Mbakadatise ka Manga Gupai Yekova Akpinyemuhe

ROGO zegino dunduko, ariigbu ima nge, gu nga ga pambori, poritiki, babagaahe na agu nabipa ga aboro raka. Si nibasasa na gaha mangaapai ni bakiakia na ndu gupai si amanga apai ti ni. Ono riigbu gudu ho sa du tigaha kia ti agu ariigbu re dunduko. Fugo Mbori nayugo gu riigbu re nga aDezire Yekova.

² Si nipa ngbarago tie nga, mo nakoda tiro na ga Yekova riigbu. Wa mo naima ino gupai Mbori akpinyemuhe na ki idi kutini, awere mo namangaha. (Tam. 143:10; Rom. 12:2) Mo nga gu zaaza bamangisunge namangasunge na agu awirina du rogo zegino dũ na nyemuse tiyo. (2 Kor. 6:4; 1 Pet. 2:17; 5:9) A wa Fugo Mbori akidohe tipaha, gipai re naye na bakere amaku foro gbiati ngbarago. (Snz. 10:22; Mk. 10:30) Ni manga mo gupai Mbori akpinyemuhe niruru ro awere, mo nambakada tiro tipa gu bawene nyenye raka du kumbatayo.​—1 Tim. 6:18, 19; 1 Yo. 2:17.

³ Bakerepa Bakusirani na riigbu beko du kia rogo zegino dunduko nga gu i azogaha vurube siokrasia. Gure nayugo gupai nga Yekova du nazogaha, ko du kurii ahe dũ. Ani na bakere kido kutiko. Ko nga gaani Basapungbanga, Bafurugute, na ni gaani Bakindo. (Yes. 33:22) Ni du ko ni gu Mbori namangapai ti genehe, ko ima manga mbakadapai tipa agu apai rengbe ka undo rani ani “namanga pai na ko” sa gako ringbisapai.​—2 Kor. 6:1, 2.

⁴ Wa digido gi zegino re ambeda wa pai, ani nandu kumbatayo tiibe gu ngbembatayo nga ga gu Bakindo i nasia ko nga Kristo Yesu. (Yes. 55:4; Yugo. 6:2; 11:15) Yesu aima gumba gupai kumbatayo nga apefuoko nika manga bakere sunge kisusi gu ko amangihe ti regbo gako tungusapai auru kpotosende ane. (Yo. 14:12) Gipai re angia rengo mbiko si adu nga vuru ngbanga regbo yo, apefuo Yesu nika nge na ki du na bakere dagbarago beyo tipa ka tungusapai rogoho. Si adu nga i nika takapandepa wene pangbanga da ku digido kpotosende yo.​—Mt. 24:14; 28:19, 20; Amo. 1:8.

⁵ Gipai re ima du nirengo. Ono tie, a wa Yesu apehe gbaiga, sunge takapande wene pangbanga nika digo ti gu regbo Yekova nasiaha. Agu asangbaanebi dunduko du rogo Fugo Mbori nayugo gupai nga gu bakere iˈiriwo rago nga ga Yekova ima mbeda.​—Yoe. 2:31; Zef. 1:14-18; 2:2, 3; 1 Pet. 4:7.

⁶ Wa ani naima ino gupai Yekova akpinyemuhe rogo gi yangara arame re, si naida ani mangi ome gbe tipa ka manga gupai Mbori aidaha. Gipai re naida ani inidi tirani wenengai na wai ga Mbori riigbu amangasunge na kini mangipai kina kubani sa na ni. Gi riigbu re namangasunge ringbisihe kuti gu bangua arengo du rogo Fugo Mbori, nga gu nakoda gaha andiko, arugute, azinahe, arugapai, gbiati ayugopai a wa duhe rogo Fugo Mbori nga gu ziazia toro adu kugii pa kehe.​—Tam. 19:7-9.

⁷ Ho ga Yekova aboro amangapai ni kuti gu rugapai du mburuhe rii Baibiri, i nadu na kodatise, kini mangisunge kina sa rogo zereda. (Tam. 133:1; Yes. 60:17; Rom. 14:19) Ginihe nanyakasa gu pagume du dagba awirina rogo gu kura aba? Nyemuse. Nyemuse nga mburu gaani mangapai na kinaha ani aukadihe. (Yo. 13:34, 35; Koro. 3:14) Rogo gi gene Mbori naidi paha re, si naida ani ndu sa na gu papara ga Yekova riigbu du ngbangbaturũ yo.

GA YEKOVA PAPARA RIIGBU DU NGBANGBATURŨ YO

⁸ Agu anebi nangia Yesaya, Yezekere, na Daniere aima bi yuguyugupai tipa ga Yekova papara riigbu du ngbangbaturũ yo. (Yes., kapita 6; Yeze., kapita 1; Dan. 7:9, 10) Wakina gure a, gu mokedi nangia Yoane aima bi yuguyugupai a tipa gu papara riigbu re na ko ki ima pepa kpiaha furani rogo gu kitabu nga Yugoti. Ko abi Yekova ko nasungu rii iˈiriwo mbatabakindo amaraika kidu pati ko, naaya: “Ziazia, ziazia, ziazia, Gbia Mbori du na tandu apai dũ, nga gu ko nadu ho mbata, nga gu ko du ho, nga gu ko nikaye!” (Yugo. 4:8) Yoane abi kurapai a nga “dagba mbatabakindo . . . Wiri Kandoro naru” nga Yesu Kristo.​—Yugo. 5:6, 13, 14; Yo. 1:29.

⁹ Gi yuguyugupai nayugo Yekova ko nasungu rii mbatabakindo re nayugoho nga ko du kurii gako riigbu. 1 Pekapai 29:11, 12 nafura tipa Yekova na gako bakerepa bangiriba nga: “Ako Yekova, ga pai du ni bahe, na tandu, na taarimo, na diabese, na irisa; bambiko agu ahe du ngbangbaturũ yo na auru kpotosende no dunduko nga gamo; ngbi nga gamo a, Ako Yekova, mo ni kiisikiisi pa ro ku ri ahe dũ. Kumuko naye be kina ro na irisa, mo nazoga ahe dũ. Tandu na ome du kina be ro a; pa kiisa pa boro si kina be ro na pa fu ome fu ahe dunduko a.”

¹⁰ Wangia Yesu Kristo ga Yekova badiasunge, ko na bakere bangiriba beko ngbangbaturũ yo, na Mbori ima fu bakere pagbia fuko. Nirengo, Mbori ima maa “ahe dunduko ku tii nduko, ki fu ko ko du ku ri ahe dunduko fu kanisa” watadu dungurati. (Ef. 1:22) Gu mokedi nangia Pauro afura tipa Yesu nga: “Mbori akiisi pako ti ni a gbe, ki fu gu rimo fu ko zogo arimo dũ; ya arukusue ninugadi ni rimo Yesu dunduko, agu ahe du ngbangbaturũ yo, agu ahe du auru kpotosende na agu ahe du tii kpotosende yo, ya miraahe ka kusa ha dunduko ya Yesu Kristo nga Gbia, sa ga Mbori taarimo nga Ba.” (Frp. 2:9-11) Rogo gi gene re, ani rengbe kadu na bakere kido kuti ga Yesu Kristo ruru ngbembatayo.

¹¹ Gu nebi nangia Daniere abi yuguyugupai tipa gu Bakuru Ko nga ko adu rii gako mbatabakindo na amaraika wa “aboro wa kutu akutu naamanga pa ko, aboro wa kutu bawe bara kutu bawe ki ru bara bangiriko.” (Dan. 7:10) Baibiri nafura tipa gi rimbasa abanzengere nga amaraika re ki ya i nga “agu atoro du ni amoyambu, du ni kedikedi yo ka manga pa agu yo nikadia ũkumbo bata.” (Eb. 1:14) Agi amaraika re nabayo ni mbakadimbakadi yo ku rogo ‘ambatabakindo, na asiapapai, na azogoaboro na atandu.’​—Koro. 1:16.

¹² Ho ani adia regbo ni ka berãkuriipa gu papara ga Yekova riigbu du ngbangbaturũ yo re, si nasarani ani ini ndu gupai Yesaya amangipai ti ni kuti gu yuguyugupai ko “abi [Yekova] ko sungu auru mbatabakindo, ku ari ni tumbatumba ko,” na ‘aSerefa ki ru ku ba riko.’ Yesaya aya: “Na gberẽ he fere! ngbare zere; bambiko boro birikobiriko kpotongba nga mi, wa ra mi dagba agu aboro biriko kpotongbayo abiriko bambiko mi bi Bakindo ni bangire, nga Yekova nga ga arimbasa ko!” Nirengo iriwopai aima zio Yesaya ko ki bi tiko nga he nga ko te ho ko abi bakio ga Yekova riigbu ni. Gipai ko abihe re aima fuda ko ni kerehe si ki da nga ho yambahe amangi ni ngbangbaturũ yo nibipa sunge takapande ga Yekova sapangbanga, Yesaya akaragapai nga: “Mi du re! Mo kédi re.”​—Yes. 6:1-5, 8.

¹³ Pa ruga ga Yekova amoyambu tiyo na pa gako riigbu na ki du na tambuahe tipaha nasayo i mangi kina gu bangisapai re a. Wa riigbu andu kina kumbatayo, si naida ani mangi ome kaa ndu sa na ni. Ani namanga ome tipa ka yugoho nga ani na bakere kido areme kuti ga Yekova riigbu.

GA YEKOVA RIIGBU NANDU KINA KUMBATAYO

¹⁴ Rogo kapita 1 nga ga ga Yezekere sangbanebi, i fura tipa Yekova yo nga ko naora rii gu bakikii ngbagida vura nga ga ngbangbaturũ ru. Gi iˈiriwo ngbagida re du narukuba ga Yekova papara riigbu du ngbangbaturũ yo. Ko naora na gi ngbagida re ngba gu gene nasako ko ni ruguhe ringbisihe kuti gako ringbisapai.​—Tam. 103:20.

¹⁵ Andu gi ngbagida re ni basasa na gu kura anduhe vuruhe yo, bakioho kina kubani sa na si wata tihe beberehe zanga kpakarapai. Mbiko gipai re, si nasa agu andu ngbagida re si ndu wa duhe “biama zanga sa tihe.” (Yeze. 1:17) Agu anduhe re rengbe ka ariatihe ni kina boro ipo ka ndu kubani. Ono tie, anga gi ngbagida re naora nisaha te, boro birĩ kinaho naora na ni. Yekova ambunga gako riigbu si nindu kina kubani sa wa si aida na ni te. Yezekere 1:20 naya: “Kina koyo toro akpi nyemu ka ndu ku ho ni, ami ki nindu koyo a.” Rogo gi gene re, Yekova du nasa gako riigbu si nindu koyo toro aida si ndu kuhoni. Gu sanahe si aida ani sana tirani na ni nga, ‘Ya mo mi nandu na ni sa?’

¹⁶ Pandu sa na ga Yekova riigbu akodanga kina gupai gbua nga ye tipa adunguratise na kini ndu kaa tungusapai te. Bambatapai nga, ndu sa na ga Yekova riigbu nga sonakumbatayo rogo toro yo. Si naida ani “rugutirani na pa agu apai du na nyanyakipaha gbe” na kini ri gu vovo riahe nga ga toro na aregbo dũ. (Frp. 1:10, NW; Frp. 4:8, 9; Yo. 17:3) Si naida ani tingidi gupai a nga, agu aba dunduko du riigbu rogoho, si naida apai dũ ndu ti genehe na giatise ki du. Sidu, si naida ani mangisunge wenengai na agu ahe nga ga toro gbiati agu nga ga borose Yekova nafuhe furani tipa ka manga gako sunge na ni. Wa ani amanga ome kaa ndu sa na ga Yekova ngbagida du ngbangbaturũ yo, gure nga gaani raka nandu sa na gu pangbanga ani atungusaha.

¹⁷ Mbiko gu undo nga ga ga Yekova riigbu, ani nandu kumbatayo namanga gupai Mbori akpinyemuhe. Mo tingidi gupai nga Yekova du nga Baoro na gu ngbagida du ngbangbaturũ yo re. Sidu tie, pa ndu ani sa na gako ngbagida nayugo gupai nga ani nairisa Yekova na kini kido kutiko ni gaani Mbia. (Tam. 18:31) Baibiri nakidohe nga: “Yekova fú ome fu gako aboro! Yekova fú maku fu gako aboro na zereda!” (Tam. 29:11) Wa du ani ni papara ga Yekova riigbu areme, ani nagbia gu ome ko afuhe na kini gbia ngbarago be gu zereda ko afuhe fu gako aboro rogo gako riigbu. Nirengo, kango ti ni te nga, bakere amaku nika du furani wa ani kaa ndu kumbatayo kindi kaa manga gupai Yekova akpinyemuhe awere na nyeanye kindi.