Petero Andu Fuo Korunerio

GU MOKEDI nangia Petero du ru ane re, na abakureako du ru giiko yo re. Ono tipagine gu kumba re anugadi ti ni fu Petero? Ya mo ruhe aru fuko ko mangihe wo? Mo ini da nga ko?

Rimo gu kumba re nga Korunerio. Ko angia barukurii aborovura nga ga aRomo ko. Korunerio aainongo Petero mbata te, ono i aya fuko ko yambu ko ku kpuko yo. Ani bingo wai gipai re amangi.

Agu apefuo Yesu naadu ti gu regbo re angia kina aYudo dunduko, ono Korunerio aangianga Yudo te. Ono wa si avura duwo, ko aima kpinyemu Mbori, kini kpari fuko, na kini mangi dungu weneapai fu aboro. Rogo kura uru sa, maraika akuru fuko ki ya fuko: ‘Rago ima ngba ti Mbori na mo, na ko nika karagapai awere sa gamo akpee. Mo kedi akumba i ndu ka ye na gu kumba du rimoko nga Petero. Ko gu du Yapo yo kua Simona yo, nga guko du kpuko pavuru baime.’

Fuo gumba maraika gipai re, Korunerio akedi akumba nibasa fuo Petero. Rogo gu uru nangbefuo gure, ho agu akumba re aambeda ni ku Yapo yo, Petero asungu rii ga Simona bambu yo nga gu naadu na kpaserekpasere riihe yo. Mbori asa Petero ko bi bakere kperoko si niye ariyo. Gu kperoko re adu na ngbatunga anya rogoho dunduko. Ringbisihe kuti ga Mbori ndiko, agu anya re aadunga ni gigirira tipa rira te. Ono Petero agi fugo naaya: ‘Mo guari Petero. Mo imi agura ki rira.’

Petero ki karagaha ki ya: ‘Wo te Gbia. Mi aaringa nyakorokpa mbata te.’ Ono gu fugo re ki ya fu Petero: ‘Guhe Mbori nagirisihe ka mo yanga ti ni nyakorokpa ya.’ Gipai re amangi bara biata. Wa Petero aabakabangiriko na pa ginipai du naamanga, agu akumba Korunerio akedi yo ada kua Simona yo ki sanahe tipa Petero.

Petero ki zoro ku sende yo ki ya: ‘Mi du nga gu kumba oni aida ko. Tipagine ye oni ti ni?’ Ho agu akumba re ape gupai ni nga maraika du naya fu Korunerio ko kedi aboro fuo Petero ko ye ku kpuko yo, Petero aima ida ka ndu na yo. Rogo gu uru nangbefuo gure, Petero aguari na agu akumba re ka ndu kua Korunerio yo Kaisaria yo.

Korunerio adungura agumeko na wene abakureako dunduko ku kpuko yo. Ho Petero ada ni, Korunerio andu ka gbiako. Ko ki ti sande ki nugadi pati ndu Petero, a wa mo abihe re. Ono Petero ki ya fuko: ‘Mo guari kuari, bambiko mi nga kina boro wa mo.’ Nirengo, Baibiri nayugo gupai nga si arunga ani nugadi ka iriso boro wa Mbori te. Kina Yekova sa si aida ani irisiko.

Petero aru ki tungusipai fu agu aboro dunduko nadunguratiyo. Petero aya: ‘Mi ini gupai awere nga Mbori naida na ngbatunga aboro dunduko nga aguyo namanga gupai ko akpinyemuhe.’ Wa ko aafura kindi, Mbori akedi ziazia toro, aboro ki tona ka fura rogo dungu ngbatunga afugo. Iriwo gipai re ati ti agu abawiriki nangia aYudo nga aguyo naye na Petero, bambiko i aberẽhe tigayo nga Mbori naida na kina aYudo sa. Gere ayugu gupai fuyo nga Mbori abingo agu aboro du rogo kura ngbatunga nga i ngba watadu i nyaki payo fu Mbori susi aguyo du rogo kura ngbatunga te. Ati bawenepai du ngaha si aida ani naatingidaha.