Asanahe be Agedihe

Ya Mo Si Aidanga Kristano Mangi Anyaa Watadu Zio Atĩo Tee?

Ziazia Kekeapai asoganga manga anyaa watadu zio atĩo te. (Pa Fu Rugute ni Ue he 14:4, 5, 9, 20; Matayo 17:27; Yoane 21:6) Ono wa vura duhe wo, gu Kristano namanga anyaa watadu nazio atĩo, si naida ní berẽ aberã kurii gu kura bangua arugute nga ga Ziazia Kekeapai.

Mbori aima idaha fu Noa na atitako i niiʹimi anyaa na kini ri pasio ra, ono ko aya fuyó wee i kusi kure gu nyaa re mbata i nika riru. (Bambata Pai 9:3, 4) Agu andiko re ayugu gupai nga si naida i bi gu raka nga ga nyaa na kikiipaha nga Mbori du si aenge beko. Sidu, aKristano aimongo anyaa gbua tipa kina mbaro watadu ngbarago na zanga bi rungora te.​—Asanza 12:10.

Si naida ani kparia gu kurapai berewe kangia sino rani. Agu amokedi nangia abazi atĩo, i anidu na ngbarago mbiko gu badungu atĩo i anaazio ra. Ono wa si avura duwo, anga pai ho nayugo nani nga i anaasambuo tiyó mbiko gu birĩ zio atĩo i adu nani, watadu mbiko gu birĩ manga anyaa i adu nani te. Watadu ho i anindu ni, abaangira i anaamangaha na akurayo tipa ka yugo guni nga kumba nado nyaa ki imiru te.​—Atambuahe 11:5; AGaratio 5:26.

Sidu, si naida ani sana tirani na agu asanahe nga: ‘Ya mo mi namaa wene kpiapai rogo yugo irisa tipa wai Yekova abi unga? Ya mo kina pa manga anyaa watadu pa zio atĩo nga gu bangisapai mi naaberãpaha watadu mi naafura tipaha na aʹuru dunduko? Ya mo gimi gene raka nayugo nani nga kina manga anyaa ngbaa tire kisusi, watadu si nayugo nani nga mi nga gu bamangisunge nga ga Mbori ní? Ya mo pa manga anyaa nakoda re dedede na kina agu aboro angianga aidipase ya, watadu si nasa re ka mi naasungongo berewe kporo na gimi aborokporo ya?’​—Ruka 6:45.

Gu kura aboro kinaho nazio atĩo watadu namanga anyaa tipa ka ngerafuo tiyó, i ki mbupa agu apai nga ga toro rogo agu adiwi aboro naamanga anyaa rogora watadu i naazio atĩo rogora. Ono tie, pa maa ani agu apai nga ga toro nibambatapai rogo gaani raka nayugo nani nga ani nakido kuti Mbori. (Matayo 6:33) Kurigure, aKristano nairisa agu andiko dunduko nga ga “Kaisara” nga gu nabipa manga anyaa gbiati zio atĩo, ka si vura du vurũ nga irangbii afunga mbusa fu agu aboro nakuo agu andiko re te vurũ.​—Matayo 22:21; ARomo 13:1.

Nibi gu bipai du Yekova nani tipa manga anyaa watadu zio atĩo, si naida kura aboro rugu gayó berãpai aruga rogo gu bangiriba re ringbisihe kuti gako arugute. (AEfeso 4:22-24) Ono tie, si naida ani irisi gu sangbakpotoyo airisa nga ga kura aboro. Gu mokedi nangia Pauro afu wene rugute tipa gipai re ki yaa: ‘Ka ani sapunga ngbanga akuarani berewe ya, kina gi ka oni sapu ngbangaha re nga, anga boro sa ka moi ũkota gene wirinani te.’ (ARomo 14:13) Pa yugo ani ngbatunga gu nyemuse zanga gbangbati re gbiati irisa nasa zereda si nye rogo dungurati na si kini fu ngbarago fu Bamangirani nga Bafu unga ahe dunduko.​—1 AKorindo 8:13.a

[Gu rukutu kekepai du bandu waraga yo]