Kerekuru Andu na Akumba

YA MO mo nabi gu bakere kerekuru kumba aya beko sa ru re? Gere nga agu akumba re guari Yerusarema yo ka ndu ku Betereme yo. Agu akumba re angia aboro Uroyo, na i anaawisigo akerekuru. I aini gupai nga gu vovo kerekuru re nandu na yo koyo du nyanyakipa boro ni.

Ho agi akumba re aye ni Uroyo ki da Yerusarema yo, i aya: ‘Wari i navungu gu gude ni nika ngia bakindo aYudo?’ “AYudo” nga kura rimo aYisaraere. Agu akumba re aya berewe wẽ: ‘Ani abi ga gu gude re kerekuru ho ani adu ni Uroyo, na gere nga ani ye ka irisoko.’

Ho Erode agi gipai ni re, rago agberẽ tiko ni kerehe. Ko aaidanga kura bakindo ye ka dia bako te. Si du Erode ayambu agbiamotumo ti ni ki sanayo ki ya: ‘Si adu nga i nika vunga gu bakindo re wari?’ I ki ya: ‘Ziazia Kekeapai naya wẽ Betereme yo.’

Erode ki yambu agu akumba naye Uroyo re ki ya fuyo: ‘Oni ndu ka gbata gu gude re. Ho oni ka gbia ko ni, oni ki gumbaha fere. Mi naida ka ndu ka irisoko a.’ Ono gupai naadu berã Erode yo nzunzu nga pa imo Yesu!

Gu kerekuru re angbe fu agu akumba re mbatayo wa i aandu ku Betereme yo, na u andu ki ru barii gu rago Yesu adu rogoho. Ho agu akumba re arimi ni ku dimoyo, i abi Maria na fogo Yesu beri. I ki kusi agamahe ki fuhe fu Yesu. Kusa, Yekova aya fuyo rogo musumo wẽ ka i karaganga tiyo fuo Erode ya. I aguari ki ga ku rogo gayo ringara ngba kura gene.

Ho Erode agi gupai ni nga agu akumba re aima ga ku kpuyo yo ngba kura gene, ko adu na bakere zinga. Ko ki zinahe fu gako aboro i imi gu fogo agude dunduko naadu Betereme yo nga aguyo garãyo atona ti ue ka ye kusende. Ono Yekova aima gumbapa gipai re fu Yosefa rogo musumo yo ko ki di Maria na Yesu ki oro na yo ku Ezipeta yo. Ho Yosefa agi gupai ni kusa nga Erode ima kpi, ko adi Maria na Yesu ki ga na yo ku Nazareta yo. Yo du Yesu asono ni.

Da du mo aberãha nga ní nasa gu kerekuru re u nindu na agu akumba re? Mo tingidi gupai nga, agu akumba re andu mbata ku Yerusarema yo fuo bi yo gu kerekuru re. Satana du naaida ka imo Wiri Mbori, na ko aima inoho nga Bakindo Erode naadu Yerusarema yo nika ida aida ka imoko. Satana du tigaha nasa gu kerekuru re u nikĩ wa gure na kini ndu na agu akumba re.