I Aimi Yesu

MO BINGO gu kerepai namanga re! I naimo Yesu. I banga ko kuti ngua. I banga abeko na anduko na aneri kuti ngua. Tipagine agi aboro re amangi Yesu ti ni wa gure?

I amangihe wo mbiko i aima soga Yesu. Mo ini ada du namangi gipai re? Guni sa nga gu gbegberẽ maraika nga Satana Bakitingbanga. Ko du nasa aAdamu na Eva i basasangba Yekova. Na ko du a nasa avura Yesu i imiko wa gere.

Zavura mbata fu i banga Yesu kuti ngua, avurako amangiko na ­dungu gbegberẽ apai. Ya mo mo natingidapa wai i aye ku ati Getesemane yo ka zioko? Ada du nangia agu avurako re? Abarumbatayo rogo pambori du naadu. Ani bingo gupai namangi fuo gure.

Ho i azi Yesu ni ki ndu na ko, gako amokedi aoro. I ambu Yesu nisako na avurako, bambiko i aagunde agunde. Ono agu amokedi nangia aPetero na Yoane aandunga tuturũ te. I apeke agu aboro nandu na Yesu re ka bi gupai i nika mangako na ni.

Avura Yesu andu na ko koyo du gu bakumba ni nangia Ana, nangia gbiamotumo mbata. Agu aboro re aaimanga koyo te. I ki di Yesu ki ndu na ko koyo du Kayafa ni, nangia gbiamotumo ti gu regbo re. Dungu abarumbatayo nga ga pambori yo nadunguratiyo ku kpuko yo.

I ki wisigi ngbanga Yesu kua Kayafa yo. I ki ye na aboro i gumba dungu aziree kuti Yesu. Abarumbatayo rogo pambori ki ya: ‘Si naida i imi Yesu.’ I ki sukudi kpakpuko yo na sure, kini naki ko na bunia.

Wa agi apai re aamanga dimoyo, Petero adu kina zegiyo vurukporo. Aboro asungu vurukporo pati we, mbiko zere aima du ni gu yuru re. Wa aboro aafaada we, moyambu nangia degude angana Petero ki ya: ‘Gi kumba re nidu na Yesu a.’

Petero ki karagaha ki ya: ‘Oó, mi naadunga na ko te!’

Aboro ape gupai fu Petero bara biata nga, ko nidu na Yesu. Ono Petero ki ti kangoho ati dunduko. Ho Petero atikango ni ni biataha, Yesu asa tiko ki ngana ko. Rago agberẽ ti Petero mbiko gi ziree ko agumbaha re, ko ki guari kini ndu na kpee ngbako.

Ho rago agiri ni Rago Bisue, aboromotumo andu na Yesu ku rogo gu bakere bambu i anaadunguratiyo ku rogoho, nangia ba Abororondo. I apeke gupai yo i nika manga Yesu na ni. I ki ndu na ko fuo Pondio Pirato, nangia bazogo Yuda.

Aboromotumo ki ya fu Pirato: ‘Gbegberẽ kumba du du re. Si naida i imiko kusayo.’ Fuo Pirato sasana Yesu na asanahe, Pirato aya: ‘Mi abingo gu gbegberẽpai tigimi ko amangihe te.’ Pirato ki ya i ndu na Yesu fuo Erode. Erode nangia bazogo Gariraya, na ko anaaraka Yerusarema yo. Erode aabingo gu gbegberẽpai a Yesu amangihe nga gu si aidi i imiko ti ni te, sidu, ko ki ya i ndu na Yesu berewe fuo kina Pirato.

Pirato aidi zaka Yesu ko ga. Ono avura Yesu aaida i kusi kina kura zizi boro. Gu zizi boro re nangia Baraba. Ko angia iradĩ. Ho bebere uru ada ni, Pirato akusi Yesu ku zegiyo. Ko ki ya fu aboro: ‘Oni bi! Gaoni bakindo du re!’ Ono aboromotumo ki ya: ‘Oni diko kusayo! Oni imiko! Oni imiko!’ Pirato ki kusi Baraba bambukiso yo, i ki di Yesu ka ndu ka imoko.

Rago Bisue fuo bebere uru, i ki banga ko kuti ngua. I abanga ko kuti ngua na kura abamangi gbegberẽ apai ue. Mbata fu Yesu kpi, gu ko sa aya fu Yesu: ‘Mo tingidi pare ho mo nika da ni rogo gamo kindo.’ Yesu ki karagaha fuko ki ya: ‘Ya mi foro nirengo, ani aduadu na mo Paradizo yo.’

Ati bawene kidohe du? Ya mo mo ini gu paradizo Yesu afura tipaha? Wari gu paradizo adu ni Mbori amoihe ti tonatonaha? Si adu auru kpotosende ane. Na ho Yesu nika zogarago ni ku auru kpotosende ni bakindo, ko nika zingisa gi kumba re be kpio tipa ko raki rogo gu kpotosende nika ngia vovo Paradizo. Ya mo rago angbanga tiro na paha te?