Tipagine Mbori Ambugene Ti Ni fu Gbegberẽ Apai na Arungo?

1. Wai gbegberẽ apai aenge?

Gbegberẽ apai aenge auru kpotosende ho Satana agumba bambata ziree ni. Mbori akusi Satana nikina wene maraika, ono ko “anye nga na rengo te.” (Yoane 8:44) Ko asonosi nyemu gupai rogoko yo nga i fu gu iriso fuko narẽ tipa kina Mbori sa. Satana agumba ziree fu bambata dee nangia Eva, na ki zomia ri ri gisangbako kuba giasangba Mbori. Adamu angbe na Eva rogo basasangba Mbori a. Ga Adamu diaberã aye na rungo na kpio.​—Mo gedi Bambata Pai 3:1-6, 19.

Ho Satana aya ni fu Eva ri basasangba Mbori, gure nga ko atona mburu samungu kuti ga Mbori bakere pagbia. Dungu aboro koditiyo na Satana ka soga gupai nga Mbori du nigayo Bazogo. Satana kini da ‘nibakindo zegino.’​—Mo gedi Yoane 14:30; 1 Yoane 5:19.

2. Ya mo Mbori akusi aboro watadu amaraika na gbegberẽpai tiyo?

Agu ahe Mbori akusihe adu niwenehe zanga wiri gbegberẽpai ti ni. Agu aboro na amaraika Mbori amangiyo aduadu na rengba beyo ka ndu kuti ga Mbori arugute dunduko. (Pa Fu Rugute ni Ue he 32:4, 5) Mbori amangi rani ki fu gu ranirii furani nga ga sia ka manga wenepai watadu gbegberẽpai. Gu ranirii re nasa rani ani yugu gaani nyemuse tipa Mbori.​—Mo gedi Yakoba 1:13-15; 1 Yoane 5:3.

3. Tipagine Mbori nambu arungo ti ni da ku awere?

Yekova aima mbugene fu gu samungu du kutiko tipa bete regbo. Tipagine? Tipa ka yugo gupai nga kina gu zogarago nga ga Mbori sa rengbe ka fu undo fu aboro. (Batungusipai 7:29; 8:9) Fuo agu agarã 6,000 aboro nadihe ku auru kpotosende, gupai ima yugotihe ziazia nga ka aboro zogonga tiyo nisayo te. Agu abazogo nga awiri aboro arengbanga ka nyasariipa vura, gbegberẽ mangaapai, iraira sarangbanga, na akaza te.​—Mo gedi Yeremaya 10:23; ARomo 9:17.

Gu bakparakparapai du ho dagba gu zogarago nga ga aboro na gu nga ga Mbori nga, agu aboro idi Mbori zogoyo, i nagbia undo agbia be gako zogarago. (Yesaya 48:17, 18) Barambeda, Yekova nika nyasariipa agu azogarago nga ga awiri aboro dunduko. Kina agu aboro sia Mbori nigayo Bazogo nika raka auru kpotosende.—Yesaya 11:9.​—Mo gedi Daniere 2:44.

Mo bi gu vidio re Tipagine Mbori Nambu Arungo Ti Ni?

4. Gini momu ga Mbori zerangbaduse afuhe?

Satana ayawee aboro nairiso Yekova mbiko kina gu weneapai i agbiaha beko. Ya mo mo naida ka tikango na gu ziree re? Mo ima rengba ka mangaha wo! Ga Mbori zerangbaduse nafu momu furani ani yugu singia ani naida ga Mbori zogarago watadu ga awiri aboro. Ani nayugo gaani siapai rogo gu gene ani araka ngbaha.​—Mo gedi Eyobo 1:8-12; Asanza 27:11.

5. Wai rengbe ani ka sia Mbori nigaani Bazogo?

Ani nasia Mbori nigaani Bazogo ho ani agbata ndikidi irisombori ni na kini mangihe, nga gu irisombori narurii Fugoko nga Ziazia Kekeapai. (Yoane 4:23) Ani rengbe ka ká ga Satana zogarago nihe ani kodatirani kurogo agu apai nga ga birĩ-zogarago na avura, a wa Yesu amangihe.​—Mo gedi Yoane 17:14.

Satana namangasunge na gako pagbia ka sonosa wasiwasi mangaapai. Ho ani asoga ngbatunga gu gene raka ni re, kura abakurearani na agumerani rengbe arengba ka sawia rani watadu ka soga rani. (1 Petero 4:3, 4) Sidu, si naida ani mangi siapai. Ya mo ani akodatirani na agu aboro nakpinyemu Mbori? Ya mo ani amangapai kuti gako andiko nga ga nyemuse? Ka ani mangihe wo, ani yugu gupai nga, ziree du Satana agumbaha nga boro ho ka gisangba Mbori ho du ní ni rogo fudifudipai te.​—Mo gedi 1 AKorindo 6:9, 10; 15:33.

Ga Mbori nyemuse tipa awiri aboro nafu gu maabangirise furani nga gbegberẽ apai na arungo nika digo adigo. Agu aboro nayugo gayo idapase kuti gipai re nika raka wene raka auru kpotosende nyeanye kindi.​—Mo gedi Yoane 3:16.