Rogo Gu Vurubambu Nadu Kuari

GERE nga Rago Biama, fuo arame ue. Yesu na gako amokedi naadu 12 aye ku rogo gi bakere vurubambu naadu ariyo re tipa ka ri Pumbo Susiri. Gu kumba mo abiko ko niga re nga Yuda Keriota. Ko nandu ka pepa wai fu aboromotumo rengbe yo ka zio Yesu.

Rogo gu uru naadu mbata fu gure, Yuda andu fuoyo ki sanayo ki ya: ‘Ginihe ka oni fuhe fere ka mi undo roni oni zi Yesu?’ I ki ya: ‘Marã feda 30.’ Gere nga Yuda nandu fuo agu akumba re tipa ka ye na yo i zi Yesu. Ati bagbegberẽpai du?

Fuo nyasa ri riahe nga ga Pumbo Susiri, Yesu atona pa kura riahe berewe. Ko afu kpakuto fu gako amokedi ki ya fuyo: ‘Oni rihe, bambiko si narukuba borore nga gu mi nika fuhe tipa roni.’ Ko ki fu inga fuyo a na imekakue rogoho, ki ya: ‘Oni mbirihe, bambiko si narukuba kurere, nga gu nika uka tipa roni.’ Ziazia Kekeapai nayamba gu riahe re nga ‘ga Gbia riahe,’ watadu ‘ga Gbia riahe nga ga nyemu.’

AYisaraere anaari Pumbo Susiri kaa tingida tiyo na pa wai ga Mbori maraika aye ka ‘susa rii’ akpuyo Ezipeta yo, ono ki imi kina agu abambata vungu naadu rogo agu akporo nga ga aEzipeto. Ono Yesu aaida gupai awere nga i nitingidi pako, na wai ko afu ungako tipa aboro. Na si du ko aya ti ni wẽ i nidunguratiyo tipa gi riahe re na agarã dũ.

Fuo nyasa yo ri Ga Gbia Riahe, Yesu aya fu gako amokedi si naida i du ngangarã rogo idapase yo. I abi abia fu Mbori na ki guari rogo gu ba re. Ti gu regbo re, bebere yuru aima da. Ani bingo gu ba i andu ku rogoho.