Ani Dunduko Naida I Tambua Rani

URU sa angia wene uru tipa tooni degude. Wa si avura du nga si anaida i nifu rugute afu furi ti kura aregbo, rogo gi bangisa uru re, ri amangipai nikparakpara wene sino ti gu sino ri nidu mbata. Ono tie, ni gu yuru re, fuo maa yo gu tooni degude re ku auru barame yo, nari ki ya gi, ki gi kina kperi koyo. Ho ri asana ri ni tipa ndu gupai angbanga rago ti ni tiri ya, ri ata gbida tikitiki na aume bangiiri yo niyaa: “Ya mo mi naadunga nigu gude nimangi wenepai areme tee?”

Gu sanahe re arungosi nari nikerehe si ki imisi ri wa ka i ru boro na kina sape, bambiko ri aduni gu boro nanaipiso tiri dedede kaa ruga wiriri. Ono rogo gi uru re, zavura gupai nga ri akparia pa wai gi tooni wiriri re asadi tiri ka manga wene sunge, ri apenga kandara wiri fugo sa nga ga tambuahe tipaha furi te.

Anga kina rukutu adegude sa naida i tambua yo kini zomia yo na fugo wasa te. Ani dunduko naidaha, wa kina gu ani naaida arugute na rugapai.

Gini berã nidu tirani ho aboro naafu ndikidi tambuahe ni fu rani? Ya mo si naafunga ngbarago fu rani na kpotoraniyo kini ngi mbikoho tee? Ho si amanga ni wa gure si nawira gbe nga ani naberã gupai nga i ima ino pa gu wenepai ani naamangaha gbiati gupai nga i naberãpa rani aberã. Si nanyakasa rani ani berẽ gupai nga, gupai ani nimangihe re, ani ima mangaha nibakere asadatise, na si nafõngbaduraniyo ani mangisunge berewe nyanyakii kumbatayo. Anga iiriwo pai ngaha te, ndikidi tambuahe nambedisa rani ambedisa koyo du gu boro ni dedede nadia regbo kaa gumba gupai nangarasa rani.—Asanza 15:23.

Yesu Kristo arugu tiko na pa ndu gupai si aida i tambua boro ti ni. Rogo gu sanza nangia ga ataranda, gu baira yo re (nga Yesu nitiko) afu tambuahe na ngbarago fu gu ruru amoyambu nadu ue re wa i adu nibasasa kini yaa: “Mo amangi he wenengaĩ, wene kangara boro sunge nga mo.” Nangbaa gu bawene wasawasa fugo ngbarago re! Wa si avura du nga gayo birĩ mangaapai na agu apai i adibehe aduku nikparakparaha ti ga guni, i afu kina bangisa tambuahe sa fuyo dunduko.—Matayo 25:19-23.

Sidu ani tingidipa navungu gu tooni degude re. Si aidanga ani sungudi aboro i kpari ni aume mbata ani ru ka fu tambuahe fuyo te. Kuba gure, si naida ani ningere tipa kina amamu kaa tambua aboro. Nirengo ani na wene nduapai berani tipa ka fu ndikidi tambuahe tipa apai dunduko fu aboro.