Beeda gapa Hulda ni racalaʼdxiʼ

PA ÑELUʼ isla Sanguir Besar (Indonesia) raca chupa chonna iza atrá la? zándaca ñuuyaluʼ chonna de ca hermana stinu ruaa nisadóʼ. Neca runi biácabe ca hermana riʼ ndaaniʼ isla que casi binni ni rusiidiʼ de lu Biblia la? peru cadi cayuni predicárcabe ruaa nisa que. ¿Xi cayúnicabe yaʼ?

Primé, riuucabe ndaaniʼ nisadóʼ para guyúbicabe guié naroʼbaʼ, biaʼ ti balón de fútbol, ruaacabe ni dede ra cueecabe ni ndaaniʼ nisa. De raqué ribícabe lu caadxi asientuhuiiniʼ de yaga né ti martiu ruzulú rucachecabe ca guié que, para guindaacabe ca ni dede gaca ca ni biaʼ ti dxita. Ne riguucabe ca pedasu guié que ndaaniʼ caadxi bote de plásticu ne riguíʼbacabe lu caadxi escalera para chinécabe ni ra lídxicabe. Riguucabe ca guié que ndaaniʼ caadxi sacu roʼ. Ne últimu la? rutopa caadxi camión ca sacu que ne riquiiñecabe ca guié que para gúnicabe carretera.

Tobi de ca hermana riʼ nga Hulda. Laabe jma nápabe tiempu para gúnibe dxiiñaʼ ruaa nisa que. Ni riáxabe pur ca guié que randa racanebe familia stibe. Peru yanna racaláʼdxibe iquiiñebe bueltu que para sti cosa: sibe ti tableta para ganda iquiiñebe JW Library®. Nanna Hulda zacané ca videu ne ca información ni zeeda luni laabe guni predicarbe jma galán ne guiene chaahuibe Biblia.

Biʼniʼ Hulda dxiiñaʼ chupa hora guiráʼ siadóʼ lu ti beeu arondaʼ. Ne ca guié ni bicaachebe que gunda bichabe ni atrá de ti camiónhuiiniʼ. Zaqué gúpabe bueltu para gunda guziʼbe tableta stibe.

Hulda bizeeteʼ: «Dxandíʼ, despué de bicaacheʼ ca guié que, nabé bidxagaʼ ne biuubaʼ lade. Peru ora gupaʼ tableta que ne biiyaʼ zacané ni naa ganda guneʼ predicar jma galán ne gacaʼ preparar jma nagueenda para ca reunión ca nagueendaca bisiaandaʼ ca yuubaʼ que». Ne laaca guníʼ Hulda biquiiñebe tableta que ra bizulú pandemia, purtiʼ zaqué gunda guca conectarbe para chuʼbe lu ca reunión ne guni predicarbe né congregación stibe. ¡Pabiáʼ riéchenu gunda gupa Hulda ni racalaʼdxiʼ!