Yesu Ayugu Tiko fu Abaziatĩo

Fuo bete regbo tingbafuo Yesu yugu tiko fu amokedi, Petero adiberã ka ndu ka ba atĩo rogo gu Baime Nga Gariraya. Toma, Yakoba, Yoane, na kura bete abawiriki andu na ko. I aba atĩo rogo gu yuru re sasasa ono ka i aziongo tĩo kandara sa ya.

Fuo girarago kina boro wiso, i abi kumba ko naru pangba ime. Ko afura na yo pangba ime kubani ki ya: ‘Ya mo oni zingo atĩo?’ I ki ya fuko: “Oó!” Gu kumba re ki ya: “Oni bá pio ku kumbabe kurungba.” Ho i amangihe ni wo, pio ki hi be dungu atĩo ka i arengbanga ka gbehe kusayo ime yo ya. Nibasa, Yoane aye ka ino gupai nga Yesu du, ko ki ya: “Gbia du!” Nibasa Petero agu ku ime yo ki tona ka tawagia ku pangba ime yo. Gu kura abawiriki aape ko rogo kurungba.

Ho i ada ni pangba baime, i abi kpakuto gbiati atĩo ami ni fu we yo. Yesu ki ya fuyo i ye na bete kura atĩo i kodi ra na agura naafu we yo re. Fuani, ko ki ya fuyo: ‘Oni ye ka ri riahe.’

Ho i anyasi ri riahe ni, Yesu asana Petero nga: ‘Ya mo mo kpinyemure susi sunge zio atĩo?’ Petero ki ya: ‘Ii Gbia, mo ima inoho nga mi ima kpinyemuro.’ Yesu ki ya: ‘Sidu tie, mo rigi gimi akandoro.’ Yesu asana Petero berewe ki ya: ‘Petero, mo nakpinyemure?’ Petero ki ya: ‘Gbia mo ima inoho nga mi ima kpinyemuro.’ Yesu ki ya: “Mo nirígi gimi akandoro.” Yesu asanako berewe ni biataha. Rago ki gberẽ ti Petero ko ki ya: ‘Gbia mo ini apai dunduko; mo ini aina ya mi nakpinyemu ro.’ Yesu ki ya: “Mo nirigi gimi akandoro.” Sidu, ko aya fu Petero: “Mo nipéke re.”