Timoteo​—Ga Pauro Vovo Moundo

GU PARANGA mo abiko na gu mokedi nga Pauro re nga Timoteo. Timoteo anaaraka na avunguko Rusetura yo. Rimo nako nangia Eunike, rimo titako kingia Roi.

Gere nga gu biata nduge Pauro anduhe ku Rusetura yo. Garã sa kusayo ti gu regbo re, aPauro na Barunaba andu koyo ni bambataha na sunge tungusapai. Gere tie nga Pauro andu berewe koyo na bakureako nangia Sira.

Ya mo mo ini gupai Pauro apehe fu Timoteo rogo gu sura re? Ko nasanako niya: ‘Ya mo mo idi ka ye fuo rani na Sira tipa ka undo rani ani tungusipai fu aboro rogo agu arago turũ aturo gbe?’

Timoteo akaragapai ki ya: ‘Ii, mi ima idaha.’ Fuo regbo tooni, Timoteo ambu avunguko ki ndu fuo aPauro na Sira i nita na sunge. Ono mbata fu ani wirikipai tipa gayo ta, ani bingo gupai naamanga Pauro. Gere adu agarã namangi wa 17 fuo Yesu yugu tiko fu Pauro ngbagene Damaseke.

Mo tingidi gupai nga, Pauro andu ku Damaseke yo ka rungosi ga Yesu abawiriki, ono ko nitiko aima ye ki da ni ga Yesu bawiriki a! Kusa, kura avura ga Yesu abawiriki aidi ka imo Pauro bambiko ko aayugopai tipa Yesu. Ono abawiriki aundo Pauro ko bati. I amoiko ku rogo baga ki zogo ko ti gire ngbagorõ ndugu bakporo.

Fuo gure kusa, Pauro andu ka tungusapai Andiokia yo. Yo du i atona yamba apefuo Yesu ni nga aKristano. Fuo gure, i akedi aPauro na Barunaba Andiokia yo i ndu na tungusapai ku rogo kura tuturũ aringara. Gbata sa dagba agu agbata i andu ku rogoho nangia Rusetura, nga gu gbata kua aTimoteo adu rogoho.

Fuo susa garã sa, Pauro akaraga tiko berewe ku Rusetura yo na ue nduge. Ho Timoteo aguari ni fuo aPauro na Sira, mo ini wari i andu kuhoni? Mo kparianga gu kpiarago re ka bingo bete agu arago re.

I andu mbata ku Ikonio yo nga gu naadu kina barambeda ho, fuoho, i ki ndu ku Andiokia yo. Fuo gure, i ki ndu ku Turoa yo, fuoho ku Firipoi yo, Tesaronike yo, na Beroya yo. Ya mo mo bi Atenai rogo gu kpiarago re? Pauro aima tungusapai yo a. Fuo gure, i ki di garã sa na beberehe ku Korinda yo. Na ni yangaraha, i ki sungu tooni Efesa yo. Fuoho, i ki karagatiyo na kurungba ku Kaisaria yo, ki ru ki ndu ku Andiokia yo, nga gu ba Pauro animangisunge ko ki ga ku rogoho.

Sidu, Timoteo andu gbangagbanga anduge ka undo Pauro ti tungusa “wene pangbanga” na ka tona dungu vovo adungurati nga ga aKristano. Ho mo ka sona ni, ya mo mo adu ni ruru moyambu fu Mbori wa Timoteo?