Naquiiñeʼ guidxíbinu Binidxabaʼ la?

Cásica monóxido de carbono ca nga Binidxabaʼ: qué rihuínnibe, nabé malu laabe ne qué rudii binni cuenta xi guiráʼ rúnibe. Peru laaca cadi naquiiñeʼ guidxíbinu laabe, purtiʼ rudii Dios laanu stale ni zanda gacané laanu. Guidúʼyanu caadxi de laani.

Zanda cuinu xi gúninu. Santiago 4:7 na: «Cadi ulabi tu binidxabaʼ, stubi stubi zaxele de laatu». Dxandíʼ napa Binidxabaʼ stale poder, peru qué zanda gucaabe laanu gúninu xiixa pa qué nanu gúninu ni. Laanu nga naquiiñeʼ gúʼyanu xi gúninu. Pa guzuhuaa dxiichinu lu cani runi crenu la? zaxélebe de laanu (1 Pedro 5:9). Chonna biaje bicaanáʼ Jesús Binidxabaʼ ora gucalaʼdxiʼ nuquiinde laabe nucheebe ne pur ngue maʼ qué nuchiichiruʼ laabe (Mateo 4:11). Laanu laaca zanda gúninu casi bíʼnibe ca.

Zanda gaca xhamígunu laabe. Santiago 4:8 na: «Laidxiña gaxha de Dios». Ca diidxaʼ riʼ rusihuínnicani cayuni invitar Jiobá laanu gaca xhamígunu laa. Xi zanda gúninu para gaca xhamígunu laabe yaʼ. Modo jma jneza gúninu ni nga guizíʼdinu guiráʼ ni ruzeeteʼ Biblia de laabe (Juan 17:3). Ora jma guizíʼdinu de Dios jma zannaxhiinu laabe ne ora jma gannaxhiinu laabe jma ziuuláʼdxinu gúninu ni nabe (1 Juan 5:3). Xi zuni Bixhózenu ni nuu guibáʼ ora guʼyaʼ stipa cayúninu yaʼ. Sicaríʼ guníʼ Santiago: «Laa zadxiña gaxha de laatu».

Dxandipeʼ zápabe laanu. Proverbios 18:10 na: «Lá Jiobá zeeda gaca casi ti torre nadipaʼ. Ra nuuni rié binni nachaʼhuiʼ para guilá». Nga qué riníʼ diʼ zanda iquiiñenu labe casi ti amuletu, sínuque ca binni si ni runi respetar lá Dios nga zanda guyúbicaʼ laabe guiráʼ biaje iquiiñecaʼ tu gacané laacaʼ.

Ti ejemplu naquiiñeʼ chinándanu. Lu Hechos 19:19 zeeda ti relatu ni zusiidiʼ laanu stale cosa. Luni rieeteʼ ni biʼniʼ caadxi binni de Éfeso ni nacubi guca xpinni Cristu. Lu textu ca na: «Stale de ca ni runi brujería. Bedané ca libru stica para icá gui nezalú irá binni que. Ne ulee cabe cuenta pabiáʼ risaca cani. Biaʼsi bidii ni cincuenta mil moneda de plata».a Ca xpinni Cristu que bisáʼbicaʼ guiráʼ cosa sticaʼ ni napa espiritismo sin niníʼ íquecaʼ pabiáʼ risaca cani. ¡Nabé sicarú ejemplu riʼ para laanu! Ndaaniʼ Guidxilayú riʼ nabé nuu stale espiritismo. Nuu stale ni runi binni ne zaqueca stale cosa ni ruluíʼ cadi malu peru nápacani espiritismo ne zanda cuídxicani ca demonio. Nga runi, nabé risaca guixélenu de ca cosa ca neca gácani nagana para laanu (Deuteronomio 18:10-12).

Dxi napa Rogelio 50 iza, hombre ni bizéʼtenu ra bizulú revista riʼ, biʼniʼ crebe dxandíʼ nuu Binidxabaʼ. Xi bicaa laabe guchaabe ni riníʼ íquebe yaʼ. Laca laabe bicábibe: «Deruʼ yanna nga gapaʼ ti Biblia lu nayaʼ ne ni biindaʼ luni bicaani naa guneʼ cré dxandíʼ nuu Binidxabaʼ. Ni biziideʼ de laabe que gucaneni naa gapaʼ naa de laabe».

Ximodo ruxuíʼluluʼ nibáninu ndaaniʼ ti guidxilayú ra maʼ qué nucaa Binidxabaʼ laanu ñúninu cosa malu yaʼ. Cadi ti bacaandaʼ diʼ nga. Biblia na maʼ cadi candaa zalá Binidxabaʼ, ni caguite stale binni lu «lu gui ne azufre» (Apocalipsis 20:10). Gui ne azufre rieeteʼ raríʼ cadi dxandíʼ cani purtiʼ qué zanda guniná cani ti espíritu, nga runi ti símbolo cani: laani nga ora guinitilube. Zacá nga laani, zati Binidxabaʼ ne maʼ qué zanda guibani sti biaje. ¡Nabé sicarú zabani ca xpinni Dios!

Laga cabézaluʼ guedandá dxi ca, cadi gusaana de guiziidiluʼ de Jiobá ne modo riníʼ ique.b Pa gúniluʼ ni la? zuuyaluʼ dxi maʼ guiníʼ binni ca diidxaʼ riʼ: «¡Maʼ qué guinni Binidxabaʼ!».