Gu Waraga Naye be Riigbu Bipasunge

Wene Awirina Nga Aidipase:

Wangia ani airisi Yekova, ani ima kpinyemu Fugoko nga Baibiri. Ani ima ida kuti gupai nga si na ndikidi apangbanga rogoho, wene arugapai tipa raka, na gu wene goapai nga ga Yekova nyemuse koyo du aboro ni nafu wasa ku kpotorani yo. (Atambuahe 119:105; Ruka 1:3; 1 Yoane 4:19) Ani nzunzu na nyemu ka undo aboro i wiriki gu wene arengo du rogo Fugo Mbori yo. Tipa ka manga gupai re, ani na bakere ngbarago ka kusa gu buku du riihe nga, Agu Apai Rengbe Mo ka Wirikaha Rogo Baibiri. Ani naida ka saka wiri bete apai furoni tipaha.

I mbakadi gi buku re gbe tipa rukutu agude. Ono tie, oni ima rengba ka mangasunge na ni a tipa ka undo gu sosono boro naida ka inopai tipa Baibiri. Na wa duhe nga Baibiri nga gu buku du tipa aboro dũ, kango ti ni te nga ani dunduko nika gbia undo ti fugö ani agu awirikapai du rogoho nga gu rengbe ka undo rani ani du na ngbarago.

Gi buku re namangasunge na agu apangbanga du rogo Baibiri ka fura tipa gu pangbanga nga ga aboro tona ti regbo kusaahe kaa ndu kumbatayo. Bakere asadatise ima manga tipa ka sa agu apangbanga nga ga Baibiri si du zukazuka na ni taataha ka giarogoyo kina wai si amangi.

Wa vura duhe wo, anga gi buku re nafura sa tipa kina agu apangbanga nga ga Baibiri te. Gu kekeapai gbiati asura du rogoho, i mbakadihe ngba gu gene nasa gu pangbanga nga ga Baibiri si du wa gupai namanga amanga na kini yugu kina boro gu bipai nangia ga agu aboro du payo rogoho.

Gi waraga re naundo rani ani bi wai du Baibiri ni gu buku du tipa aboro—aguyo nagisangba Yekova na aguyo naagianga ha ya. Na si na undo rani a ani wiriki apai ti gayo akpiapai. (ARomo 15:4; 1 AKorindo 10:6) Gi waraga re kparaka ku rogo apaparaha 14. Tonatona apaparaha dunduko na fugöpai rogoho tipa gu bete apai rengbe ani ka wirikaha.

Ka singia vungugude nga mo, mo ima rengba ka geda wirikapai na wiro na ki sakipai tipa agu asura du pati gu wirikapai re. Fuani, mo na wiro rengbe ka geda gu papara Baibiri du mburu gu wirikapai re rogoho. Mo undo wiro u ini gu ngbanya du dagba gupai u agedaha rogo Baibiri na gu wirikapai du rogo buku. Mo ima rengba ka manga kina gu bangisapai re a ho mo aundo gu boro ni naima sona tipa ni ini bete apai tipa gu pangbanga nga ga Baibiri.

Ani namaabangirani nga gi waraga re nika undo agu aboro aundo du na ruru ngbaduyo yo—parangayo na gu sosonoyo—i wirikipai rogo Fugo Mbori yo, na kini mangipai kuti agu awirikapai du rogo gi buku re rogo gayo raka yo. Ni sangbana gipai re, i ima rengba kaa irisoko a ni papara gako aborokporo.