I Agbia Mosoro Tipa Gayo Gbanga Nunguro

PANGBANGAA amangi Kongo yo tipa adee ue nga awiri vuse sa nadi berã ka ndu gbanga nunguro rogo gu pavuruhe nadu na vura rogoho kurogo gbata nga Lisala tipa kadu yo pati gu Bakere Dunguratise Nga ga Aʹuru Biata riihe adu nga, “Oni Fu Taarimo fu Mbori.” Kupati agu arugute nga ga toro gbiati kodatise na akurayo aKristano i aduna maabangirise ka gbiaha pati gi bakere dunguratise re, i amaabangiriyo a ka gbia agu awirina si adu nga i aye rogo gu biroo nga ga be-basunge nga ga aDezire Yekova du Kinsahasa yo kupati gi bakere dunguratise re a. Mbiko gu vura nadu dagba aboro-ringara nisayo rogo gu rago re, agi adee re abinga boro naye rogo be-basunge te tipa dungu agarã, sidu i kini idi ka gbia mamu be gipai re tipa ka bi yo yo.

Agi adee ue re aguari rogo gayo gbata nga Basankusu ka ndu ku Lisala yo na kurungba, si nga gu nunguro du baturõho nga akirometere 300 rogo abire na bangiri adi ue. Gu nunguro re adi yo nga aposo biata. Wa duhe nga i tibarayo ue nga anatungusipai ti aregbo dũ, guri sa namangihe tipa agarã 3, gu kurari ki mangihe tipa agarã 19, i agbia mamu be gi gayo nunguro re ka gbandaka gu wene pangbangaa nga ga Kindo fu aboro gene wa i aandu. I adi asaa wa 110 kutingba sunge tungusapai fu aboro wa i aandu, ki fuku keke-keke akpewaraga 200 gbiati amagazini 30 fu aboro.

Wa i aandu bangiri di, si aidi i naaneka adupo gbiati angondi, nga agu anyaa ka i agbatanga ra bangiri adi rogo gu papara ringara re ya. I arengbanga ka ndu bangiri di yuru te, gene adunga beyo wa ka i ndu ngbatunga gu nunguro re yuru te! I asusi dungu agu abataya a nga ga abanzengere, nga agu abataya du tipa wisigo agu aboro nasusa ti gene.

Wa si avura du nga gi nunguro re aima du nibagbangaha na nimbumbuhe, agi awirina re aima duna ngbarago tipa ka manga gu asadatise re. I tibarayo ue aduna tambuahe gbiati ngbarago kadu pati gu bakere dunguratise re Lisala yo. Ngbaduyo yo aki aki wa we tipa rengo, na gu rimbasa awirina bangeyo adu nga 7,000 nadu pati gu bakere dunguratise re angarasi yo. Fuo nyasa gu bakere dunguratise re, i agbiatiyo na kina gu bangisa kpakarakpakaraapai re ti regbo gayo gate ku kpuyo yo, ono i agbia gayo aborokporo wenengai zanga fudifudiapai.