Sanduki Asanahe

◼ Ginipai rengbe ani ka mangaha tipa ka undo abazakigene?

Rogo Zegino dunduko rogo gu garã nga ga sunge nangia 2009, awirina du bangeyo nga 800,000 namangisunge ni bazakigene na nikparakpara abazakigene. Agi abamangisunge Kindo ti aregbo dũ re nadia bakere regbo, ome, gbiati agu ahe du beyo tipa ka gbandaka gu wene pangbanga nga ga Kindo. (Snz. 3:9) Nairiwo wai rago angba ti Yekova na gayo asadatise! Ngba gini agene rengbe ani ka yugokpia sino Yekova tipa ka sa agu abazakigene re i gbia ngbarago na kidu na hipai rogo gayó sunge tungusapai?

Nirengo, gaani wene afugo rengbe arengba ka ngarasa yó i nitungusipai kindi ni abazakigene. (Snz. 25:11) Ya mo ani rengbe ka aria gaani ringbisapai tooni tipa ka tungusapai naayó? Ho ani andu ni naayó wasa, ani rengbe ka mangasunge na gaani ũnduge kuba mangasunge na gayó. Ka si du nga ani ndu rogo gayó ũnduge, ani rengbe arengba ka fu bete marã fuyó tipa u undo yó na agu apai du tipa ũnduge. (1 Kor. 13:5; Frp. 2:4) Gu kura gene a rengbe ani ka yugo gaani nyemuse fuyó ngbaha nga kaa dia yó kugume ti kura aregbo ku kpurani yo watadu kaa yamba yó tipa riahe.​—1 Pet. 4:8, 9.

Ziazia Kekeapai nakido rani nga Yekova nika ngera angerafuo agu azingo nga ga agu aboro namaa pa gako Kindo mbata rogo gayó raka. (Tam. 37:25; Mt. 6:33) Gene sa dagba agu akuraha ko amanga gipai re ngbaha nga vurube gu riigbu nga ga agu awirina nga aKristano. (1 Yoane 3:16-18) Rengo ngaha nga, anga gupai abazakigene aberãha nga gu kura aboro du du na gu tindiro beyo nga kaa ngerafuo agu azingo du yó nani te. Sidu, i arengbanga ti kura aregbo ka tona kaa gumba pa agu azingo du yó nani fu kura aboro te. Ono tie, ani rengbe arengba ka gamahe fu agi abazakigene re tipa i dibe gayó “zingo ahe” rogo mangimangipai yo niwisigo ani yó ka ino agu azingo du yó nani.​—2 Kor. 8:14, 15.

Ho Foibe nga gu zaaza natungusi wene pangbanga nadu rogo gu dungurati nangia Kenikurea rogo bambata sa kama agarã andu ni ku Roma yo, Pauro angarasi agu awirina nadu yo ki yaa: “Oni dí ri ku gume rogo Gbia, re are ni ga Mbori aboro na . . . oni únda ri aunda na pa gu pai ka zingo ho amanga ri yo du oni ni.” (Rom. 16:1, 2) Ani na gu momu berani nga ka songoda agu abatungusipai du rogo gaani dungurati natungusapai ni abazakigene na nikparakpara abazakigene zanga nyomoro.​—Amo. 5:42.