Tooni Degude Aundo Iiriwo Kumba

YA MO mo ini gupai gu tooni degude re apehe? Ri napepa ga Yekova nebi nga Erisa fu gu dee re, na gu iiriwoapai Yekova aundo gako aboro i mangihe. Gu dee re ainongo pai tipa Yekova te bambiko ngbatunga Yisaraere nga ri te. Ani bingo gupai nasa gi tooni degude re ri du kua gi dee yo re.

Gu dee re nga boro Suria. Kumbari nga Namana, nga bangerekurii ga aSurio rimbasa aborovura. Gi tooni degude re nga boro Yisaraere. ASurio aziri azio ba vura yo kini ga na ri kua Namana yo ni kanga.

Namana adu na gu kere kaza tiko nga ngbataka. Gu kaza re nagberesa kpoto boro ni kerehe. Ono gere nga gupai gu degude re apehe fu dia Namana: ‘Ka bairare ndu fuo ga Yekova nebi ku Yisaraere yo, ko hu ahu be gako ngbataka.’ I ape gipai re kusa fu Namana.

Namana adu na bakere nyemu ka hu; sidu, ko aguari ka ndu ku Yisaraere yo. Ho ko ada ni yo, ko andu kua Erisa yo. Erisa akedi gako moyambu ko ndu ki ya fu Namana wẽ ko ndu ku rogo gu di nga Yaradene ki zundu tiko yo bara saba. Gipai re aba bakere zinga ti Namana, ko ki ya: ‘Agu adi du Suria yo ngbaki ki susi agu adi dunduko du Yisaraere no!’ Fuo gumbako gipai re, ko ki guari ka ga ku Suria yo.

Ono gako moyambu sa ki ya fuko: ‘Gbia, ka Erisa niya foro mo mangi gupai du ni kpakarakpakaraha, ka mo mangihe amanga. Tipagine tie ka mo amanganga gi wiri tooni pai ti ni nga ka zunda tiro wa gumbako ho ya?’ Namana agisangba gako moyambu ki ndu ki zundu tiko bara saba Yaradene yo. Ho ko amangihe ni wo, ko ahu nibasa be gako ngbataka!

Namana adu na bakere ngbarago fuo hu ko. Ko akaragatiko fuo Erisa ki ya fuko: ‘Mi ini gupai awere tie nga gu Mbori du Yisaraere no ko nga bangisa ndikidi Mbori rogo kpotosende dunduko. Mi nazungadi ro tie mo di gamahe bere.’ Erisa ki ya fuko: ‘Oó, ka mi dinga gamahe bero te.’ Erisa aima ino gupai nga si ni gbegberẽpai fuko ko di gamahe be Namana, bambiko Yekova du nahusi ko. Ono ga Erisa moyambu nangia Geazi aaida i fu gu gamahe re fuko.

Sidu, gere nga gupai Geazi amangihe. Ho Namana aguari ni ki tona gate ku Suria yo, Geazi adofuo ko. Ko andu ki gbiako gene ki ya fuko: ‘Erisa kedi re fuoro ki ya mo fu bete agu agamahe mo niidi ka fuhe tipa ko fuhe fu agu abakureako ye awere ka biko.’ Gure angia ndikidi ziree. Ono Namana aainongo nga ziree du te; si du ko afu ahe ti ni fu Geazi ko ga na ni.

Ho Geazi ada ni kporo yo, Erisa aima ino gupai ko amangihe. Yekova aima gumbaha fu Erisa. Erisa ki ya fu Geazi: ‘Wa mo namangi gi gbegberẽpai re, gu ngbataka niguari ti Namana nika ye sa ro.’ Ti kina gu regbo re, kpoto Geazi ki rengbe dunduko na ngbataka!

Ginipai ani awirikaha ti gipai re? Bambataha nga, si naida ani du wa gu tooni degude re kini fura tipa Yekova. Si rengbe ka kusa bawenepai. Uehe nga, si aidanga ani du na rukö wa Namana adu te, ono si naida ani gisangba ga Mbori amoyambu. Biataha nga, si aidanga ani pe ziree wa Geazi amangihe te. Nirengo, badungu apai rengbe ani ka wirikaha ka ani ageda Ziazia Kekeapai.