Nyanyakipa Kidohe Rogo Tooni Fugo Ebere

Ya mo ani rengba ka ida kuti gupai nzunzu nga ga Mbori akidohe dunduko nika da ada ti rengo? Yesu aima ida kuti gipai re, na gako yugopai asa agu aboro naagia ko tipa i du na idapase kuti gipai re. Mo makianga gu kpiapai ko afuhe ti regbo gako tungusapai rii bagangara yo, a wa duhe ni kekehe rogo Matayo 5:18 “Ya mi fu roni ni rengo, Daho ngbangbaturũ ka nyasa ni, na kpotosende, wiri toni he akpára nga ti rugute wa sa te, daho i ka digisa apai ni dunduko.”

Gu wiri tooni fugo du rogo pa-Ebere nga (yod) nga gu bambata kekepai nga ga Tetragrammaton nga gu kekeapai biama nga ga pa-Ebere narukuba rimo Mbori nga Yekova.a Kupati agu afugo na awaraga nga ga ga Mbori andiko, abakeapai na aFarusi anaabi “wiri toni he” na nyanyakipaha.

Yesu aagumba gupai nga, si wa ngbangbaturũ na kpotosende rengbe na susa kusayo ti gu nga rukutu apai nga ga Ndiko zanga digiso tihe. Ono tie, Ziazia Kekeapai nakido rani nga ngbangbaturũ na kpotosende nika nyeanye kindi. (Atambuahe 78:69) Si du, gi wiri fugo du ane re nayugo gupai nga, anga wiri tooni pai ho sa nga ga Ndiko nika zanga digiso tihe te.

Ya mo Yekova naberã pa wiri futufutuapai? Ii, ko naberãha aberã. Mo berẽnga kurii gipai re: I agumba gupai fu agu aYisaraere naadu bakuru kusayo nga, si aidanga i kuo meme gu kandoro nga ga Pumbo Susiri te. (Gate 12:46) Nga wiri tooni pai nirengo. Ya mo i arugutiyo na ndu gupai si aaidanga i kuo meme ti ni ya? Kura regbo i aaruganga tiyo na ni te. Yekova aima ino gupai nga, gi wiri tooni pai re adu tipa gu sangbanebi naima du nga i aakuodingo ndu Masiya ti regbo asayo ko ti ngbunduru ngua rungosiro te.—Atambuahe 34:20; Yoane 19:31-33, 36.

Ginipai ga Yesu afugo ayugoho furani? Ani ima rengba ka du na gu kido nga, agu akidohe dunduko Yekova nakido ho nika digiso tihe na afutufutuhe dunduko. Nga gi bawene kidohe rogo gu tooni kekeapai nga ga Ebere!