Ambakadapai Tipa Aba Irisombori

I NAZINAHE fu ndikidi airisi Yekova nga i dunguratiyo ku rogo bangisa ba sa tipa ka gbia arugute gbiati ngarasaro. (Eb. 10:23-25) Gu bambata ba nangia ga irisombori fu gu ga Mbori siasia aboro nangia aYisaraere angia “bamburoko dungurati.” (Gate 39:32, 40) Kusa, wiri Davide nangia Soromo adua bambu, watadu yekaru tipa ka fu taarimo fu Mbori. (1 Aba. 9:3) Fuo i gbarasi gu yekaru re rogo 607 M.B.K., aYudo amangi mbakadapai tipa kaa dunguratiyo ku rogo agu abambu i ayambaha nga bambutiria tipa kaa iriso Mbori. Fuo bete regbo kusa, i adua yekaru berewe kubaha, na gure nangia ba ndikidi irisombori. Yesu ayugupai rogo bambutiria na yekaru yo a. (Rk. 4:16; Yo. 18:20) Yesu amangi dunguratise a rii bagangara yo.​—Mt. 5:1–7:29.

² Fuo kpio Yesu, aKristano anaadunguratiyo ku rogo agu aba naadu gbaiga na ku rogo akporo tipa kaa yugo Ziazia Kekeapai na kaa kodatiyo na akurayo aidipase ka gbia ngbarago. (Amo. 19:8, 9; Rom. 16:3, 5; Koro. 4:15; Frm. 2) Ti gu kura aregbo, si anaaida agu aKristano naadu mbata dunguratiyo ku rogo gbugbu aba tipa gupai nga ka asogoyo bingo yo ya. Nirengo, gu ga Mbori ruru amoyambu naadu mbata aima du na nyemu ka dunguratiyo ku rogo agu aba nga ga irisombori tipa i ‘yugupai’ fuyo tipa Yekova.​—Yes. 54:13.

³ Areme a, ani namangasunge na agu aba du gbaiga gbiati akporo tipa agu adunguratise nga ga aKristano. Gu dunguratise du tipa sunge tungusapai dedede namanga rogo akporo. Agu aboro nafu akpuyo tipa gi ngbatunga adunguratise re nabihe ni bakere momu. Dunguyo nabihe nga i ima gbia undo ni bakerehe rogo toro yo ti mangasunge na akpuyo ngba gi gene re.

BAMBU KINDO

⁴ Gu bambata ba aDezire Yekova amanga gayo adunguratise rogoho nga Bambu Kindo. Dedede, i nangbe dagbangua, na ki me vovo Bambu Kindo rogoho, watadu ka mbakada kina gu i aima duaha mbata. Tipa gupai nga ka banda marã na ka mangasunge wenengai na gu ba irisombori re, dungu adungurati ima rengba ka mangasunge na gu Bambu Kindo re ka si rengbe. Rogo gu kura aba, si naida aida i tumo bambu tipa ba irisombori. Tipa Vovo Bambu Kindo watadu gu naida i mangisunge he berewe ni vovoho, si naida aida i kparaha fu Mbori. Ono tie, ka si dunga kina wiri bete apai gbua i namangihe ti Bambu Kindo, ndupai ho tipa i kparaha fu Mbori te.

⁵ Si aidanga Bambu Kindo du ni gu riko banaru bambu i naduaha tipa iriwoho zi aboro te. Wa vura duhe nga wai i ameka aBambu Kindo ni bakiakia ringbisihe kuti dagbarago, si naabaha dunduko du tipa kina bangisapai sa. (Amo. 17:24) Ringbisihe kuti wai du apai rogo dagbarago, si naida si du ni wene ba rẽarẽ tipa manga agu adunguratise nga ga aKristano.

⁶ Agu adungurati dunduko nga ga aDezire Yekova nadungura tihe ku rogo Bambu Kindo namanga ome tipa ka mangasunge na ni ngba wene gene na kini ngerefuoho kaa mbakadaha. I adianga marã be aboro te, na i amanganga aboro ngbaome tipa i fuhe a te. Ono sanduki gamahe kina yo tipa agu aboro ye tipa dunguratise rengbe ka fu gamahe tipa i ngerefuo ho na ni. I nafu gu gamahe re esuesu na kpotoyo yo dunduko.​—2 Kor. 9:7.

⁷ Agu aboro dunduko du rogo dungurati nabihe ni momu tipa ka fu marã si songodi Bambu Kindo na ka fu gayo regbo tipa bandaha si du ni gigirihe. I naafu gu sunge re dedede fu bakumba watadu moundo abaakumba tipa ni ngerefuoho. Dedede, gu badona nga ga sunge tungusapai ninaangerafuo giriso Bambu Kindo, gu wirina nangerakurii gu badona re watadu dufuo ko nangbembatayo. Si naida vuru Bambu Kindo yo na zegiyo du ni gu ba nafu taarimo fu rimo Yekova gbiati gako riigbu.

⁸ Rogo agu aBambu Kindo du na dungu adungurati rogoho, agu abaakumba nga ga agu adungurati re nasia abaakumba i du rogo gu Rondo Nangerafuo Bambu Kindo, i nangerafuo agu apai nabipa gu bambu re gbiati dagbangua. Gu rondo nga ga abaakumba nasia gu ni sa nidu ni barii gu rondo nangerafuo Bambu Kindo. Gu rondo nga ga Bambu Kindo re namangasunge kutii gu rondo nga ga abaakumba, i nangerafuo girisoho, na kini ngerefuoho na kini ye na agu ahe si aidaha tipa kaa girisoho. Gipai re naida na wene giatise dagba agu adungurati du rogo gu Bambu Kindo re.

⁹ Ho duhe ni nga dungu adungurati namangasunge na Bambu Kindo sa, i rengbe ka aria gayo mbakadapai nga ga regbo dunguratise na agarã dũ. Abaakumba namanga gu mbakadapai re rogo zereda gbiati gu nyemuse nga ga awirina. (Frp. 2:2-4; 1 Pet. 3:8) Dungurati ho si aida si mangi diaberã fu gu kura adungurati te. Ho babi rimbasa aye ni ku rogo dungurati sa dagba agu adungurati du rogo gu Bambu Kindo re, gu kura adungurati rengbe ka manga ariapai ti gaha regbo dunguratise tipa gu poso re.

¹⁰ Boro ima rengba ka mangasunge na Bambu Kindo tipa rogatise, kpara boro, ka si du nga Rondo Sunge Tungusapai Rogo Dungurati ima idaha funi. Agu abaakumba re nawisigo ga gu boro re sanahe na ki moi gayo diaberã ringbisihe kuti agu arugapai be-basunge afuhe.

¹¹ Agu aboro i naidihe fuyo i mangisunge na Bambu Kindo tipa apai wa gure, si naida i mangiapai yo ngba gu gene rẽ na ndikidi aKristano. Si aidanga i mangi agu apai Bambu Kindo yo nika fuda gu sangbakpotoseyo nga ga awirina watadu ka ye na gbarasarimo kuti dungurati watadu kuti rimo Yekova te. (Frp. 2:14, 15) Vurube gu rugapai nga ga be-basunge, i ima rengba ka mangasunge na Bambu Kindo tipa gu kura apai nga ga toro, wa gu nga gu Sukuru Nga ga Sunge Kindo, na gu Sukuru Nga ga Abazakigene.

¹² Si naida awirina du na irisa kuti gayo ba irisombori ti aregbo dũ. Gu gene aboro ambakada tiyo na kini voditiyo ngbaha, si naida si fu kiki kuti pa iriso Yekova. (Batu. 5:1; 1 Tim. 2:9, 10) Pa manga ani agi arugute re nayugoho nga ani nabi agu adunguratise nga ga aKristano na nyanyakipaha.

¹³ Si ni nyanyakipa pai nga apai mangi ti genehe ti regbo dunguratise. Si naida avunguagude sungu sa na awiriyo. Si naida i ngarasi avunguagude nga i nisungu rogo agu aba i nikaa fudanga aboro rogoho ya ka si du nga si naida aida nzunzu i kuru na gude ku zegiyo ka fu rugute furu watadu ka ngerafuo ru.

¹⁴ Agu awirina naima nyaka rogo toro yo i nafu ba fu aboro Bambu Kindo yo. Si naida i du ni agu aboro du na ruru bipai na nangereka angereka tipa dia aboro kugume. Gayo sunge nga ka fu sene fu vovo aboro na ka dia yo kugume, na ka undo agu aboro da kusa i gbia basungo, ka ke bange agu aboro ye tipa dunguratise, na kini moi bangiriyo ka bi gupai nga faarago watadu zere amanganga aboro gbegberẽ te. Ho daha ada ni, aba sungusi aboro rengbe ka tingida avunguagude nga ka i mbunga awiriyo i ni otoko bau mbata fu dunguratise na fuo dunguratise watadu kaa ngimbaro rii tambara yo ya. Gu boro nasunguso aboro ima rengba ka sana vungugude ngba wene gene nga ni kusi gude dagba aboro kusayo ka u fudinga yo ni bakerehe ya. Sunge aba sungusi aboro naundo ni bakerehe tipa gupai nga aboro gbia undo ti adunguratise. Si adu ni wenepai ka mangasunge na amoundo abaakumba gbiati abaakumba ni aba sungusi aboro.

SUNGE DUDUA ABAMBU KINDO

¹⁵ Rogo bambata sa kama agarã, gu kura aKristano angia airakumuko kisusi agu akurayo, sidu, gu mokedi nangia Pauro akepai fuyo nga: “Wa ahe ange be roni wa du rago re, oni rengbe na gama ahe tipa gayo zingo ahe. Wa ka ahe nge be yo ku mbata yo, i ki rengbe ka gama ahe tipa gaoni zingo ahe a; apai ki rengbe dagba roni.” (2 Kor. 8:14) Areme a, ‘apai narengba’ dagbarani wakina gure. Gu marã adungurati afuhe ni gamahe rogo zegino dunduko i namangasunge na ni tipa ka dua aBambu Kindo rogo kura aba na ni na kini mbakadi agu akuraha. Gu gamahe awirina afuhe rogo zegino na kpotoyo yo esuesu riigbu nabihe na nyanyakipaha gbiati agu adungurati nagbia undo ti agu agamahe re.

¹⁶ Nibi wai du aringara ni bakiakia, be-basunge du nasia adungurati nga si nimangi adunguratise rogo gi Bambu Kindo du rogo gi ba re. Be-basunge a nasia gu ba na gu regbo si aida i dua vovo Bambu Kindo rogoho watadu ka mbakada gu i aima duaha rogo gu dagbarago nga ga be-basunge. Ho gberãngo amanga ni, mbakadapai namanga tipa ka mbakada agu aBambu Kindo paha nagberẽ na ti kura aregbo agu abambu nga ga awirina.

¹⁷ Be-basunge nangerafuo pa mangasunge na agu awirina futiyo tipa ka ngbeka adagbangua, gbaka kpia Bambu Kindo, kusa waraga tipa ka duaha, duduaha, na ngerafuoho. Mbiko wa du bakere zingo tipa aBambu Kindo rogo dungu aringara, zingo gu duho tipa agu aboro naida ka futiyo tipa sunge. Agu abatungusipai dunduko rẽ tipa ka manga gi sunge re na du na nyemuhe, i nangarasa yo nga i hiisi fuomu na ki fuhe fu Rondo Sunge Tungusapai Rogo Dungurati. Zavura gu batungusipai ata ziongo bapatiza ya, ni ima rengba ka undo na sunge me Bambu Kindo watadu sunge mbakadaha.

BAMBU BAKERE ADUNGURATISE

¹⁸ Agu aKristano naadu mbata anaadunguratiyo ku rogo rukutu abadona. Ono tie, ti gu kura aregbo “dungu aboro” anaadunguratiyo adungura a. (Amo. 11:26) Wakina gure, ga Yekova aboro areme nadunguratiyo tipa bakere adunguratise nga ga uru sa gbiati gu nga ga aˈuru biata. Awirina naatumo rago atumo tipa ka manga agi adunguratise re, ono rogo agu arago adunga wene bambu ni tipa tumoho ya, i rengbe ka sanahe i dua Bambu Bakere Dunguratise.

¹⁹ Ti kura aregbo, i nangbe bambu, awirina ki mbakadihe na ki saha ni Bambu Bakere Dunguratise. Ono tie, dedede, i nangbe dagbangua na ki mehe rogoho. Bakio aBambu Bakere Dunguratise ni bakiakia ringbisihe kuti gu zingo du rogo dagbarago. Be-basunge nadiaberã tipa ka ngbe bambu tipaha watadu ka duaha fuo wisigo yo pai wenengai tipa gu bakio marã si nika diaha tipa ka mehe watadu ka tumoho.

²⁰ Be-basunge nasia awirina i ningere kuriipa wai i amangasunge na Bambu Bakere Adunguratise na kini bandaha. Mbakadapai nadu fu badona adungurati tipa i niye kaa girisoho dedede, na fuo adiwi sita, i rengbe ka manga gu kura asunge ti ni tipa ka mbakadaha ka paha gberẽnga ya. Si naida awirina ni futiyo ni sayo tipa ka manga gi sunge re. Sidu tie, i nangarasa adungurati dunduko nga i songodi gi mbakadapai re na kpotoyo yo dunduko.​—Tam. 110:3; Mara. 1:10.

²¹ Ti gu kura aregbo, i namangasunge amanga na Bambu Bakere Dunguratise tipa gu kura apai nga ga toro, wa gu nga agu asukuru nga ga Baibiri gbiati adunguratise nga ga ababi rimbasa. Bambu Bakere Dunguratise ni kparakparaha tipa irisombori wakina Bambu Kindo a. Ho ani adunguratirani ni ku rogo Bambu Bakere Dunguratise, si naida gaani mangaapai, votise, na mbakadatise du ni iriirihe kina wai ani naavo tirani tipa ka ye ku Bambu Kindo yo tipa irisombori.

²² Dungu vovo aboro namangapai ni ipo ka ye ku rogo ga Mbori riigbu rogo gi yangara arame re. Gere nga gu gopai nayugopa ga Yekova amaku. (Yes. 60:8, 10, 11, 22) Rogo gi gene re, ani na nyemu ka undo gu mbakadapai nabipa meka aba irisombori, bandaha si du ni gigirihe, na kini saha si du ni gu wene ba ngbaangba tipa irisombori. Ka ani amangaha wo, gure nika yugo gupai nga ani na ngbarago na gu undo ani agbiaha ti agu aba irisombori nasarani ani ngarasi tirani wa bi ani he nga ga Yekova uru nambeda.