Pauro Roma Yo

MO BINGO gu azogbo du ti Pauro re, na gu banzengere nga ga Roma ko nabanda ko re. Pauro nga ziziboro Roma yo. Ko nasungudo Kaisara ko bi gupai ko nika mangaha tipa ko. Wa ko angia ziziboro, i ambu gene ambu fu aboro i naaye kaa biko.

Arame biata fu da Pauro Roma yo, ko akedi sunge fuo agu abarumbatayo nga ga aYudo yo i ye ka biko. Mbiko gipai re, badungu agu aYudo naadu Roma yo aye fuoko. Pauro atungusipai fuyo tipa Yesu na tipa ga Mbori kindo. Dunguyo ada ni aidipase na ki da ni aKristano, ono aguyo aaidanga kuti gupai ko aagumbaha te.

Pauro atungusipai a fu agu abanzengere naabanda ko. Vuru agu agarã ue ko adihe ku Roma yo ni ziziboro, ko atungusipai fu agu aboro dunduko gene adu tipa ko tungusipai fuyo. Ni sangbana gipai re, zavura ga Kaisara aborokporo, i aima gia gu wene pangbanga nga ga Kindo, na aguyo ki da ni aKristano.

Ono da du nga gu gino nakepai rii mbisa re? Ya mo mo ini ní? Ii, Timoteo du. I aima ba Timoteo a ku bambukiso yo tipa tungusapa ga Mbori Kindo, ono awere i ima kusako. Na ko ye ku ane ka undo Pauro. Mo ini gupai Timoteo akehe? Ani bingoho.

Ya mo mo natingida pa agu abaagbata nga Firipoi na Efesa nga gu mo agedi paha rogo gu pangbanga du nambaha nga 110? Pauro aundo agu adungurati nga ga aKristano rogo agu agbata re. Ono fuo du ko bambukiso yo Roma yo re, ko ake waraga fu agu aKristano re. Agu awaraga ko akehe re si kina rogo Baibiri, na i nayambaha nga AEfeso na AFiripoio. Gere nga Pauro nape gupai fu Timoteo ko aida ko kehe fu agu aKristano naadu Firipoi yo.

Sino aFiripoio aima ngba gbe fu Pauro. I akedi gamahe fuko ku bambukiso yo, na Pauro aima tambua yo rogo gu waraga ko akehe fuyo. Epafuradita du nga gu kumba naye na gu gamahe re. Ono bakere kaza azi ko ko ki mbedi ka kpi. Ono awere ko ima hu na kini mbedi ka ga ku kporo yo. Ko du nandu na gu waraga aPauro na Timoteo akehe ku Firipoi yo.

Wa Pauro adu bambukiso yo, ko ake kura awaraga berewe ue nga gu du rogo Baibiri. Gu sa ko akehe rogo gu bagbata nangia Korosai. Mo ini rimoho? Rimoho nga AKorosaio. Gu kura waraga nga gu ko akehe fu bakureako nangia Firemona nga gu ko naaraka Korosai yo a. Gu waraga re nafura tipa ga Firemona moyambu nangia Onesimo.

Onesimo aoro aora be Firemona kini ye ku Roma yo. Ho ko adu ni Roma yo, ko agi pa Pauro ku bambukiso yo. Ko aguari ki ndu ka bi Pauro, na Pauro ki tungusipai fuko. Fuo regbo tooni, Onesimo ada ni Kristano. Awere tie, rago agberẽ ti Onesimo mbiko gupai nga ko aoro. Mo ini gupai Pauro akehe rogo gako waraga fu Firemona?

Pauro azungodi Firemona ko mbupai fu Onesimo. Sangba Pauro angia: ‘Mi nakaraga ko fuoro. Ono awere, ko nga kungbo gamo moyambu te. Ko nga wirinarani nga Kristano a.’ Ho Onesimo akaragatiko ni ku Korosai yo, ko andu na agi awaraga ue re beko, gu sa fu aKorosaio na gu kuraha ki du fu Firemona. Rago aima ngba tigaha ti Firemona gbe ho ko abi gupai ni nga gako moyambu ima da ni Kristano.

Ho Pauro ake waraga ni fu aFiripoio na fu Firemona, ko ake wene apangbanga fuyo. Ko aya fu aFiripoio wẽ: ‘Mi nakeda Timoteo koyo du oni ni. Ono mi nika ye aye ka bi roni a fuo regbo tooni.’ Ko ake gupai fu Firemona nga: ‘Mo mbakadi ba tipa re nga gu mi ka ye ki sungu rogoho.’

Ho i akusi Pauro ni bambukiso yo, ko andu ka bi agu awirinako nga aKristano rogo badungu arago. Ono kusa, i azi Pauro berewe ku bambukiso yo Roma yo. Bara gere, ko aima ino nga i nika imoko aimo. Si du ko ake waraga ti ni fu Timoteo ki ya ko ye ni ipo. Sangbako angia: ‘Mi ima nye ni ruru re fu Mbori, na ko nika fu mosoro afu fere.’ Fuo susa bete agarã fuo imo yo Pauro, i agbarasi Yerusarema berewe, na bara gere, aRomo du nagbarasihe.

Ono dungu apai duho kindi rogo Ziazia Kekeapai ani ata furanga tipaha ya. Yekova Mbori asa gu mokedi nangia Yoane ko ke gaha yangara akitabu, kodihe na gu nga Yugoti. Gi kitabu re nafura tipa agu apai du ku mbatayo. Ani bingo agu apai nika manga ku mbatayo.