Gu Yugopai Nga ga Kindo Raba ga Bakindo Amoyambu

RAGO ngba tiro ka gia bagumbapai ko nimangi gumbapai rii tambara yo. Ko nga paranga wirina rogo gamu dungurati, na gere nga bambata regbo ko amanga gako gumbapai ti regbo bakere dunguratise. Mo na ngbarago wa mo agia gu gumbapai re na ngbaro tona ka zera be gu rabahe ga Mbori aboro agbiaha. Mo tingidi gu bambata regbo ko amangi gumbapai na ki bi gupai nga ko ima gbia inohe awere ni bakerehe! Ko ima manga bakere sonakumbatayo fuo manga ko gu Sukuru Du Tipa Abazakigene. Barambeda kusayo, ko na diako andu tipa gu Sukuru du Tipa Abatungusipa Kindo. Baraho oni ata bee ni ti digido gako gumbapai, mo berẽpa gu rabahe ga Mbori aboro agbiaha dunduko.

Ziazia Kekeapai aima fura tipa gu regbo si adu nga “[Yekova] nikayugo pai fu” gako aboro dũ. (Yes. 54:13) Gu regbo re du ani araka ti ni. Ani agbianga rabahe sa kina rogo gaani awaraga yo te ono rogo gaani adunguratise, kikindigihe, gbiati agu asukuru ni bakiakia i nambakadihe tipa si undo rani ti asunge ni bakiakia rogo ga Yekova riigbu. Rogo gi paparaha re, ani nika wisigopai tipa wai agi asukuru re dunduko ayugo gu gopai nga ga Mbori Kindo nazogarago areme.