

Rusiidibe ca binni ni cuyubi ganna ni dxandíʼ. Casi rieeteʼ lu Hechos 17:26, 27, lu guidubi naca Guidxilayú nuu stale binni nayá ladxidóʼ ni cuyubi Dios. Racaláʼdxicabe gánnacabe labe, ni naguixhe íquebe gúnibe para Guidxilayú ne para binni ne xi naquiiñeʼ gúnicabe para chúʼcabe gaxha de laabe (Santiago 4:8). Ca testigu stiʼ Jiobá nabé huadxélacaʼ binni ni racalaʼdxiʼ ganna de cani bizéʼtenu ca ne riuuláʼdxicabe gusiénecabe laacaʼ xi rusiidiʼ Biblia de laacani.

Ñee pur nga biaananeluʼ revista riʼ la? Ñee cuyúbiluʼ Dios la? Pa zacá ni, zándaca sicaríʼ nga cacabi Dios ca oración stiluʼ.

[Cani cá ñee yaza]