Cani ruundaʼ revista riʼ racaláʼdxicaʼ gánnacaʼ

Ñee rusianda ca testigu stiʼ Jiobá binni pur fe ni napa la?

▪ Ca testigu stiʼ Jiobá qué huayuu dxi gusiándacaʼ binni pur fe ni napa. Laacabe nánnacabe dxiiñaʼ ni jma risaca gúnicabe nga gucheechecabe ca diidxaʼ nacubi ne galán stiʼ Reinu stiʼ Dios, cásica biʼniʼ Jesús. Nanna dxíchicabe ti cosa: cani dxandíʼ xpinni Cristu qué rusiándacaʼ binni pur fe ni napa para guihuinni dxandíʼ xpinni Cristu laacaʼ, sínuque rusihuínnicabe ti cosa jma risaca.

Dxandíʼ, Jesús bisianda binni lu primé siglu que, ne bíʼnibe ni purtiʼ biaabe laacaʼ. Cani bíʼnibe que nabé risaca cani para laanu purtiʼ racanécani laanu gánnanu maʼ guirutiʼ zaníʼ: «Huaraʼyaʼ» ora maʼ guni mandarbe casi Rey lu Reinu stiʼ Dios (Isaías 33:24).

Peru xi zanda guininu de ca binni ni na rusianda ca dxi stinu riʼ yaʼ. Ca binni ni riníʼ rusianda binni pur fe ni napa, ni nuu ndaaniʼ ca religión ni nacaʼ xpinni Cristu laacaʼ ne xcaadxi religión, nacaʼ rúnicaʼ milagru para gusiándacaʼ binni. Peru Jesús maca bizeeteʼ ziuu binni ni zuni «milagru» lu lá ne zábibe laacaʼ: «Qué runebiaʼya laatu. Laguiree de ra nuaaʼ, purti qué ñuu dxi ñuni tu jneza» (Mateo 7:22, 23). Yanna, ñee jneza ruuyaʼ Dios ca milagru ni nácabe raca ca dxi stinu riʼ para guianda binni la?

Guidúʼyanu xi ruzeeteʼ Biblia de modo bisianda Jesús binni dxiqué ne ni runi ca binni ni na rusianda yanna. Zacá zanda gánnanu pa Dios rudii poder cani na runi milagru para guianda binni yanna.

Primé la? Jesús qué niquiiñeʼ diʼ poder stiʼ para nusianda ti zaqué ninanda binni laa o para si ñapa jma binni. Stale de ca milagru que bíʼnibe cani ra guirutiʼ ñuuyaʼ laabe. Stale biaje dede gúdxibe ca binni ni bisiándabe que cadi gábicaʼ guirutiʼ (Lucas 5:13, 14).

Guiropa la? qué ñuu dxi nuquixe Jesús pur ca milagru ni biʼniʼ (Mateo 10:8). Ne tobi si tiru bisiándabe guiráʼ ca binni huará ni guyé ra nuube. Guiráʼ ca milagru ni biʼniʼ Jesús que jneza bireecani ne cadi caquiiñepeʼ gapa binni stale fe para gusiándabe laacaʼ (Lucas 6:19; Juan 5:5-9, 13). ¡Dede bisibánibe chupa chonna de ca binni que! (Lucas 7:11-17; 8:40-56; Juan 11:38-44.)

Nécapeʼ dxandíʼ biʼniʼ Jesús ca milagru que, peru cadi bíʼnibe cani para guidxagayaa binni ni cayúnibe ne qué ñúnibe stale cosa ora maʼ cusiándabe cani huará para si cubayube binni. Ni jma gucuá íquebe gúnibe nga gucheechebe ca diidxaʼ nacubi ne galán. Ngue runi, gudíxhebe xi guni ca xpínnibe: gacanecaʼ binni gaca discípulo stibe ne gusiidicaʼ zaca guiráʼ binni nazaaca ora maʼ guni mandar Reinu stiʼ Dios lu Guidxilayú (Mateo 28:19, 20).

Nanna dxíchinu gucuaa chupa chonna de ca xpinni Cristu de primé siglu que poder para gúnicaʼ milagru casi gusiándacaʼ binni, peru bedandá dxi maʼ qué ñúnicabe ni (1 Corintios 12:29, 30; 13:8, 13). Ca dxi stinu riʼ, rihuinni tuu nga cani dxandíʼ naca xpinni Cristu pur modo nadxiisaacaʼ ne cadi purtiʼ rusiándacaʼ binni (Juan 13:35). Nin ti binni ni na rusianda qué huayanda diʼ gacané guiráʼ xpinni Cristu de guiráʼ clase ne de guiráʼ raza para chuʼcaʼ tobi si ne gácacaʼ casi ti familia.

Ca testigu stiʼ Jiobá nuucaʼ tobi si purtiʼ nabé nadxiisaacaʼ. Ne nga rucaa laacaʼ cadi guninacaʼ xcaadxi xpinni Cristu ne zaqueca cadi guninacaʼ binni ne qué rúnicaʼ zacá neca nuucaʼ lade binni ni nanaláʼdxisaa ne dede ruutisaa. Lu guidubi naca Guidxilayú runibiáʼ binni ca Testigu purtiʼ nadxiisaacaʼ cásica gunnaxhii Cristu binni. Cadi ti milagru naroʼbaʼ nga chuʼ binni de guiráʼ raza, guidxi, costumbre ne ca binni ni riníʼ sti diidxaʼ tobi si la? Espíritu santu si stiʼ Dios nga zanda guni milagru ca. Galán gúniluʼ pa cheluʼ tobi de ca guendaridagulisaa ni rapa ca testigu stiʼ Jiobá ne gúʼyaluʼ pa dxandíʼ zacá ni.

[Dibuju/foto ni zeeda lu yaza 21]

Ñee riuulaʼdxiʼ Dios ni runi cani na rusianda binni pur fe ni napa la?