Oni Wirikipai Rogo Fugo Mbori Yo

Gini Wene Pangbanga Duho Tipa Pambori?

Gi kekeapai re nasakapai tipa agu asanahe dungu aboro naamakiaha berãyo yo na si nayugobara akaragapai kuti agu asanahe re rogo Ziazia Kekeapai. ADezire Yekova nikadu na ngbarago ka wisigo agi akaragapai re na oni.

1. Ya mo apambori dunduko du niwenehe?

Badungu apambori gu duadu na agu aboro rogoho du na ruru ngbaduyo yo, na naida ka sa ngbarago ti Mbori. Mbori nabi agu aboro re abi na kini berãpa yó aberã. Ono tie, si nafu kina gberarago nga, kura aboro namangasunge na pambori tipa kaa manga kina gbegberẽ apai. Mbata kusayo, abarumbatayo rogo pambori anaamanga agu aboro du na gayo pambori kia gbegberẽ. (2 AKorindo 4:3, 4; 11:13-15) Areme, ringbisihe kuti agu apangbanga i atingidaha, bete abarumbatayo rogo pambori ima fubee sa gu vura nga ga abamoi, kini songodi vura, watadu kini mangi gbegberẽe fu agude.—Oni gedi Matayo 24:3-5, 11, 12.

Ziazia Kekeapai nayugo gupai nga apambori ho gbua kina ue, ndikidi pambori na ziree pambori. Ziree pambori ayugongo rengo tipa Mbori te. Wa vura duhe wo, Mbori naida aboro ini rengo aino tipa ko.—Oni gedi 1 Timoteo 2:3-5.

2. Gini wene pangbanga duho tipa pambori?

Mbori aidanga agu apambori naya i nakpinyemuko ono kini yugu ziree tipa ko nangi aboro te. Nirengo, agu aboropambori re nakpinyemu kadu nibakurea gi zegino du nizogozogoho kutiibe Satana, nga Bakitingbanga re. (Yakoba 4:4; 1 Yoane 5:19) Fugo Mbori naringbisapa agu apambori nasongoda gu zogarago nga ga aboro susi ga Mbori kuti debäri. Ziazia Kekeapai nayamba gi debäri re na gu rimo nga “Bakere Bakporo nga Babera,” gu rimo re angia rimo gu gbata ziree pambori aenge rogoho tifuo Ime Akangbii ti rago Noa. Barambeda, Mbori nika dia agu apambori kusayo naingisa aboro na kini rungosiyo.—Oni gedi Yugoti 17:1, 2, 5, 17; 18:8, 23, 24.

3. Wai gu Mbori nika sa ngbarago ti aboro dunduko?

Si furani niwene pangbanga ka ino gupai nga i nika sapangbanga ziree pambori. Gipai re nika ye na pazereda fu rikaaboro dunduko be gu rungo i agbiaha be ziree pambori. Ziree pambori adunga ho berewe ka ingisa aboro na ka kparaka yó te. Agu aboro dunduko nikaa raka adu nikodikodi yó na kini irisi kina bangisa ndikidi Mbori sa.—Oni gedi Yesaya 11:9; Yugoti 18:20, 21; 21:3, 4.

4. Ginipai si aida agu aboro du na ruru ngbaduyo yo mangihe?

Bangiri Yekova agonga ti agu aboro du na ruru ngbaduyo yo nga aguyo duku rogo ziree apambori yo te. Ko nadungura yó awere kurogo ba sa tipa ka yugo rengo fuyo.—Oni gedi Mika 4:2, 5.

Yekova nadia agu aboro kugume ku dagba gako aborokporo naida kaa irisiko. Ka si vura du nga rago angbanga ti abakurearani na agumerani ho ani atona ka iriso Yekova ni te, ani nagbia amaku agbia nibakerehe. Ani nadu na wene pagume na Mbori, na vovo abakure rogo gako riigbu, na gu maabangirise du tipa ka raka nyeanye kindi.—Oni gedi Marako 10:29, 30; 2 AKorindo 6:17, 18.

Ka oni aida ka ino kura apai tipa gipai re, oni bi kapita 15 na 16 nga ga gu buku Gini Apai Nzunzu Ziazia Kekeapai Ayugoho?, aDezire Yekova akusaha.

[Picture Credit Line on page 26]

The Complete Encyclopedia of Illustration/J. G. Heck