Gimi Kitabu Apangbanga Nga ga Ziazia Kekeapai

GI KITABU re nga kitabu ndikidi apangbanga namangi amanga. I rogodi agu apangbanga re rogo gu kitabu nyakipaha gbe rogo zegino dunduko, nga Ziazia Kekeapai. Agu apangbanga re nika undo ro tipa mo ini agu apai namangi rogo zegino tona ho Mbori atona kusaahe ni ki da ti gi gaani regbo re. Si nafura a tipa agu apai Mbori nakido pa mangaha ku mbatayo.

Gi kitabu re nika undo ro mo ini gu he nga Ziazia Kekeapai. Si nafura tipa agu aboro du payo rogo Ziazia Kekeapai yo na agu apai i amangihe. Si nafura a tipa gu bawene raka nika du rogo Paradizo auru kpotosende ane nga gu Mbori nakidopaha fu aboro.

Gi kitabu re na apangbanga rogoho nga 116. I kparakaha ku rogo apaparaha muambe. Rogo apaparaha dunduko, gu bambata kpewaraga nafura tipa agu apai du rogo gu paparaha re. Agu apangbanga re i moihe ti genehe nibi ginigu namangi mbata ginigu ki ye kusa. Gere nika undo ro mo ini gu regbo apai amangi ti ni na ginigu namangi mbata fu gu kuraha.

I gumba agu apangbanga re rogo taata afugo. Dungu rukutu agude ima rengba ka geda agu apangbanga re nitiyo. Oni nga avunguagude, oni nika bi gupai nga rukutu awironi nika ida oni nigedi agu apangbanga re fuyo dedede kini fuguhe berewe. Oni nika bi gupai nga gi kitabu re na agu apai rogoho nga gu ngba angba ti agude na kuru aboro a.

I ke averesi ti digido agu apangbanga re dunduko ni basasa. Si ngba angba oni gedi agu averesi re, nga agu apapara Ziazia Kekeapai di yo agu apangbanga re rogoho. Ho mo anyasa geda pangbanga ni, mo gedi agu asanahe du tipaha nga gu tangarayo ho ti digida gi kitabu yo re na ki asadi ka tingida gaha akaragapai.