CA TEMA NI ZEEDA LU CA PRIMÉ YAZA
Ñee dxandíʼ nuu Binidxabaʼ la?
Estatua ni rusihuinni Binidxabaʼ casi ti ángel ni biaba de guibáʼ (Madrid, España)
Rogelio, ti hombre biniisi El Salvador guníʼ: «Rietenalaʼdxeʼ dxi nahuiineʼ maca runeʼ cré Dios, peru qué ñuneʼ cré pa nuu Binidxabaʼ. Ora qué guzuubaʼ diidxaʼ rabi jñaaʼ naa: “¡Ziné Binidxabaʼ lii!”, peru naa ricabeʼ laabe: “¡Zaa, zaa chinebe naa!”».
Yanna, xi riníʼ íqueluʼ de Binidxabaʼ. Gunáʼ de cani cá raríʼ raʼbuʼ jneza.
Cadi dxandíʼ nuu Binidxabaʼ. Ti símbolo si stiʼ ca cosa malu nga laabe.
Dxandíʼ nuu Binidxabaʼ, peru qué riuube lu xquendanabani binni.
Ti espíritu napa stale poder nga Binidxabaʼ ne racaláʼdxibe quítebe binni.
Gadxé gadxé ni runi cré binni. Tupeʼ nga riníʼ ni dxandíʼ yaʼ. Ñee risaca gánnanu ni la? Yanna, pa cadi dxandíʼ nuu Binidxabaʼ, riguitesícabe ca binni runi cré laabe xa. Pa nuube ne qué riuube lu xquendanabani binni, qué gápacabe razón para guidxíbicabe laabe. Peru, pa nuube ne cayúnibe dxiiñaʼ para quítebe laanu, zándaca naquiiñeʼ gápanu laanu de laabe.
Ñee ti símbolo si stiʼ ca cosa malu nga Binidxabaʼ la? o dxandíʼ nuube. Pa dxandíʼ nuube, ñee nuu xquendanabániluʼ ra naxoo la? Pa zacá ni, ximodo zanda gápaluʼ lii yaʼ. Guidúʼyanu xi rusiene Biblia.