Yekova Anyakasi Eriya

Izebere agi gupai namangi tipa ga Bara anebi na ri ki zingi ni kerehe. Ri akedi sunge fuo Eriya ki ya: ‘Gba, mo nika du ni kangba wakina ga Bara anebi.’ Gunde azi Eriya ni kerehe na ko ki oro ku ngbakungba yo. Ko akpari kpee nga: ‘Yekova, pai ima dia bere. Mo idihe fere mi kpi.’ Eriya aima mbu ni kerehe na ko ati ni rame tii ngua ki ra.

Maraika azingisiko rame yo na ki ya fuko: ‘Mo guari kuari ka ri riahe.’ Eriya abi kpakuto i azoho kingiriwe yo gbiati ndukura ime. Ko arihe na ki mbiri ime ki ndu ka ra berewe. Maraika ki zingisi ko berewe rame yo ki ya: ‘Mo rihe. Si naida ome duadu tiro tipa gamo nunguro.’ Sidu, Eriya arihe berewe gbe. Fuoho, ko andu nunguro tipa aˈuru 40 gbiati ayuru 40 da kinaho ko ada ni Bagangara Orebe yo. Ho Eriya ada ni yo, ko andu ka ra rogo siimbia. Ono Yekova afura fuko. Ko aya: ‘Gine mo amangaha ane Eriya?’ Eriya ki karagapai ki ya: ‘AYisaraere amanganga pai kuti gu kidohe i akidoho foro te. I ima gbarasapa gamo ba motumo na ki imi gamo anebi. Awere i naida ka imo re a.’

Yekova aya fuko: ‘Mo ndu ka ru rii bagangara yo.’ Ni bambataha, bakere bayuge aya pati gu siimbia re. Tifuoho, bazigizo adu gbiati we. Ni yangaraha, Eriya agi zezeredi fugo boro. Ko adadi riko na gako roko na ki ru barangba gu siimbia re. Sidu, Yekova ki sanako tipa gu ndupai ko aora ti ni. Eriya aya ‘Mi nga gu yangara boro nye.’ Ono Yekova aya fuko wẽ: ‘Mo ni saro te. Aboro saba kutu kindi Yisaraere yo nairiso re. Mo ndu ki sia Erisa ko du ni nebi kuba ro.’ Nibasa, Eriya andu ka manga gupai Yekova agumbaha fuko. Ya mo mo nabihe nga Yekova rengbe ka undo ro ho mo amanga gupai ni ko aida mo mangihe? Ii, ko nika undo ro aundo. Ani wisigingo kurapai naamangi ti regbo ugure.