I Akedi Pauro ku Roma Yo

Ga Pauro biata nunguro nga ga tungusapai adigi Yerusarema yo. Yo du i aziko ni ki ba ko ku bambukiso yo. Rogo yuguyugupai yo yuru, Yesu agumba gupai fuko nga: ‘Mo nika ndu ku Roma yo, ka tungusapai yo.’ I adi Pauro Yerusarema yo ku Kaisaria yo, yo du ko adi agarã ue ni ni zizi ko ku bambukiso yo. Ho i aasada Pauro ni rogo gu bapengbanga nga ga Gavana Feseto, Pauro aya: ‘Mi naida ka ndu ku Roma yo Kaisara saringbanga re yo.’ Feseto aya: “Mo nikpari fu Kaisara; mo andú koyo du Kaisara ni.” I amoi Pauro ku rogo gu bakurungba naandu ku Roma yo, na aKristano ue nangia Ruka na Arisitaruko andu wa sa na ko.

Ho i adu ni bangiri baime, kere gbegberẽ wege atona ka manga nga gu naima dia dungu arame. Aboro dunduko aberẽ gupai nga i nika kpi akpi. Ono Pauro aya: ‘Akumba, maraika nigumba gupai fere nga: “Ka mo gundenga ya Pauro. Mo nika da ada Roma yo, na agu aboro dunduko du na mo yo nika bata abata.” Oni du ngangarã! Ani akpingo te.’

Gu bavugumo re amangi tipa arame 14. Niyangaraha, i abi ugu sende. Si angia gu kisanga nga Merita. Bakurungba aoro auru ugu sende ki kuadi ruku, ono agu aboro naadu 276 kurungba yo ki bati dunduko. Gu kura aboro ata wagia, aguyo ki kakuti gu papara kurungba nakuadi si ki fu nayo ku pangba ime yo. Aboro Merita angerefuoyo na ki gindo we fuyo i faadi he.

Fuo adiwi biata kusa, asekere adi Pauro ku rogo gu kura kurungba ki ndu na ko ku Roma yo. Ho ko ada ni yo, awirina aye ka gbiako. Ho Pauro abi yo ni, ko atambua Yekova na ki ngarã. Wa vura duhe nga Pauro adu ni ziziboro, i ambuko ko ni tumo bambu kaa raka rogoho, na asekere kini bandako. Ko asungu yo tipa agarã ue. Aboro anaaye kaa biko na ko kini tungusipai fuyo tipa pa ga Mbori Kindo na kini yugupai fuyo tipa Yesu. Pauro akeke awaraga a fu agu adungurati naadu Asia Minor yo na Yuda yo. Yekova amangisunge nirengo na Pauro tipa ko gbandaka wene pangbanga fu arikaaboro dũ.