Adaimona Nga Abaimiaboro!

Satana na gako adaimona ningia gbegberẽ aboro ti aregbo dũ. Mbata kusayo, Satana aimi anya na amoyambu nga ga gu ruru kumba nangia Eyobo. Fuoho, ko ki imi awiri Eyobo bawe ni gu “bayuge” nakuo bambu kuriyo. Na fuo gure, Satana ‘aukadi Eyobo na abagita si ki tona kpanduko yo ki da ti riko.’—Eyobo 1:7-19; 2:7.

Ti rago Yesu, adaimona asa kura aboro ni airabubo na airavurari. (Matayo 9:32, 33; 12:22) I arungosi kura kumba sa na ki sako ko nidewe tiko na ambia. (Marako 5:5) I asa kura gude a ko nitiwi ku sande, na “ki fu imawirianya fu ko gbe.”—Ruka 9:42.

Satana na adaimona aye na kere kaza kuti Eyobo nga gu nadadi kpotoko dunduko, na ki ba kumba na imawirianya — Mbata kusayo, adaimona anaaye na kaza kuti kura aboro na kini bafu aguyo ku sande

Satana na adaimona naaimo aboro kindi da ku areme. Gayo gbegberẽ mangaapai nakio kina kumbatayo fuo do yo yo ngbangbaturũ yo ku sende no. Dungu apai namanga nga gu nayugo gupai nga i nga kere gbegberẽ aboro. I narungosi aboro na akaza. I narungosi aguyo yuru, kini kpangbasi bangiriyo watadu kini ye na kere amusumo fuyo. I nawasi aguyo ni kodaba na yo. I napoposi aguyo, kini imi aguyo, na kini sa aguyo i imi tiyo.

Adaimona sa kumba ko duni zingizingi ko, na kini mangi kumba yuru ko rasi kere amusumo — Adaimona nasa kura aboro areme ni amangi kereapai; i narungosi kura aboro yuru, niye na kere amusumo fuyo

Lintina du Suriname yo aya wẽ daimona aimi gari aborokporo 16 na ki rungosi kpotori na berãri tipa agarã 18. Gupai namangi re asa ri ri pe gupai nga “rago nangba angba ti adaimona ka rungosi aboro da ti kpio.”

Ono Yekova rengbe arengba ka banda gako amoyambu be Satana na gako adaimona.—Asanza 18:10.