Ga Yepeta Kidohe

AYisaraere asa giiyo berewe na Yekova na ki tona iriso kungbo ambori. Ho aAmono azubo aYisaraere ni na vura, pai ho gu kungbo ambori re amangihe ka undo yo te. AYisaraere aima mbu tipa dungu agarã. Niyangaraha i aya fu Yekova wẽ: ‘Ani ima manga ingaapai. Ako mo batasirani be avurarani.’ AYisaraere agberesi gayo kungbo ambori na ki tona kaa iriso Yekova berewe. Yekova aaidanga kaa bi yo i nimbu wa gure kindi te.

I asia gu basovura nangia Yepeta ko ngbe fu aboro kumbatayo ho i aandu ni ka sovura na aAmono. Ko aya fu Yekova wẽ: ‘Ka mo undo rani ani dibe gi vura re, mi kidohe nga ho mi nika ga ni ku kporo yo, mi afu gu bambata boro foro nga guni nika kura ngbadimo kpure ka dusio re.’ Yekova agi ga Yepeta kpee na ki undoko ko dibe gu vura re.

Ho Yepeta aga ni ku kporo yo, gu bambata boro naaye ka gbiako angia gu bangisa wiriko nangia degude. Ri aadogbere na kini ta gaza. Ginipai Yepeta arengbe ka mangaha? Ko atingidipa gako kidohe ki ya: ‘Ako wire! Mi ni fudifudi re be ro. Mi amangi kidohe fu Yekova. Tipa ka banda paha, mi du wa ka mi kedi ro mo ndu ka mangasunge banye Siro yo.’ Ono wiriko aya fuko wẽ: ‘Buba, ka si du nga mo amangi kidohe fu Yekova, si naida mo banda paha abanda. Gupai gbua mi akpinyemuhe nga ka ndu tipa adiwi ue ku bagangara yo na akuare. Mi kini ru ka ndu tie.’ Wiri Yepeta amangisunge niruru ri banye yo rogo raka ri yo naabaha. Agarã dunduko, akurari anaandu kaa biri Siro yo.