Ho gu Boro Akpi ni Mo Akpinyemu Ni

Bebe aima kpinyemu bari gbe. Gu boro naape agu afugo re furi angia wene bakurea gari aborokporo, ono agi afugoko re aafunga ngarasaro furi te, ono ki na imisiri. Rii anaape gupai fu tiri dedede nga, “Kpioko adu nga ni wenepai te.” Si adu ziazia nga ho ri ake gupai re ni rogo gari buku, ri aarungo kindi tipa kpio bari fuo susa dungu agarã kusa.

A wa Bebe abihe, si nadia bakere regbo adia tipa bangiri boro go tipa kpio boro, gbe ka si du nga ni aima kpinyemu gu boro nakpi re gbe. Rogo Ziazia Kekeapai yo, i fura tipa kpio nga si nga “yangara vura.” (1 AKorindo 15:26) Si narimo ku rogo gaani raka yo na gu ome ka ani arugusanga ya, gbe ti agu aregbo ani ambakadanga tirani ambakada tipaha ya, na kini di agu aboro berani ani akpinyemu yo. Boro ho rengbe ka ne surungbaha te. Anga iiriwopai ngaha te ka si du nga ani ainongo wai ka ani dibe gu gberãrago du ani na ni tipa kpio gaani boro na tingbafuo kpio ni te.

Si nawira wa mo ima rengba ka bakabangiro nga: ‘Si nadia regbo wai tipa boro mbu rungo tipa kpio gani boro? Wai du rengbe boro ka diabe gu rungo re? Wai du rengbe mi ka fu wasa fu agu aboro gayo aboro nakpi? Ya mo maabangirise ho tipa agu aboro kpiki?’