Erizabeta Du na Vuse

Tingbafuo agarã 400 fuo i dua gu ndugu nga ga Yerusarema kubaha, gu boromotumo rimoko angia Zakaraya na diako araki mbembedi na gbata. I aima manga dungu agarã ku rogo rogatise ono zanga vunga gude. Rogo uru sa wa Zakaraya aazo guzuguzu fuõngua rogo ga Mbori kparakpara ba, maraika Gaburere akuru fuoko. Gunde ki zi Zakaraya ni kerehe, ono Gaburere ki ya: ‘Ka mo gundenga ya. Mi naye na wene pangbanga foro ngba Yekova. Diaro nga Erizabeta nika bataki kumbagude mo ki yambu rimoko nga Yoane. Yekova ima sia Yoane tipa kparakpara sunge.’ Zakaraya asanahe nga: ‘Mi nika ru wai ka ida kuti gupai mo agumbaha re? Mi na diare ima gbinza ki go ba vungu.’ Gaburere ki ya: ‘Mbori du nikedi re mi ye ka pe gi pangbanga re foro. Ono mbiko wa mo aidanga kuti gimi pai ya, mo afuranga berewe te daho i nika batika gu gude re ni.’

Zakaraya amaa ima ku rogo gu kparakpara ba re kisusi wai ko naima koyo mbata. Niyangaraha ho ko akuru ni ku zegi, agu aboro naadu zegi aaida ka ino gupai mangi. Ka gene adunga be Zakaraya ka fura ya. Ko aayaka apai ni kina beko. Aboro kini ru ka inoho nga Mbori ima fura fu Zakaraya.

Kusa, Erizabeta adu na vuse na ki batika kumbagude, kina wai maraika apehe. Anakureari na agumeri aye ka bi gude. I adu na bakere ngbarago. Erizabeta ki ya: ‘Rimoko nga Yoane.’ I ki ya: ‘Gumeroni ho du na gu rimo re rini te. Mo yambu rimoko nga Zakaraya wa ga Bako.’ Zakaraya ki kepai nga: ‘Rimoko nga Yoane.’ Ti gu regbo re nibasa, Zakaraya atona ka fura berewe! Pangbanga gu gude re ki gbandaka rogo Yuda naabaha, aboro kini bakibangiriyo nga: ‘Gini ngbatunga boro nika ngia gi gude re?’

Fuani, ziazia toro aye kurii Zakaraya. Ko ki pe sangbanebi nga: ‘I tambua Yekova. Ko akido Abarayama nga ko nika keda batasi, nga Masiya ko batasi rani. Yoane nika ngia nebi, na ko nika mbakada gene fu Masiya.’

Gu kura wenepai amangi a fu gume Erizabeta nangia Maria. Ani bingo ginipai nangiaha rogo gu kapita ngbefuo gere.