Ga Yekova Afarasi na Angbagidavura Nga ga We

Bakindo Suria nangia Benadada akakuti zubo aYisaraere navura. Ono gu nebi nangia Erisa anaafu zahe fu Bakindo aYisaraere ti aregbo dũ, si du ko arengbe ka bata ti ni. Sidu, Benadada adiberã ka zio Erisa. Ko agi gupai nga Erisa gudu rogo gu gbata nga Dotana, na ko akedi agu asekere nga ga aSurio i ndu ka zioko.

ASurio aye ku Dotana yo yuru. Fuo rago giri, ga Erisa moyambu akuru ku zegiyo ki bi gupai nga asekere ke gbata ake kirikiri. Bakere gunde aziko na ko ki tangbako nga: ‘Ginipai ani nika mangaha Erisa?’ Erisa ape gupai fuko nga: ‘Aguyo du na ani, i nge ti aguyo du na yo.’ Tigu regbo re, Yekova asa ga Erisa moyambu ko bi gupai nga agu abaagangara naadu pati gbata kirikiri si na afarasi gbiati angbagidavura nga ga we ra riihe yo dunduko.

Ho ga aSurio asekere aˈasadi ka zio Erisa ni, ko akpari nga: ‘Ako Yekova mo sayo ni airavurari.’ Nibasa, wa vura duhe nga agu asekere re aangera angera, i ainongo wari i du ni te. Erisa agumba gupai fuyo nga: ‘Oni rogo kura gbata kia. Oni pefuo re, mi nika ndu na oni fuo gu kumba oni agbata ko.’ I apefuo Erisa da ku Somorona yo, yo bakindo aYisaraere aaraka ni.

Fuoho, bangiri aSurio aza i ki ini wari i adu ni, ono ka gene adunga berewe beyo ya. Bakindo aYisaraere asana Erisa nga: ‘Si naida mi imi yo?’ Ya mo Erisa amangisunge na gipai re ni momu tipa ka nyasariipa agu aboro naaida ka imoko re? Oó. Erisa aya: ‘Ka mo imingo yo ya. Mo fu riahe fuyo na ki mbuyo i ga.’ Sidu, bakindo amangi bakere pumbo fuyo na ki mbuyo i ga ku kpuyo yo.