Asanahe Be Agedihe

Ya mo agu asino i natangara paha rogo AGaratio 5:22, 23 nga yangara agu asino nga ga papara “zuzu Toro”?

Agu averesi re tangara agu asino nga ga aKristano nga ribua: “Zuzu Toro nga nyemuse, na ngbarago, na zereda, na hipai, na mangapase, na weneringise, na du ngangarã, na zera, rugatise.” Ono anga agu asino re nga gu yangara wene asino rengbe ga Mbori toro ka undo rani ani sonosihe te.

Waigu ani ainoho? Sidu, mbata fu gu mokedi nangia Pauro fura tipa zuzu toro, ko akepai ki ya: “Agu apai borose amanga . . . nga, bari, na pa meteka, na wasiro, na irisa kpiaahe, na soroka, na asogote, na kpata, na aringo, na azinga, na kpika pai, na kparaka, na kparakpara pai, na kpiboro, na kpibuda, na do pumbo gbarakagbaraka, na tunga agi apai re.” (Gara. 5:19-21) Sidu, Pauro aima rengba ka gumbapa gu kuraapai nga si nga “agu apai borose amanga,” wa ngbatunga agu i nafura tipaha rogo AKorosaio 3:5. Wakina gure a, fuo tangara ko pa wene asino ribua, ko aya: ‘Rugute ho tipa tunga agi apai re wa sa te.’ Sidu, Pauro aapenga pa gu wene asino dunduko rengbe ani ka sonosaha mbiko gu undo nga ga ziazia toro te.

Ani narugatirani na gipai re ho ani aringbisa zuzu toro ni na zuzu imarago nga gu Pauro akepai tipaha fu gu dungurati naadu Efesa yo, ko aya: “Zuzu imarago du rogo wenepai yo dunduko na rurupai na rengo.” (Ef. 5: 8, 9) Sidu, “wenepai,” kodihe na rurupai na rengo nga papara “zuzu imarago,” ono si a nga papara “zuzu Toro.”

Teketeke a, Pauro angarasi Timoteo tipa ko “nipeke fuo rurupai, sinombori, idapase, nyemuse, zadapase, zera”—nga wene asino sita. (1 Tim. 6:11) Asino gbua biata nga (idapase, nyemuse, na zera) i nagumba paha nga si du dagba agu asino yo nga ga papara “zuzu Toro.” Ono tie, Timoteo aida aida a na gu undo nga ga ziazia toro tipa ka sonosa gu kura asino nga: rurupai, sino Mbori, gbiati hipai.—Oni ringbisihe na AKorosaio 3:12; 2 Petero 1:5-7.

Sidu, AGaratio 5:22, 23 agumbanga pa agu asino dunduko si aida aKristano sonosihe te. Ga Mbori toro ima rengba ka undo rani ani sonosi agu asino du ribua nga ga papara “zuzu Toro.” Ono badungu asino duho si aida ani sonosihe tipa kadu ni nyanyaki aKristano rogo toro yo na “ki ukadi gu vovo boro, fu yo ni ku sangba Mbori yo na rurupai na ziaziapai nga ga rengo.”—Ef. 4:24.