Ginipai Ninaamanga Ho Boro Akpi Ni?

Kpio nga zanga unga. Kpio wa kina dodoroma rame. (Yoane 11:​11-14) Gu kpikpiyo arengbanga ka giapai te, ka bi he te, ka fura te, watadu ka berã wiripai a te. (Batungusipai 9:5, 10) Ziree pambori nayugo gupai nga gu kpikpiyo nandu ku rogo gu ngbii nga ga atoro kaa raka yo na atita yo. Anga gure nga gupai Baibiri ayugoho te.

Agu aboro naima kpiko arengbanga ka undo rani te, na i arengbanga ka imisa rani a te. Aboro namanga avugahe dedede na amotumo nga gu i aberãha ya si afu ngbarago fu agu aboro kpiki. Ngbanga gipai re ti Mbori te, mbiko mburuhe rii gu sa dagba ga Satana aziree. Si arengbanga a ka fu ngbarago fu gu kpikpiyo te, mbiko i ni unga yo te. Si aidanga ani gunde be kpikpiyo, watadu ka iriso yo a te. Si naida ani irisi kina Mbori sa.​—Matayo 4:10.

Gu kpikpiyo araka raka berewe. Yekova azingisa gu kpikpiyo ku rogo unga rogo paradizo auru kpotosende. Gu regbo re kindi kumbatayo. (Yoane 5:28, 29; Amokedi 24:15) Mbori rengbe ka zingisa agu aboro kpiki wa kina gu rengbe mo ka zingisa boro rameyo.​—Marako 5:22, 23, 41, 42.

Gu berã nga ani akpingo te, si nga gu ziree Satana Bakitingbanga agbaragaha. Satana na gako gbigbita atoro nasa aboro i niberẽ gupai nga atoro gu kpikpiyo ni kina ungayo na i naye na akaza na gu kura fudifudiapai fu aboro. Satana nananga aboro, ti kura aregbo, ko nananga yo rogo amosumo na yuguyuguapai. Yekova nasoga agu aboro naˈasada ka fura na gu kpikpiyo.​—Pa Fu Rugute ni Ue he 18:10-12.