Fubee sa Agu Asunge Nga ga Kindo Rogo Gaani Dagbarago na Rogo Zegino Dunduko

RINGBISIHE kuti ga Yesu digisidigisi sangbanebi du tipa yangara arame, aDezire Yekova ima manga sunge tungusa wene pangbanga ki da na ni ku “digida sende yo.” (Amo. 1:8; Mt. 24:14) Tipa ka manga gipai re, i nafu gayo regbo gbiati gayo ome tipa ka manga agu apai nga ga toro. I nandu kumbatayo kindi kaa maa ga Mbori Kindo rogo bambata ba rogo gayo raka yo mbiko i nakido kuti Yekova nga ko nika songoda gako abadiasunge asongoda. (Mt. 6:25-34; 1 Kor. 3:5-9) Asangbana gu sunge re nayugo gu gopai gbaiga nga Yekova ima ida na yo na ko nafu maku afu fuyo.

NGERAFUO AGU APAI NGA GA KINDO ROGO ZEGINO DUNDUKO

² Ho kura aboro abi gu gene ni ani atungusapai ngbaha, na ka bi gupai nga ani nagama aBaibiri gbiati agu awaraga du mburuhe rii Baibiri zanga i tumo tipaha, i nasanahe nga: “Oni naru wai ka gbia marã tipa gi sunge re naabaha?” Kina rengo du nga, gbingbida awaraga na kusa aBaibiri gbiati agu awaraga du mburuhe rii Baibiri naida na marã. Meka abambu gbiati ngerafuo agu akporo nga ga Betere tipa agu aboro nangerafuo amakana, nangerakurii sunge tungusapai, gbiati aguyo namanga gu kura asunge nga ga Kindo dunduko naida na marã. Kurii gure, ababi rimbasa, amokedi, kparakpara abazakigene, gbiati gu kura aboro namangasunge Kindo ti aregbo dunduko i nafu undo fuyo rogo borose yo tipa i nindu na gayo sunge kumbatayo. Si tie ziazia nga, sunge tungusa wene pangbanga ti gaani regbo re, singia rogo gaani dagbarago watadu rogo zegino dunduko, nakoda mangasunge na bakere marã gbe. Gi marã re naabaha naye wari?

³ Dungu agu aboro du na ngbarago tipa gu sunge yugo Baibiri aDezire Yekova amangaha nagama marã tipa gu sunge re ndu kumbatayo rogo zegino dunduko. Ono tie, agu aboro nasongoda gaani sunge gbe nga kina aDezire Yekova nitiyo, agu akurayo nakeda marã fu gu be-basunge nga ga aDezire Yekova du rogo gayo dagbarago. Gure nayugo gupai nga kina gu bangisa toro naadu ti gu ga Mbori amoyambu naadu mbata nga ga songoda pa me ba iriso Yekova na ngbaduyo yo dunduko du tiyo. (Gate 35:20-29; 1 Peka 29:9) Gu kura aboro nafu gayo nyanyakipa ahe na ki kehe rogo waraga nga si du fu riigbu, ono ti kura aregbo, gamahe naye be aboro ni basasa, adungurati na badona nga ga adungurati. Ho i adungura agi agamahe re ni naabaha, si dũ nakusa gu marã si aidaha tipa sunge tungusapai nindu kumbatayo.

⁴ ADezire Yekova nabihe ni pa momu tipa ka mangasunge na gayo marã gbiati agu ahe du beyo tipa ka songoda sunge tungusapai na ni. Yesu na gako abawiriki aduadu na sanduki marã beyo nga gu i anaadia marã rogoho tipa ka ngbeka agu ahe i adu na zingoho. (Yo. 13:29) Baibiri nafura furani tipa agu adee nanaaundo Yesu na gako abawiriki ti asunge. (Mk. 15:40, 41; Rk. 8:3) Gu mokedi nangia Pauro anaadia agu agamahe adia nga ga borose aboro anaafuhe fuko tipa ko nindu na sunge tungusa wene pangbanga kumbatayo nga aguyo naadu na nyemu ka songoda ko na gako sunge. (Frp. 4:14-16; 1 Tesa. 2:9) ADezire Yekova nandu kumbatayo kindi kaa pekafuo gu kpiapai nga ga futise kaa mangasunge zaaza na kini gamuhe. Rogo gi gene re, si taata fu agu aboro du na nyemu rurupai tiyo i ni futiyo wakina “ime unga gbua.”​—Yugo. 22:17.

NGERAFUO AGU AZINGO NGA GA DUNGURATI

⁵ Agu azingo nga ga dungurati ni basasa, kina gu marã aboro afuhe ni gamahe nangerafuo ho. Marã ho i adiaha be aboro te; i asianga bakio gu marã si aida boro fuhe te watadu ka ho marã be aboro a te. Asanduki gamahe kina ba dunguratise yo tipa boro na boro moi gani gamahe koyo kina wai ni ‘akpinyemuhe kpotoni yo.’​—2 Kor. 9:7.

⁶ Gu marã aboro amaaha yo, i namangasunge na ni tipa agu apai nabipa Bambu Kindo na ka ngerafuoho. Gu rondo nga ga abaakumba rengbe ka diaberã nga i kedi gu kura marã fu be-basunge nga ga aDezire Yekova si undo gu sunge tungusapai namanga rogo zegino dunduko. Tipa ka mangaha, i nasana dungurati tipa si idihe fuyo. Rogo gi gene re, dungu adungurati nakeda marã tipa gu sunge tungusapai namanga rogo zegino dunduko. Ka si du nga aboro dunduko ima rugatiyo na agu azingo du rogo dungurati, ndupai dunga ho i nimangi tingidapai dedede tipa marã te.

NGERAFUO AGAMAHE

⁷ Tingbafuo adunguratise ni basasa, awirina ue nazaka sanduki marã tipa ka dia gu marã aboro ni gamuhe na ki ke pa bakio ho. (2 Aba. 12:9, 10; 2 Kor. 8:20) Gu rondo nga ga abaakumba namanga mbakadapai tipa wai ka banda gu marã re daho i nika kedaha ni fu be-basunge watadu ka mangasunge na ni rogo dungurati. Gu wirina nangerafuo gu marã nga ga dungurati nambakada ripoti na adiwi dunduko tipa ka tingida dungurati na ni, na fuo adiwi biata dunduko, barii gu rondo nga ga abaakumba namanga mbakadapai tipa boro wisigi agu apai du tipa gu marã re.

GU MARÃ NGA GA BADONA ADUNGURATI

⁸ Gu marã nakura tipa bakere adunguratise kodihe na gu kura apai si aida tipa badona adungurati, gu marã awirina afuhe rogo gayo badona nga ga adungurati namangaha. Ti regbo bakere dunguratise nga ga uru sa, asanduki kina yo du tipa fu agamahe ku rogoho tipa si undo badona nga ga adungurati. Kurii gure, tipa ka ngerafuo agu apai si nikaa idaha, dungurati ima rengba ka fu gamahe ti kura aregbo.

⁹ Si rẽarẽ tie nga, abadona adungurati kusi marã tipa agu apai si aidaha tipa bakere dunguratise nga ga uru sa, na ka yangara marã he ni kikiihe i rengbe ka fuhe tipa gu sunge kindo namanga rogo zegino dũ. Kangia marã akiongo be badona adungurati tipa ka mangasunge na ni tipa bakere dunguratise te watadu rengbe yo ka mangasunge na ni tipa gu bakere dunguratise ngbefuo gure te, babi rimbasa ima rengba ka fu rugapai nga i tingidi adungurati na pa gu momu nga ga fu gamahe. Gu rondo nga ga abaakumba ni basasa nika sakapai tipaha na ki bi bakio marã wai rengbe dungurati ka fuhe fu baigo marã nga ga badona adungurati. Dungurati nadiaberã mbata tipa gu marã re mbata fu i kedihe.

¹⁰ Ho pai akura ni nga gu nabipa marã nga gu naida agu abaakumba nga ga badona adungurati bipai tipaha, dunguratise nga ga abaakumba namanga rogo gu uru nga ga bakere dunguratise nga ga uru sa. Kangia gu kurapai ho kia nabipa marã kpara kusayo ti gu marã nga ga badona adungurati, si naida abaakumba dunduko diberã adia tipaha. Agu aregbo dunduko si aida i mangisunge na gu marã nga ga badona adungurati, si naida i kepa bakio gu marã nzunzu si aidaha na ki ye na ni fu abaakumba i diberã tipaha.

¹¹ Mbakadapai namanga tipa i wisigi agu apai du tipa gu marã nga ga badona adungurati fuo bete aregbo.

NGERAFUO RUNGORUNGO ABORO

¹² Gu kura ndupai sanduki marã adu ti ni be Yesu na gako abawiriki angia kaa undo rungorungo aboro na ni. (Mk. 14:3-5; Yo. 13:29) Gu tindiro du fu aKristano re nandu kindi kumbatayo, mbiko Yesu aya: “Rungorungo aboro [a]du na oni dedede.” (Mk. 14:7) Wai du aDezire Yekova angerafuo gu tindiro re areme?

¹³ Ti gu kura aregbo, ruru awirina rogo dungurati ima rengba kadu na zingo aũborose na si kini idi i undoyo mbiko gbinza, kaza, watadu gu rungo niima fu rii omeyo. Gayo aborokporo, agumeyo, gbiati gu kura aboro inipai tipa gipai re, kpotoyo yo ima rengba ka fõ yo i undo. Gipai re na ngbanya na gupai gu mokedi nangia Yoane apehe nga: “Gu ni ka ũzegino du be ni, ni nibi wirinani na zingo, ki nikisi gani nunga be ko, ga Mbori nyemuse wiri pa nye kpotoni yo wãi? Gi rukutu agude, ka ani du nga na nyemuse kina rogo fugo yo, ni mirãse a ya; kina rogo mangapai yo na rogo rengo yo.” (1 Yo. 3:17, 18; 2 Tesa. 3:6-12) Ndikidi irisombori nakoda ngerafuo gu ruru awirina nga aguyo du rogo bakere zingo aũborose.​—Yak. 1:27; 2:14-17.

¹⁴ Rogo ga Pauro bambata waraga fu Timoteo, ko apepa wai rengbe yo ka fu gu undo nga ga borose fu agu aboro rẽ tipaha. Mo rengbe ka geda gako arugute rogo 1 Timoteo 5:3-21. AKristano ni basasa du gu tindiro kuriyo nga ga ngerafuo agu azingo nga ga gayo aborokporo. Sosono aboro watadu gu kazakaza yo, si naida i gbia undo be awiriyo, atitayo, watadu gu kura mbembedi agumeyo. Ti gu kura aregbo, irangbii naafu undo watadu gu kura ambakadapai du tipa mbakada ga aboro raka, agume gu boro du na zingo watadu gu kura aboro ima rengba ka undo ni ni ndu tipa gu ngbatunga undo re. Kpakarapai ima rengba ka kura nga gu rengbe ka ida dungurati naabaha berẽpa fu undo fu gu wirina du na zingo nga gu ni niima dia gbanga regbo niruru ni kuti iriso Yekova. Kangia kura gani aborokporo watadu mbembedi agumeni ti ni tipa ka undo te, na irangbii afunga undo vurube gu kura ambakadapai te, gu rondo nga ga abaakumba ima rengba ka bi wai rengbe yo ka fu gu undo ka daada. AKristano nabihe ni pa momu tipa ka fu agu ahe du beyo fu agu awirina du na zingo.

¹⁵ Dungu awirinarani ima rengba ka rimo ku rogo zingo mbiko rungosiro, avura, abazigizo, ikiiki-aime, angbongi, watadu gu kura kere fudifudi apai du rogo gi yangara arame re. (Mt. 24:7-9) Si rengbe kadu nga agu adungurati du rogo agu adagbarago re gene beyo tipa ka undo te, Riigbu Bipasunge nafura na gu kura awirina rogo gu kura aba tipa i undo tipa gu zingo nga ga agu awirina re. Gere wakina gupai agu aKristano naadu Asia Minor yo amangihe ka fu riahe fu agu awirina naadu Yuda yo ti regbo ngbongi. (1 Kor. 16:1-4; 2 Kor. 9:1-5) Ni peka ani fuo gayo kpiapai, ani nayugo nyemuse fu awirinarani na kini yuguhe nzunzu nga ani nga ndikidi ga Yesu Kristo abawiriki.​—Yo. 13:35.

KPARAKA AWARAGA

¹⁶ Baibiri gbiati agu awaraga du mburuhe rii Baibiri namanga nyanyakipa sunge rogo gbandaka gu pangbanga nga ga Kindo. Dedede, gu rondo nga ga abaakumba nasia moundo abaakumba tipa ni ningerefuo agu awaraga nga ga dungurati. Agu awirina i nasia yo i ngerefuo agi asunge re nabihe na nyanyakipaha. I nakeka pa agu awaraga du ho tipa ka ino singia awaraga kinaho nakpa nga gu dungurati aidaha.

¹⁷ Nidu ani ni agu aKristano niima kpara gaani raka fu Mbori, ani ima rugatirani na ni nga gaani regbo, gu tandu mangapai gbiati gu inohe du ani na ni, zavura gaani raka nga gamahe be Mbori ko nafuhe furani tipa ani mangi gako sunge na ni. (Rk. 17:10; 1 Kor. 4:7) Ka ani mangisunge na agu ahe du berani, gure nga ani nayugo na ni nga ani nakpinyemu Yekova ni bakerehe. Gaani nyemupai du nga ka taasarimo Yekova na gaani nyanyakipa ahe, kini ini gupai nga ko na ngbarago na gu agamahe ani afuhe na kpotoraniyo dunduko. (Snz. 3:9; Mk. 14:3-9; Rk. 21:1-4; Koro. 3:23, 24) Yesu aya: “Wa i nafuku ahe fu roni [gbua], oni fúku he tigaoni kina wo.” (Mt. 10:8) Ka ani fu tirani na gaani ahe tipa ga Yekova sunge, ani nagbia ngbarago ni bakerehe.​—Amo. 20:35.