Gu Woro Kundi Nasa Ngbarago ti Mbori

I aringbisipa woro kundi ya si nga “gu bakurupai kisusi na ni ndikidi sino aboro dagba bawene birĩ mangaapai dunduko.” Wa kina fugo, si nga gu baiiriwopa gamahe nakpara aboro ti anyaa. Woro kundi nafõngbadu boro yo. Si rengbe ka ngba tue yo, ka nye ku berã boro yo tipa gbanga regbo. Kurii apai dunduko, woro kundi rengbe ka sa ngbarago ti Mbori.

A WA Baibiri ayugoho, aYisaraere angia abataki kundi. Taka kundi angia “bangua birĩ mangapai ti agu aregbo i ake Baibiri,” wogu gu buku nga Unger’s Bible Dictionary apehe. Ni papara agu apai i anamangaha na auru dunduko rogo gayo raka, bika abia na taka akundi anidu rogo gayo irisombori. Ono fugo aboro i anamangasunge nani rogo bika abia kisusi mangasunge na aworo kundi.

Bakindo Davide asia aboro dagba angbatunga Revi “ku ri sunge pa bibia” banye yo, mbata fu kpara yo gu yekaru wiriko, nangia Soromo, aduaha. (1 Pekapai 6:31, 32) Ho sanduki mokido, nga gu naarukuba padu Yekova ho, ada ni Yerusarema yo, Davide ambakadipai tipa bete aRevi ‘naatingidapa apai na kaa fu irisa fu Yekova na kaa tambua ko.’ I anakoda gayo afugo sambuahe kuti woro “akindondo na anzenze . . . na gu sirigi napaa apaa ku ari, . . . nivudi ambanya.” Agi akumba re “i asia [yo] . . . ti rimoyo . . . [i ni fu] atambuahe fu Yekova, bambiko gako weneringise nye anye kindi.”—1 Pekapai 16:4-6, 41; 25:1.

Gu fugöpai nga “[ga Yekova] weneringise nye anye kindi” nakura bara dunguhe rogo Atambuahe yo, nga gu buku nga ga Baibiri duna pa aworo kundi rogo gbe. Ni kpiapai, si nga gu fugöpai du rogo ue papara agu averesi 26 nibasasa du rogo Atambuahe 136. “Paduhe ni guruhe nasaha ngba aboro iniditihe,” wogu wene bawirikipai sa nga ga Baibiri ko agumbaha. “Agu aboro dunduko nanigihe, anirengbe kaa tingidaha.”

Gu kekeapai du barii agu akapita nga ga Atambuahe (rogo NW ) nayugopa bakere mangasunge na woro akundi. Atambuahe 150 nafura tipa nambongo, nzenze, gaza, mbaya, na gu sirigi napaa apaa kodihe na gu kura agire nga ga akundi. Si ki vura du wo, nyakasapai adu tipa fugo aboro rogo bika abia. Veresi 6 nangarasa rani niyaa: “Agu ahe dunduko du na omeonga ti ni si nitámbua Yekova! Oni támbua Yekova!”

Wa duhe nga woro kundi nayugo agu apai du ngbadurani yo, agu aberã nga ga rungo nga gu nadu ti agu aregbo i ake Baibiri anasa aboro sa bika abia kpee watadu afugo nunga. Ono tie, gi ngbatunga abia re adu gbua ni kina betehe rogo agu abia nadu rogo gu aworo kundi nangia ga aYisaraere. “Kinaho sa i anabika abia kpe na abia kpenunga ni gu ngbatungaha nga bika afugo nunga aningba ni susi aworo kundi watadu dodoroma ikida aworo kundi na susi gu nyakasapai a nanidu tipa ndikidi afugo aboro nga ga ngbaa,” wogu gu buku duna yugobaraapai rogo tipa agu apai du Baibiri yo du rimoho nga Duna Dudungurobipai Tipa Kekeapai apehe.a

Yesu na gako ruru amokedi abiki abia nga ga sambua Yekova rogo gu yuru nadu mbata fu kpio Yesu, zanga kapa, fugoyo kini poi dodoromaa na gu fugo Atambuahe Nasambua rimo Yekova. (Atambuahe 113-118) Na iriwo wai gere avura anyakasa ga Yesu abawiriki tipa i ngbisi kpio Bairayo zanga gunde! Kurii gure, gayo diaberã ka nye ni ruru amoyambu nga ga Bakere Bakindo nga ga haurago ko, nga Yekova, avura kio wa i afugö gu papara bia nga “bambiko gako weneringise nye anye kindi!”—Atambuahe 118:1-4, 29.

Gu bambata aKristano nadu Efesa yo na Korosai yo anabika “abia tambuahe . . . na abia wasa [fu Mbori]” (si nzunzu nga i anabika “abia sambuahe fu Mbori”). I anagbia agu ‘abia nga ga toro’ ku pati gere, nga gu i anabikaha ngbaduyo yo. (AEfeso 5:19; AKorosaio 3:16) Rogo bia na rogo fugoyo, i anamangasunge na angbayo rogo gu gene daada tipa ka yugo gayo tambuahe. Anga Yesu aima gumba gupai nga “ngba boro nagumba gu pai du kpotoni yo” tee?—Matayo 12:34.

Gu Woro Kundi Nasa Gberarago ti Mbori

Anga agu aworo kundi dunduko gumba yo paha Baibiri yo nanasa ngbarago ti Mbori te. Oni makianga gupai namangi pavuru Bagangara Sinai yo, yo Mose aadia Ndika ni be Mbori, kodihe na Arugute Bawe. Ho Mose azoro ni rii bagangara yo, ginihe ko agi woroho? “A nga si wa fugo agu yo nadia sima [“anga si ni woro agu abia i abikaha mbiko pa manga iiriwo mangapai,” NW ] te,” “watadu fugo agu yo napaa mbiko dia yo be yo a te,” ono “mi nagia ha wa fugo agu yo nabi [kura, NW ] bia.” Gere angia gu bia nadu na pai dagbaha na iriso kpiahe, nga gu mangapai naba gberarago ti Mbori na sangbanaha kingia kpio aboro wa 3,000 nga aguyo nabi gu bia re.—Gate 32:18, 25-28.

Wa vura duhe nga aboro rengbe ka mbakada woro kundi, kini taha, na kini gbia ngbarago be ngbatunga aworo kundi dunduko, anga sangbanaha nga si dunduko nasa ngbarago ti Mbori te. Tipagine adungaha tini wo ya? Gu Kristano ni mokedi nga Pauro nasakarogoyo ya: “Aboro aingi ainga dũ, ki ti bungudu ti ga Mbori taarimo.” (ARomo 3:23) Gu riiapai du wa gu nga gu vugaahe nga ga apagano tipa pa zugo ahe, gu yugopai nga mbisimo boro ni guhe akpinga ya, na pa iriso Maria ni “na Mbori” ni gu riiapai i arimisoho dedede kurogo woro abia yo. Ono tie, agi aida gbiati mangapai re afunga irisa fu gu Mbori nga ga rengo ko te, mbiko si kia ti gupai duni yuguyuguhe rogo Fugo ko yo nga Baibiri, nga gu naye be toro.—Pa Fu Rugute ni Ue he 18:10-12; Yezekere 18:4; Ruka 1:35, 38.

Siaka Aworo Kundi Nitatamana

Si ni kpakarakpakarapai ka sia woro kundi dagba gu duku ho. I ambakadi gu kekeapai du ti kpoto compact discs tipa si sa aboro i ngbeke ngbatunga agu aworo kundi dunduko du rogo. Ono ka gu boro nga bairisi Mbori aida ka sa ngbarago ti Ko, si aida ni duna rubangirise na ki sia woro kundi nitatamana tipa ka ne agu abia na agu aworo kundi naye be agu aida nga ga zire pambori watadu gu nadungura berã sa wasiwasi kodaba gbiati sangbaatoro.

Albert, nga gu ko namangisunge mbata ni ga aKristano mokedi Afrika yo, idi gupai nga mamu adu beko gbua tooni ka ta piano yo. Ono tie, ko anadega tuko kuti gu bete dede abia nga ga fonoo nga gu ko adihe na ko. Ringara kpuyo yo, Albert nata awere kaa biko adungurati nga ga aKristano ni gu babipai naata ata. Regbo beko tipa dega tuko kuti woro kundi gbua ni kina betehe. “Gu bayango ngbaa tire gbe nga Beethoven,” wogu ko agumbaha. “Vuru agu agarã susi, mi adungura gu gako aworo kundi i akekehe tipa ataki woro ahe nitaki woro ho, gu woro kundi i akekehe tipa i taha na bangisa kundi watadu ka taha na piano, gu woro kundi duna apaparaha biata watadu biama, na gu woro kundi i akekehe tipa ka taha na akundi biama watadu abayango biama bihe.” Sidu, dega ko tuko kuti gi woro kundi re afu bakere ngbarago fuko. Rengo ngaha, aboro nibasasa naida aworo kundi nibakiakia, ono ni aKristano, ani namaa gu ga Pauro rugute ku berãrani yo nga: “Watadu ri he tie, na mbira he, na gu pai oni ka manga ha dunduko, oni mángi he dunduko sa taasa rimo Mbori.”—1 AKorindo 10:31.

Woro Kundi Gbiati Kparatise Sani

Gu bambata he Susie akpinyemuhe gbe angia woro kundi. “Mi atona kaa ta piano ho garãre aduni 6, na gu kundi du wa gitara na girihe biama ho garãre aduni 10, na nzenze [kundi du wa sagiiru] ho garãre aduni 12,” wogu ri apehe. Kusa, Susie arimi gu ba wirikapai nga Royal College of Music du London, England yo, tipa ka wirika ta nzenze. Ri awirikipai yo tipa agarã biama be gu nataki nzenze nangia boro Spain nangia guri aboro dunduko aini ri na ri ki di gu kura garã kurogo gu bakere sukuru nga Paris Conservatoire, i kini fu agu awaraga fu ri nga honors degree nga gu natambua rimori tipa ino taka kundi wa sa na diplomas ni dezirepai tipa ino ri taka nzenze na ta piano.

Susie atona kaa koda tiri kuti gu dungurati nga ga aDezire Yekova nga gu du London yo. Yo ngaha re ri abi ndikidi nyemuse ni dagba aDezire. Tooni tooni, gari nyemuse tipa Yekova aasona, na gari ngara tipa gako sunge ki fõngbaduriyo tipa ri gbata agene ka mangasunge ko. Gere andu na ri kpara gari raka na ki zi bapatiza. “Taka woro kundi ni ga boro sunge nga gu gene raka boro nakpara tini sani, sidu gu raka nga ga kparatise angianga vovopai fere te,” wogu Susie apehe. Gari regbo tipa taka kundi kporo agbere azogora wa ri arimisi tiri kurogo gu sunge nga ga aKristano tipa tungusa gu wene pangbanga nga ga ga Mbori Kindo ni giasangba ga Yesu arugute.—Matayo 24:14; Marako 13:10.

Awere tie wa du ri na kina bete regbo gbua beri ka ta woro ahe, waigu ri aberã? Ri nayaa: “Rago naagbera agbera tire ti kura aregbo mbiko mi na bakere regbo be re kaa takaha te, . . . ono mi nataka gimi woro ahe kindi na kini gbia gbarago be woroho. Woro kundi nga gamunihe be Yekova. Mi nagbia ngbarago behe awere kisusi mbiko wa mi namoi gako sunge mbata rogo gimi raka.”—Matayo 6:33.

Gu Woro Kundi Nasambua Mbori

Albert na Susie wa sa na gu kura aDezire Yekova du bange yo mbembedii wa amirioni sita nasambua Yekova Mbori dedede na aworo kundi. Pati agu adunguratise nga ga aKristano nga gu i amangaha tii Abambu Kindo yo rogo aringara 234, ho rengbehe ni, i natona gayo adunguratise na kini digisihe na bika abia fu Yekova. Rogo kikindigi aworo kundi na rogo gu rukutuhe, i nataka gu bawene dodoroma abia fu Yekova Mbori du mburu afugoho rii Kekeapai.

Agu aboro dunduko du pati agu adunguratise re natumba fugoyo kuari ka bika bia dodoromaa ni sambua Yekova ni gu Mbori nangerafuo aboro (Bia 44). I nabika abia tambuahe fu Yekova (Bia 190). Gayo abia nafura tipa agu angbarago gbiati atindiro nga ga aKristano wa du yo ni awirina, gu raka nga ga aKristano, na agu asino nga ga aKristano. Gu nakiiso gayo ngbarago nga gu gene bika abia nibakiakia aDezire amangihe Asia yo, Australia yo, Putu yo, na Amerika ku Nodiyo na ku Sudiyo ho i aambakada agu abia ni re.b

Tonatona afugo gu bakere bia tambuahe nga gu i akehe ti gu regbo nangia ga bake Atambuahe nayaa: “Oni bí vovo bia fu Yekova; oni bi abia fu Yekova zegino dunduko! Oni bí abia fu Yekova, ki sambua rimoko.” “Oni yúgu pa gako bata na uru na auru. Oni táki pande pa gako taarimo dagba arikaaboro, na pa gako iiriwo mangaapai dagba aboro dunduko!” (Atambuahe 96:1-3) Gere nga gupai aDezire Yekova amangaha rogo gaoni dagbarago, na i nayamba roni oni ye ka koda tironi na yo rogo bika agi abia tambuahe re. I adia roni kugume tii gayo Abambu Kindo yo, yo rengbe oni ka wirika wai ni ka sambua Yekova na agu aworo kundi nga gu nafu ngbarago fuko.

[Gu rukutu kekeapai du bandu kpewaraga yo]

[Gu kpiahe du ti kpewaraga 20]

Bika abia tambuahe fu Yekova