Oni Na Gu Toro Tironi Kaa Kpinga Ya?

“ZIAZIA Kekeapai dunduko . . . aye be ga Mbori Toro si ki rengbe tipa yugopai, tipa zapai, tipa ruga boro, na tipa raba aboro rogo rurupai,” wogu gu mokedi nangia Pauro akepai. (2 Timoteo 3:16) Ii, Ziazia Kekeapai nga buku nga ga rengo, nga gu naye be ndikidi Mbori, nga Yekova.—Atambuahe 83:18.

Wa du Yekova nga Bakusiahe dunduko, gbiakuti rani nga aboro a, ko ima ino gupai wenengai namanga rani ho ani akpiko ni. (AEbere 3:4; Yugoti 4:11) Na rogo Fugo ko nga Ziazia Kekeapai nga gu gako toro adu kugiipa kehe, ko ima fu ruru akaragapai fu rani tipa agu asanahe du tipa raka fuo kpio.

Gine Nga Toro?

Gu fugo i asaha rogo Ziazia Kekeapai nga “toro,” bambata rogoyo nga “onga.” Ono anga gere gbua nga gu onga boro nita gbida wege kini kusihe te, si nakoda dungu apai. Ni kpiapai, gu bake Ziazia Kekeapai nangia Yakoba ayaa: “Ka kpotose du zanga toro si du ni kpikpi he.” (Yakoba 2:26) Sidu, toro nga guhe nasa kpoto boro si duni ungaha.

Gi ome nasa kpoto boro si duni ungaha re, si arengbanga gbua ka du nga gu onga, watadu gu wege, narimo kurogo ga boro pusa te. Tipagine adunga ha tini wo ya? Bambiko ho onga boro aru ni, unga nanye kindi rogo misimisi apa kpoto ni tipa bete regbo, tipa “bete aminiti,” kuti sangba gu buku nga The World Book Encyclopedia. Mbiko gipai re, amonganga rengbe arengba ka duna diabese rogo gu asadatise i amangaha ka zingisa gu boro re. Ono fuo gu ome unga re mbu mangasunge kindi tii kpoto boro yo, gu asadatise dunduko i amangaha tipa ka zingisa gu boro re nga kina ku dogatise. Anga bakio onga ho rogo zegino rengbe ka sa kandara tooni pani sa si duni ungaha te. Sidu tie, toro nga gu ome unga du rogo boro yo, nga gu ka i abingo ho ya, si nasa rukutu apa boro si duni ungaha na kini sa boro ni duni unga ni. Onga nasongoda gi ome unga re.—Eyobo 34:14, 15.

Ya mo gu toro re namangasunge sa kina rogo aboro yo? Ziazia Kekeapai naundo rani ani duna ruru berã tipa gipai re. Gu tatamanatatamana Bakindo nangia Soromo aidi gupai nga, “onga ti yo na gaami kina sa,” ono ko asanahe ki ya: “Da ini pa toro boro nga si naga ku ari yo, na pa toro nya si naga ku sende yo?” (Batungusipai 3:19-21) Sidu, toro ti anyaa ki du ti aboro a. Waigu rengbe gure ka du wo?

I rengbe ka ringbisa toro, watadu ome unga kuti gu ome nasa masegera si mangisunge. Gu ome nga ga awirimbia nasa kasete si nike, kini sa woro kundi si nipoi, na kini sa we si ki ti vuro masegera ho woro kundi apaa ni. Ho i anora gu bangirihe ni nasa masegera ka si furanga ya, gu ome naye be awirimbia nakata ti kasete, we ki bisi, ka kasete akenga berewe ya, na woro kundi ki ongo. I abingo gu ome nasa kasete si nimangisunge te. Gu ome du rogo awirimbia arengbanga ka duna agu asino tini nga ga masegera watadu ka manga gu sunge si amangaha te. Teketeke a, ome unga na asino tini nga ga gu ungahe si afu unga fuhe te. Si gbua wa kina gu ome nasa masegera si nimangisunge. Ome unga nga boro te, si aberãnga pai a te. “Onga ti yo [ti aboro] na gaami [ga anyaa] kina sa.” (Batungusipai 3:19) Sidu ho boro akpi ni, toro ni andunga kindi kumbatayo rogo kura ngbii te.

Ginipai tie du tipa akpikpiyo? Na ginipai namanga toro ho boro akpi ni?

“Kina ku Nvutu yo Mo Ka Karaga Tiro ku Ho Ni”

Ho gu bambata kumba nangia Adamu ataino aino ni kini basa ga Mbori rugute, Mbori ayaa fuko: “Mo arí riahe mbiko kina gu randimo nikakura kpakpuro yo daho mo ka káraga tiro ni ku sende yo, bambiko mi adi ro kina rogo ho; mbiko mo nga kina nvutu, kina ku nvutu yo mo ka karaga tiro ku ho ni.” (Bambata Pai 3:19) Wari Adamu adu ni mbata fu Yekova mbakadi ko rogo sende yo? Oni ngere, ko adunga tini te! Ko adunga ni unga ko te. Sidu ho Yekova Mbori agumba gupai ni fu Adamu nga ko ‘akaraga tiko ku nvutu yo,’ ko aduna gu berã nga Adamu nika kpi na ki sa tiko ni agu aũsende i ambakadi ko rogo. Si aadunga nga Adamu nika ga kurogo gu ngbii nga ga atoro te. Si adu nga ho Adamu nika kpi ni, ko adunga tini te, a wa kina gu ko adunga tini mbata fu Mbori kusi ko ya. Gako mbusa angia kpio, nga zanga unga, angianga gate kurogo kura ngbii ya.—ARomo 6:23.

Ginipai tipa gu kura aboro nga aguyo naima kpiko? I nayugo gupai ziazia du tipa akpikpiyo rogo Batungusipai 9:5, 10, yo ani ageda gupai ni nga: “Gu kpikpiyo ainonga pai te . . . Ora fuo apai, sogimapai, inohe watadu tatamana, muro yo te.” (Moffatt) Sidu tie, kpio nga zanga unga. Bake Atambuahe akepai tipa boro ya ho ni akpi ni, “ongani [toroni, NW ] niguari . . . ni ki karaga tini ku rogo gani sende; ti kina gu uru re gani berã pa apai ki nyasi.”—Atambuahe 146:4.

Nirengo, akpikpiyo ni unga yo te. I arengbanga ka ino wiripai te. Ka i bingo roni te, ka i ginga fugo roni te, ka i furanga na oni a te. I arengbanga ka undo roni watadu ka imisa roni te. Sidu tie, si aidanga oni gunde be akpikpiyo te. Ono waigu duhe nga toro “niguari” ti boro ho ni akpi ni?

Toro “ki Ga Koyo Du Mbori Ni”

Ziazia Kekeapai nagumba gupai nga ho boro akpi ni, “toro . . . [na]ga koyo du Mbori ni nafu boro.” (Batungusipai 12:7) Ya mo gure nayugo gupai nga ndikidi toro naga rogo wege da ku barabangiri Mbori? Wa gu sa te! Gu gene Ziazia Kekeapai amangasunge rogo na gu fugo nga ‘karagatise,’ si ayugonga pa ndikidi guari rogo rago ka ndu kurogo kura rago te. Ni kpiapai, Yekova ayaa fu iraira aYisaraere wee: “ ‘Oni káraga tironi kono du mi ni, mi ki karaga tire koyo du oni ni a, wo poi Yekova nga ga arimbasa ko.” (Maraki 3:7) Pa “karaga” aYisaraere tiyo koyo du Yekova ni aayugo gupai nga, i mbu gayo gbegbere apai na kini raki berewe ringbisihe kuti gako ruru gene. Na pa “karaga” Yekova tiko koyo du aYisaraere ni ayugu gupai nga, ko nika tona berãpa gako aboro berewe wenengai. Rogo agi apai dunduko du ue re, pa ‘karagatise’ aida mangapai rogo berã, angianga pa guari rogo ndikidi ba ka ndu kurogo kura ba ya.

Teketeke a, toro aguaringa rogo ndikidi gene auru kpotosende ka ‘ga’ kurogo gu ngbii nga ga ngbangbaturũ ku barabangiri Mbori te. Fuo ome unga kuru kusayo kindi rogo boro yo, kina Mbori sa duna ome tiko ka karagaha berewe kurogo ni yo. Sidu, ‘toro nakaraga tihe koyo du ndikidi Mbori ni’ rogo gu gene nga, gu maabangirise dunduko du tipa ga gu boro raka re kumbatayo, si dunduko awere kina kube Mbori.

Ni kpiapai, oni wisiginga gupai Ziazia Kekeapai apehe tipa kpio Yesu Kristo. Gu bake Wene Pangbanga nga Ruka nayaa: ‘Ho Yesu apoi ni ku ari ni bakere fugo, ko ki ya, “Buba, mi fu torore ku bero!” Ho ko agumba gi ni re, ko ki fu toroko.’ (Ruka 23:46) Ho toro Yesu akuru ni kusayo rogo ko yo, ko aaguaringa ka ndu nibasa ku ngbangbaturũ yo te. I azingisanga Yesu bekpio te daa kina rogo biata uru, na berewe, ko aga ku ngbangbaturũ yo kina fuo arame 40. (Amokedi 1:3, 9) Ono ti rago kpio ko, Yesu ambu toroko kube Bako, ki duna kido kuti ga Yekova tandu tipa zingisa ko berewe bekpio.

Ii, Mbori rengbe arengba ka sa boro ni du berewe ni unga ni. (Atambuahe 104:30) Nga gu wene maabangirise gere afuhe fu rani!

Ndikidi Maabangirise

Ziazia Kekeapai nayaa: “Ragoho nada, ho agu yo ka gia fugoko ni [fugo Yesu] dunduko du rogo amurã yo [“du rogo amura nga ga tingidapase,” NW ], ki kuru.” (Yoane 5:28, 29) Ii, Yesu Kristo afu gu mokido nga, agu aboro dunduko Yekova nika tingida payo, ko azingisa yo azingisa bekpio, watadu ko akaraga yo akaraga berewe i du ni unga yo. Gu ga Yekova amoyambu nanamanga rurupai ho i aduni ni unga yo, i adu dagba aguyo i ka zingisa yo re. Ono badungu aboro gu duho nakpiki zanga i yuguhe singia ka i arengbe ka manga ga Mbori ruru andiko. Si rengbe ka du nga, i adunga na inohe tipa agu apai Yekova akpinyemuhe te, watadu i adunga na regbo beyo wenengai tipa ka aria gayo gene raka te. Mbori natingidapa ngbatunga agu aboro re atingida na ko azingisa yo azingisa bekpio, mbiko Ziazia Kekeapai nayaa: “Ruru aboro azinga [azinga] be kpio na iraira yo a.”—Amokedi 24:15.

Arame, kpotosende hi be sogote na vura, kere mangaapai na uka kure, birikosi arago na akaza. Kangia i nika zingisa akpikpiyo kurii kpotosende wa gure, gu ngbatunga ngbarago dunduko ka i gbiaha, si du nirengo ni kina guruhe. Ono Bakusiahe ima fu mokido ya mbembedii kumbatayo, ko nika digiso gu gbegbere zegino Satana Bakitingbanga angera kuriihe re. (Asanza 2:21, 22; Daniere 2:44; 1 Yoane 5:19) Fuo gure, vovo riko aboro, nga “vovo kpotosende” ki diba gu gbegbere zegino re.—2 Petero 3:13.

Ti gu regbo re, “a nga boro kporo sa ayá, ‘Mi nawoka’ te.” (Yesaya 33:24) Zavura gu egetera naye be kpio Mbori adiaha adia kusayo, mbiko ko “awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.” (Yugoti 21:4) Nga gu wene maabangirise tipa aguyo du rogo ‘amura nga ga tingidapase’!

Ho Yekova nika dia gbegbere apai ni kusayo auru kpotosende, ko agbarasanga wene aboro na gbegbere aboro wa sa te. (Atambuahe 37:10, 11; 145:20) Nirengo, “bakere rimbasa aboro” dagba “rika aboro dunduko, na angbatunga yo, na aboro, na angbatunga afugo dunduko” abata be “bakere gberãngbi,” nga gu nika gbarasa gi gbegbere zegino re. (Yugoti 7:9-14) Sidu, bakere rimbasa aboro adu kinaho ka dia akpikpiyo kugume.

Oni na nyemu gupai kakaka nga ka bi agu aboro berewe oni akpinyemu yo? Oni naida ka raka nyeanye kindi rogo Paradiso auru kpotosendee? Ka si du wo, oni du wa ka oni gbia ruru inohe tipa gupai Mbori akpinyemuhe na tipa gako ringbisaapai. (Yoane 17:3) Gupai Yekova akpinyemuhe nga, “aboro bati dunduko, ki ye sa gu [ruru, NW ] inahe nga ga rengo”—1 Timoteo 2:3, 4.

[Gu kpiaahe du ti kpewaraga 29-32]

“Mo nga kina nvutu, kina ku nvutu yo mo ka karaga tiro ku ho ni”

I rengbe ka ringbisa toro kuti gu ome nasa amasini si nimangisunge

Zingabekpio afu nyenye ngbarago