Esetere Abatasi Gari Aboro

Esetere angia paranga degude ni Yudo naraki rogo gu ga aParaso gbata nangia Susana. Dungu agarã kusayo, Nebukadenesara adi avunguri Yerusarema yo ki ga na yo koyo. Wiri gume bari nangia Morudekai nasonosi ri, ko angia moyambu nga ga gu Bakindo Paraso nangia Asuerose.

Bakindo Asuerose aaida na vovo nakindo. Gako amoyambu aye na wenewene adee naangba kisusi rogo gu ringara re, kodihe na Esetere. Dagba adee yo dunduko, bakindo asia Esetere ri du ni nakindo. Morudekai aya fu Esetere wẽ, ka ri ya penga ha nga ri nga Yudo ya.

Irarukö rimoko angia Amana angia barii abazogo dunduko. Ko aida aboro dunduko irisiko. Morudekai aaidanga ka mangaha te, Amana ki zingi ni kerehe ki idi ka imoko. Ho Amana ainihe ni ya Morudekai angia Yudo, ko akusi birĩ tipa ka imo aYudo dunduko rogo ringara. Ko aya fu bakindo wẽ: ‘Kere aboro gu du ho nga aYudo; si naida mo nyasiriipa yo.’ Asuerose ki ya: ‘Mo mangi kina gupai ngba tiro,’ na bakindo ki fu ome fuko ko rũ andiko. Amana arũ ndiko na ki ya fu aboro i imi aYudo rogo gu diwi nangia Adara ti rameru 13. Yekova aabi gipai re abi.

Esetere ainongo pai tipa gu ndiko re te. Morudekai akedi waraga gu ndiko re furi na ki ya: ‘Mo ndu ka fura na bakindo.’ Esetere ki ya: ‘Ka boro ndu ku barabangiri bakindo zanga ko yambu ni, i naimo ni kusayo. Bakindo ayambanga re tipa arame 30 awere te! Ono mi nika nduandu. Ka ko tai gako ngbondo fere, mi akpingo te. Ka ko amanganga ha wo ya, i nika imo re nibasa.’

Esetere andu fuo bakindo ku ngbanga yo. Ho bakindo abi ri ni, ko atai gako ngbondo furi. Ri andu fuko, ko ki sana ri nga: ‘Ginipai mo aida mi mangihe foro Esetere?’ Ri ki ya: ‘Mi naida ka yamba ro na Amana sa pumbo.’ Ho i aye ni tipa gu pumbo re, Esetere ayambu yo berewe sa gu kura pumbo. Ti regbo gu ue pumbo, bakindo asana ri berewe nga: ‘Ginipai mo aida mi mangihe foro?’ Ri aya: ‘Boro kinaho naida ka imo re na gimi aboro. Ako bakindo mo batasi rani.’ Bakindo ki sanahe nga: ‘Da naida ka imo ro?’ Ri ki ya: ‘Gi gbegberẽ kumba nga Amana re.’ Ngbadu Asuerose aimi ni kerehe ko ki ya i imi Amana nibasa.

Ono boro ho narengbe ka aria ga Amana ndiko te, zavura bakindo a te. Sidu, bakindo asia Morudekai ni barii abazogo na ki fu pagbia fuko ko rũ ndiko. Morudekai arũ ndiko naambugene fu aYudo i bandatiyo ka boro zubo yo. Rogo gu diwi nangia Adara ti rameru 13, aYudo adibe avurayo. Naatona ti gu regbo re ka ndu kumbatayo, i atona ka iriso gu uru re rogo agarã yo dũ.