Wai ga Daniere Sangbanebi Agumba Paye Masiya

GU NEBI nangia Daniere araki agarã kusayo susi 500 mbata fu i vungu Yesu. Ono tie, Yekova ayugu agu apai fu Daniere nika undo aboro i ini gu regbo i nika mbeda Yesu ni ziazia toro ko ki da ni Masiya, watadu Kristo. Yekova aya fu Daniere: “Mo íni he ki rugu tiro na ni ya ti rago kura gu pai re nga pa bungia Yerusarema na ka dua ha berewe, tipa pa ye gu mbedimbedi ko, nga bazogo, poso adú saba. Fuo gure i ki dua ha berewe, aposo ki du 62.”​—Daniere 9:25.

Tipa ani ini gu regbo mbedimbedi ko, watadu Masiya, aye ti ni, si naida ani ini gu garã ani ka tona geda regbo paye ko ti ni. Ringbisihe kuti gupai Yekova apehe fu Daniere, ani natona geda regbo tona ‘ti rago kura pa bungia Yerusarema na ka duaha berewe.’ Gini regbo ‘pa bungia Yerusarema ki duaha berewe’ akuru? Gu bake Ziazia Kekeapai nangia Nemaya aya wẽ gupai re akuru “ti ue bawe garã zogarago nga ga Bakindo Arutasasata.” (Nemaya 2:1, 5-8) Abawisigi kuru apangbanga ima bi gupai nga, gu garã nangia 474 Mbata fu Batikayo Kristo (M.B.K.) nangia ga Arutasasata bambata garã zogarago. (Agu agarã naadu mbata fu vungayo Yesu, i nagedaha kaa ga na ni kusende.) Sidu tie, gako ue bawe garã zogarago nangia 455 M.B.K. Awere tie, ani nika tona geda agarã kaa ga na ni kusende ti gu garã nga 455 tipa ka ino regbo ye Masiya.

Daniere aima gumbapa gu bagizo regbo si nika diaha “gu mbedimbedi ko, nga bazogo” ki da. Gu sangbanebi re aya wẽ ‘aposo nika du saba, fuoho, kura aposo kidu 62,’ du bangehe dunduko nga aposo 69. Bagizo gu regbo re nga wai? Dungu asasa fugo Ziazia Kekeapai nayugo gupai nga, agu aposo gumbayo paha re, anga si nga gu poso nga ga aˈuru saba te, ono si nga gu poso nga ga agarã. Gure nga poso sa nga agarã saba, angianga arame saba ya. AYudo aima rugatiyo na gupai nga poso sa rengbe arengba kadu nga agarã saba. Ni kpiapai, ho agarã anisusi ni sita, gu saba garã aningia garã Sabiti. (Gate 23:10, 11) Sidu tie, gu 69 aposo i agumbapaha angia 69 aposo nga ga agarã, watadu agarã 483 (nga 69 bara 7).

Awere tie, ani tonanga ka geda agarã 483 ti gu garã nangia 455 M.B.K. Gure naye na ani kuti gu garã nga 29 Fuo Batikayo Kristo (F.B.K.). Gure nga kina boro gu garã nzunzu Yesu azi bapatiza i ki mbediko ni ziazia toro ko ki da ni ga Yekova mbedimbedi boro, watadu Masiya!a (Ruka 3:1, 2, 21, 22) Ya mo pa digo gi sangbanebi re anyakasanga gamo idapase te?