Wai Rengbe gu Zereda nga ga Kristo ka Zoga Kpotoroni Yo?

“Oni ídi he fu ga Kristo zereda si zogo kpotoroni yo, nga gu pai i ayambu roni sa ni rogo boro sa.”—AKOROSAIO 3:15.

1, 2. Rogo gini gene “ga Kristo zereda” azoga kpoto Kristano yo?

DUNGU aboro nasoga gu fugo nga ka zoga aboro watadu ka zoga he, mbiko giaha nasa yo i tingidipa wai aboro naazoga akurayo ngba ome na kini mangi yo gbegberee. Gu ga Pauro rugute ko afuhe fu agu aKristano nadu Korosai yo rengbe ka wira gupai arunga bangiri kura aboro ya. Gu rugute re nayaa: “Oni ídi he fu ga Kristo zereda si zogo kpotoroni yo.” (AKorosaio 3:15) Anga ani na ranirii tipa ka sia agu apai ani aida ka mangaha tee? Tipagine tie rengbe ani tini ka mbu he watadu ka mbu boro ni zogo kpotorani yo?

² Pauro aagumbanga gupai fu aKorosaio nga i mbu gayo ranirii nga ga siapai te. Gu pa-Giriki i asaha rogo AKorosaio 3:15 nga ka ‘zoga,’ si na pagume dagbaha na gu fugo i anayamba bangere kurii abaangira nani, nga guni nanafu mosoro ti agu aregbo re tipa ngbatunga agu abaangira re. Agu arugute nadu tipa agu abaangira re anafu bete ranirii fu abamangihe, ono ni yangaraha, bangere kurii mbaro abaangira nanayugo gu boro irisi agu arugute wenengai du tipa ngi gu mbaro re na ki zoho. Teketeke a, ani na ranirii ka diaberã tipa dungu apai rogo gaani raka yo, ono wa ani kaa mangaha wo, si naida dedede gu zereda nga ga Kristo ‘ningere kuri rani,’ watadu kuti sangba gu basafugo nga Edgar Johnson Goodspeed, si “duni gu rugute nazoga” kpotorani yo.

3. “Ga Kristo zereda” nga gine?

³ “Ga Kristo zereda” nga gine? Si nga gu pazereda ani agbiaha kpotorani yo ho ani adani ni ga Yesu abawiriki ki ini gupai nga Yekova Mbori na Wiriko ima ida na gaani pai. Ho Yesu ambedi ni ka guari pati gako abawiriki, ko agumba gupai fuyo nga: “Gi zereda mi afu fu roni. . . . Ka oni rúngo nga kpotoroni yo ya, ka oni gúnde nga a ya.” (Yoane 14:27) Tipa agarã awere mbembedii wa 2,000, gu yangara ruru mbedimbediyo nga kpoto Kristo naagbia ngbarago be gu zereda re, na areme, agu abakurea yo nga ‘kura avusende’ nagbia ngbarago be gu zereda re a. (Yoane 10:16) Si naida gu zereda re du nga guhe nazoga kpotorani yo. Ho du ani ni rogo kere asada, si rengbe ka undo rani ka gbudagbuda zinga rani watadu pai kini fudi rani susi ya. Ani bingo wai rengbe gipai re ka du wo ho bi ani gupai ni nga i mangi fu rani ngba iraira gene, watadu ho du ani ni na bakabangirise, watadu ho ani abi tirani ni nga ani arẽnga tipa manga ga Mbori sunge te.

Ho I Amanga Ni fu Rani Ngba Iraira Gene

4. (a) Waigu Yesu ainidi tiko na iraira sarangbanga? (b) Wa aKristano ni vura du ni agu aboro i amanga fuyo ngba iraira gene, gayo karagapai ningia gine?

⁴ Bakindo Soromo abi gupai nga: “Boro nidu ni . . . gbia ku ri kura ni ka imisa ni.” (Batungusipai 8:9) Yesu aima ino ya agu afugo re nga rengo. Ho ko aduni ngbangbaturũ yo, ko aima bi gu iraira apai aboro aamanga akurayo nani. Ho ko aduni auru kpotosende ki vura du ni gu kumba naamanganga ingapai ya, ko arungo be iraira sarangbanga ho i akiti ngbaanga ko ni ya ko agbere ngbako yo fu Mbori na i ki imi ko wa bakuo ndiko. (Matayo 26:63-66; Marako 15:27) Areme, iraira sarangbanga ima maapai rogo arago dunduko, sidu ndikidi aKristano arungo kisusi kura aboro, ki du ni agu ‘aboro rikaaboro dunduko asoga yo.’ (Matayo 24:9) Avurũ, wa gu imo aboro namangi rogo abataya zizi aboro rogo gu zogarago nga ga aboro Nazi (Germani yo) avura du, na gu kere apai namangi rogo gu ba mbusa nga ga aboro Soviet ki vura du, na wa rimbasa aboro avura nitaki yo, wa aboro avura ni kitingbaanga yo ni ziree, kini zubo yo zanga nduhe, gu zereda nga ga Kristo abanda yo kindi i du nyanyakii. I awiriki Yesu, nga guko ani ageda gupai tipa ko nga: “Ho i agberã ngbayo yo ni fu ko, ko agberã nga ngbako yo fu yo te; ho ko aima ni, ko aserã nga yo a te, ono ko afu tiko ku be gu ko nasapa ngbanga nzunzu.”—1 Petero 2:23.

5. Ho ani agiapa pai ni rogo dungurati nga gu nawira si nga iraira sarangbanga, ginipai si aida ani wisigihe?

⁵ Ani rengbe arengba ka berã gupai kandara tooni nga i saringbanga fu rani ni irairaha rogo gu dungurati nga ga aKristano. Rogo ngbatunga pai wa gure, ani rengbe ka berã wa Pauro, nga guko nayaa: “Da i amangi ni ni koto, ka ngbadure aima nga ya?” (2 AKorindo 11:29) Ginipai rengbe ani ka mangaha? Si naida ani sana tirani nga, ‘Ya mo iraira sarangbanga du nirengo?’ Dedede, ani naainonga gu futufutu apai dunduko du tipa pai te. Ani rengbe kaa mangapai nyanyakii fuo dega ani turani kuti fugo gu boro nagumba gupai nga ni ini gu gbugbu apai dunduko namangi. Ono Ziazia Kekeapai nagumba gupai nga: “Zangainahe naida pa apai aida dũ.” (Asanza 14:15) Sidu, si naida ani duna rubangirise.

6. Waigu rengbe ani ka karagapai sa gu mangapai nawira si nga irairapai rogo dungurati?

⁶ Ginipai ka mangi, ka si du nga kina boro ani mangi yo rani ngba iraira gene? Ginipai ka gu boro mangihe duna ga Kristo zereda kpotoni yo? Ani rengbe ka bi gupai nga si naida ani fura na gu boro ani aberãha ya ni mangi ingapai kuti rani. Fuo gure, kuba gupai nga ani saki gupai re na gu boro nika degatuni, tipagine ka ani ambunga gupai re tini kube Yekova rogo kparakpee ki duna kido nga ruru sarangbanga amanga amanga ya? (Atambuahe 9:10; Asanza 3:5) Si rengbe ka manga nga fuo mbu ani gupai re kube ko, ani aduna ngbarago ka nyasa gupai re ngbadurani yo na ani ‘ki ongo.’ (Atambuahe 4:4) Rogo dungu apai, si naida ani mangi ga Pauro rugute: “[Oni] nihi pai fu akuaroni, nivu akuaroni, ka pai du bangiri gu boro kuti kura ni; wa Gbia avu roni, kina wo oni ka manga.”—AKorosaio 3:13.

7. Ginipai si aida dedede ani tingidihe rogo gaani manga apai na awirina?

⁷ Ono tie, rogo agu apai dunduko ani amangaha, si naida ani tingidi gupai nga, wa vura duhe nga ani arengbanga ka duna ome kurii gupai ima manga tee, ani rengbe arengba ka duna ome kurii gaani karagapai sa gupai re. Ka ani karagapai gbegberee sa gupai nawira si nga iraira mangapai, gure rengbe ka gbarasapa gaani zereda susi gu ye be gu iraira mangapai re. (Asanza 18:14) Si rengbe a ka sa rani ani koto na ki mbu kodatise na dungurati daho ani ka bi gupai ni nga i saringbanga niruruhe. Bake Atambuahe ake gupai nga, tipa agu aboro nakpinyemu ga Yekova andiko, “he adu nga ho sa ka kotosi yo te.” (Atambuahe 119:165) Si nirengo nga, aboro dunduko i aamanga yo amanga ngba iraira gene ti kura aregbo. Ka oni ya mbunga ngbatunga gu gbegbere apai re si gbarasipa gaoni irisa Yekova ya. Kuba gure, oni mbu ga Kristo zereda si zogo kpotoroni yo.

Ho Ani Abaka Bangirani Ni

8. Gini bete apai naye na bakabangirise, na sangbanaha rengbe ka du nga gine?

⁸ Bakabangirise nga ndikidi papara raka rogo gi ‘yangara arame re.’ (2 Timoteo 3:1) Rengo du, Yesu ayaa: “Ka oni wísigi nga pai [“ka oni bakingo bangironi,” NW ] tipa ungaroni ya, gine oni ka ri he ya, na tipa kpotoroni ya gine oni ka ukadi he ya.” (Ruka 12:22) Ono anga abakabangirise dunduko naye mbiko berãpa aũzegino te. Roto “arungo bakere” gbe mbiko gu gbegbere mangaapai nadu Sodomo yo. (2 Petero 2:7) Pauro aduna “baka bangirise tipa akanisa dunduko.” (2 AKorindo 11:28) Yesu aduna bakere ima rogo gu yuru nadu mbata fu kpioko da ti gupai nga “gako randimo ki du wa kina bakere togoro kure nitotogo ku sande.” (Ruka 22:44) Sidu si ziazia nga, anga abakabangirise dunduko nayugo gupai nga ga boro idapase ima rungbura te. Ono tie, ka kina gine vura ye na bakabangirise, gu bakabangirise re rengbe arengba ka dia gaani zereda kusayo ka si nyaki gbe na ki du tipa gbanga regbo. Bakabangirise adibe kura awirina, kini sa yo i berẽ gupai nga i arengbanga ka ndu kumbatayo na manga agu apai ga Yekova sunge akodaha te. Ziazia Kekeapai nayaa: “Rungo boro ku kpotoni yo nazoga ni ku sande.” (Asanza 12:25) Ginipai tie rengbe ani ka mangaha, ka bakabangirise afuda rani?

9. Gini bete apai rengbe ani ka mangaha tipa ka akpurasi gaani bakabangirise, ono gini apai nafu bakabangirise ka ani adianga ha kusayo ya?

⁹ Rogo kura apai, ani rengbe arengba ka nyasa apai ngba wene gene. Kangia wokote du nga mburu gaani bakabangirise, si rengbe ka duni wenepai kaa berãpa gbia ziga tipaha, ono ngbatunga agu apai re nabi kina boro ni tini.a (Matayo 9:12) Kangia dungu asunge fu rii ome rani, si gu daada ani fu betehe fu kura awirina. (Gate 18:13-23) Ginipai tie tipa gu kurayo, wa avunguagude, duna agu asunge beyo ka i afunga ha fu akurayo ya? Ginipai tipa gu Kristano naraka na gu gani badia rogatise nasoga rengo asoga? Ginipai tipa agu aborokporo duna zingo mosoro gbe watadu naraka rogo gu rago i asovura rogo? Sidu si ziazia nga, ani arengbanga ka dia agu apai kusayo dunduko naye na bakabangirise rogo gi zegino re te. Si ki vura du wo, ani rengbe arengba ka banda ga Kristo zereda kpotorani yo. Rogo gini gene?

10. Gini agene ue rengbe Kristano rogo ka akpurasi gani bakabangirise?

¹⁰ Pai sa dagba agu apai nafu wasa nga ka gbata undo rogo Fugo Mbori yo. Bakindo Davide akepai ki ya: ‘Wa du sakapai ku kpotore yo ni badungu he, gamo wasawasa afugo nangarãsa mbisimore.’ (Atambuahe 94:19) Ani rengbe ka bi ga Yekova ‘wasawasa afugo’ rogo Ziazia Kekeapai yo. Geda ani gu Buku dedede ga Mbori toro adu kugiipa kehe re nika undo rani ani banda ga Kristo zereda kpotorani yo. Ziazia Kekeapai nayaa: “Mo bá ga tindiro ku auru Yekova, ko asóngoda ro; ko aída nga i gbisi ruru boro wa sa te.” (Atambuahe 55:22) Teketeke a, Pauro akepai ki ya: “Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe na zungaditise ni tambuahe. Na gu zereda nga ga Mbori nagasi rugatinapai dunduko, si abánda kpotoroni yo na gaoni berã rogo Kristo Yesu yo.” (AFiripoio 4:6, 7) Kakaka kparakpee dedede nika undo rani ani kakuti gaani zereda.

11. (a) Waigu ga Yesu kpiapai nga ga kparakpee aduni bawenehe? (b) Si naida ani nibi kparakpee wai?

¹¹ Ga Yesu kpiapai aduni bawenehe kisusi rogo gipai re. Ti kura regbo sa, ko afura na gu Bako nga ga ngbangbaturũ ko tipa dungu asaa. (Matayo 14:23; Ruka 6:12) Kparakpee aundo ko ko hi kere a’asada. Rogo gu yuru nadu mbata fu kpio ko, gako gberarago anyaki gbe. Ginipai ko amangi? Ko akparikpee “kakaka gbe.” (Ruka 22:44) Ii, rengberengbe Wiri Mbori angia gu kumba nanakparakpee dedede. Kangia wo si adu tipa ko, nairiwo wai tie si aida ani duna gu sino tigaani nga ga kparakpee dedede, nga kpakpa aboro! Yesu ayugupai fu gako abawiriki i ‘kpari dedede, ka i ambunga behe ya.’ (Ruka 18:1) Kparakpee nga ndikidi nyanyakipa fugo na gu Boro ini rani susi gu ini ani tirani. (Atambuahe 103:14) Kangia ani naida ka banda ga Kristo zereda kpotorani yo, ‘ka ani piriginga ti kparakpee ya.’—1 ATesaroniko 5:17.

Raka Ringbisihe Kuti Ome Rani

12. Gini nduapai rengbe ka sa kura awirina i berẽ gupai nga Mbori aidanga na gayo sunge te?

¹² Yekova nabi gako amoyambu wa du yo nibasasa ni wene aboro bangiri ko. (Agai 2:7) Wa vura duhe wo, si ni mbumbupai fu dungu aboro ka ida gipai re. Kpoto kura aboro yo rengbe ka zera mbiko gbinza, mbiko agu atindiro nga ga kporo nga gu nasona kina kumbatayo, watadu mbiko awokote. Rago rengbe ka gbera ti kura aboro mbiko agu apai namangi yo mbu yo kindi rukutu. Watadu aguyo rengbe kaa rungo mbiko agu aingahe i amangihe mbata kusayo, kini bakibangiri yo singia Yekova rengbe ka mbupai fuyo ke ti gayo ingapai. (Atambuahe 51:3) Ginipai rengbe ani ka mangaha tipa ngbatunga agu aberã re?

13. Gini ngarasahe duho rogo Ziazia Kekeapai fu agu aboro naberã gupai nga Mbori aidanga na gayo sunge te?

¹³ Ga Kristo zereda nika sa rani ani kido nirengo kuti ga Yekova nyemuse. Ani rengbe ka karaga gu zereda re ku ngbadurani yo ni berã ani kurii gupai nga, Yesu aagumbanga gupai nga Mbori naringbisa gaani sunge na ga akuarani tipa ka bi wai nyakipa rani bangiri ko te. (Matayo 25:14, 15; Marako 12:41-44) Gupai ko anyakasi paha nga si naida ani du niruru rani. Ko agumba gupai fu gako abawiriki nga: “Gu ni nikaru ki da ho ragoho ka diga ni, ni abáta abata.” (Matayo 24:13) Zavura kina Yesu, aboro “apayasi” pako, si ki vura du wo, ko aima ino gupai nirengo nga Bako nakpinyemu ko akpi. (Yesaya 53:3; Yoane 10:17) Na ko agumba gupai fu gako abawiriki a nga, Mbori adu a na nyemu yo. (Yoane 14:21) Tipa ka nyakasa gipai re, Yesu ayaa: “I nabaga[nga] abavurukporo ue tipa rukutu marã sa, te? a nga gu ru sa dagba ra ka ti nga ku sande gi bangiri Baroni te. Ono mangerironi tigaha ni gedigedi he dunduko. Were ka oni gúnde nga ya; genoroni susi geno dungu abavurukporo.” (Matayo 10:29-31) Nga gu wene mokido tipa ga Yekova nyemuse!

14. Ginipai nasa rani ani idihe ya Yekova nabi rani nibasasa ni bawene rani bangiri ko?

¹⁴ Yesu agumba gupai a nga: “Anga boro sa ka ye kono du mi ni gbua te, kina Buba nakedi re ka gbe ni.” (Yoane 6:44) Wa duhe nga Yekova yambu rani koyo du Yesu ni, Ko naida aida nirengo ani bati. Yesu agumba gupai fu gako abawiriki nga: “Baroni du ngbangbaturũ yo, sangbako nga ka gu ni kpi nga sa dagba gi rukutu yo re ya.” (Matayo 18:14) Sidu tie, kangia oni namanga ga Mbori sunge na ngbaduroni yo dunduko, oni rengbe ka duna ngbarago be gaoni wene asunge. (AGaratio 6:4) Kangia oni narungo be gu ingapai oni amangihe mbata kusayo, oni ini gupai nirengo nga Yekova ambupai ambu “kpaima” fu agu aboro sa gayo berã nirengo. (Yesaya 43:25; 55:7) Kangia kura ndupai ho nasa roni kpotoroni yo zere, oni tingidi gupai nga, “Yekova du mbembedi na agu yo du kpotoyo yo na rungo, ki nibatasi agu yo toroyo naima be ingapai.”—Atambuahe 34:18.

15. (a) Waigu Satana a’asada ka dia gaani zereda kusayo? (b) Gini kido rengbe ani ka du nani kuti Yekova?

¹⁵ Gupai Satana akpinyemuhe kakaka nga ka dia gaoni zereda kusayo beroni. Ko nga baenge gu ingapai ani adikumboho, nga gu ani asota areme nani wa du ani dunduko nibasasa. (ARomo 7:21-24) Nirengo, gupai ko aida ka manga roni nani nga ka sa roni oni berẽhe ya, gaoni zangarengba nasa Mbori ka ko idinga na gaoni sunge ya. Ka oni mbunga Bakitingbanga ko zeresi kpotoroni yo ya! Oni duna rubangirise tipa gako abirĩ, na gu rubangirise re ki nyakasi roni oni hipai. (2 AKorindo 2:11; AEfeso 6:11-13) Oni tingidi gupai nga, “Mbori nga bahe ti kpotorani yo.” (1 Yoane 3:20) Yekova abingo kina agu apai sa ani ainga rogo te. Ko nabi agu apai abi a nafõngbadu rani yo sa mangapai. Sidu tie, oni gbia wasa be fugo bake Atambuahe, nga gu nayaa: “Yekova abá nga gako aboro ku sa yo te; ko ambú nga gako siasia aboro a te.”—Atambuahe 94:14.

Ani Nikpamiakpamia Rani Rogo ga Kristo Zereda

16. Rogo gini gene adunga ani nisarani ya, wa ani a’asada tirani ka hipai?

¹⁶ Pauro ake gupai nga si naida ani mbu ga Kristo zereda si zogo kpotorani yo mbiko i ‘ayambu rani sa ni rogo boro sa.’ Gu mbedimbedi aKristano Pauro akepai fuyo, i ayambu yo i ye ka duni papara kpoto Kristo, a wa du yangara mbedimbediyo areme. Agu abakurea yo nga ‘kura avusende,’ i nikpamiakpamia yo kuti gu yangara mbedimbediyo re ni ‘rimbasa avusende sa’ tiibe gu ‘babanda avusende’ nga Yesu Kristo. (Yoane 10:16) Gu ‘rimbasa avusende’ du rogo zegino dunduko nambu gu zereda nga ga Kristo si nizogo kpotoyo yo. Ino ani gupai nga ani nisarani te naundo rani ani hipai. Petero akepai ki ya: “Oni ká fu [Satana] ki ru nyanyaki rogo idapase yo, niini he ya ngbatunga agi ahipai re namanga awirinaroni du rogo zegino.”—1 Petero 5:9.

17. Gini nyanyaki ndupai du berani tipa mbu ga Kristo zereda si zogo kpotorani yo?

¹⁷ Sidu tie, ani sonosinga zereda tie wa du ani dunduko, nga gu nyanyakipa sino ga Mbori toro akusaha. (AGaratio 5:22, 23) Agu aboro Yekova nika bi yo zanga biriko tiyo, watadu zanga serõ tiyo be zegino, rogo pazereda, ko afu maku fuyo ni yangaraha na nyenye unga rogo paradiso auru kpotosende, yo rurupai nika nye ni kindi. (2 Petero 3:13, 14) Si ki ta du were, ani na nduapai berani dunduko ka mbu ga Kristo zereda si zogo kpotorani yo.

[Gu rukutu kekeapai du bandu kpewaraga yo]

Oni Natingidaha?

• Ga Kristo zereda nga gine?

• Waigu rengbe ga Kristo zereda ka zoga kpotorani yo ho i amanga rani ni rogo iraira gene?

• Waigu ga Kristo zereda aundo rani tipa ani nyasi na bakabangirise?

• Waigu ga Kristo zereda afu wasa fu rani ho ani abi tirani ni nga ani arẽnga tipa manga ga Mbori sunge te?

[Gu kpiaahe du ti kpewaraga 29-32]

Ho Yesu aduni barabangiri agu aboro nakitingbaanga ko, ko afu tiko kube Yekova

Ga Yekova wasawasa afugo na’akpurasi gaani bakabangirise, wa kina gu bagude duna nyemuse nga guni nadungo wirini

Hipai nga nyanyakipa pai gbe bangiri Mbori