Yekova Nga Gaani Bagbuko
“Bambiko mo moi Yekova ni ga bagbuko, . . . si du gbigbitapai ayé nga sa ro te.”—ATAMBUAHE 91:9, 10.
1. Tipagine rengbe ani tini ka ya Yekova nga gaani bagbuko?
YEKOVA nga ndikidi bagbuko fu gako aboro. Ka ani fu tirani fuko na ngbaduraniyo dunduko, si rengbe ka sa aboro ‘i fio rani kirikiri, ono ka i adingisonga rani kurogo ba sa ya; pai rengbe arengba ka vundo rani ono ka si adianga berani ya; aboro rengbe ka rungosi rani ono ani nisarani te; i rengbe ka bafa rani ono ka i arengbanga ka gbarasa rani ya.’ Tipagine ani agasa agi apai re tini? Bambiko Yekova nafu “gu bakere tandu [fu rani] susi” ga aboro. (2 AKorindo 4:7-9) Ii, gu Barani nga ga ngbangbaturũ ko naundo rani ani ndu ngba gu gene nga ga sinombori, na si ngba angba ani moi afugo bake Atambuahe ku ngbaduraniyo nga gu nayaa: “Bambiko mo moi Yekova ni ga bagbuko, gu Ko nga Bahe ki susi ni ga baraka, si du gbigbitapai ayé nga sa ro te.”—Atambuahe 91:9, 10.
2. Ginipai rengbe ani ka gumbaha tipa Atambuahe 91 na gupai si afu mokido tipaha?
2 Mose avurangia gu boro nake agu afugo nga ga Atambuahe 91 re. Mbiko gu kekepai du barii Atambuahe 90 nayugo ko ni bakehe, na Atambuahe 91 ki ngbefuo ho zanga si gumbapa gu kura bakeapai kia. Isoke si nawira i anabi Atambuahe 91 rogo gu gene nga; boro sa nabi (veresi 1 na 2) mbata, fuo gure abayongo ki ngbiko na (veresi 3 da kuti 8). Si nawiraha gbe nga, bangisa fugo boro i anagiaha ni nibi (veresi 9 gu bambata paparaha) fuo gure aboro ki karaga (veresi 9 tona ti gu ue paparaha ki da kuti veresi 13). Fuo gure, bangisa bayongo ki wiri bi gu yangara (averesi natona ti 14 da kuti 16). Ka si vura du nga i anabinga gu bia tambuahe re wa gure te, gupai ini ani nga Atambuahe 91 nafu mokido tipa gu bandahe nga ga toro tipa gu riko nga ga mbedimbedi aKristano na kini fu kina ngbatunga gu mokido re fu agu abadiangbayo naima kpara gayo raka fu Mbori.a Ani wisiginga gi bia tambuahe re rogo gu gene nga ga ngbatunga gu ga Yekova amoyambu dunduko re.
Ngba Ba Rani Angba Rogo ‘Ga Mbori Barondo’
3. (a) Gine nga “gu barondo nga ga gu Ko nga Bahe ki susi”? (b) Ginihe ani agbiaha ho ‘sungu ani ni tii kina boro kirima gu Ko duna tandu apai dũ’?
3 Bake Atambuahe nabibia niyaa: “Gu ni nanye rogo gu barondo nga ga gu Ko nga Bahe ki susi, ninasunga tii kirima gu Ko du na tandu apai dũ, ni aya fu Yekova, ‘Mo nga gi bagbuko nga gi gbata; gi Mbori, nga gu ko mi nakida kuti ko.’ ” (Atambuahe 91:1, 2) Rogo fugo sanza, “gu barondo nga ga gu Ko nga Bahe ki susi,” si nga gu ba du tipa banda rani, na gbe, tipa gu mbedimbediyo, nga agu aboro Bakitingbanga aorafuo yo. (Yugoti 12:15-17) Ka ko aima gbarasa rani bakuruyo wa ka si aadunga mbiko gu bandahe ani agbia ngbarago behe be Mbori ni gu gako ageno nga ga toro yo ya. Ni ‘sunga ani tii kina boro kirima gu Ko duna tandu apai dũ,’ ani naino pa ga Mbori wene dadahe, watadu nzereme. (Atambuahe 15:1, 2; 121:5) Anga kura bagbuko ho watadu gu gbata nyaki gbe adunga bazuboho tini ya wa gaani Bakere Bakindo nga Yekova te.—Asanza 18:10.
4. Gini aũsunge ‘bazi azire,’ nga Satana, amangasunge nani, na waigu ani abata be ko?
4 Bake Atambuahe agbia kurapai kuti gure niyaa: “[Yekova] abátasa ro wa zire abati be gu gbina nga ga baimiru, na be kere ngbongi a [“be riri kaza nga gu naye na agberango,” “NW” ].” (Atambuahe 91:3) Rogo gu ringara aYisaraere nadu mbata, bazi azire anazio ra dedede ti agbina. Dagba agu agbina nga ga gu ‘bazi azire,’ nga Satana, nga gako gbegbere riigbu gbiati ‘gako abirĩ.’ (AEfeso 6:11) Ko naoka agbina ngba gaani agene tipa ka bafa rani kurogo gbegbere mangaapai tipa si gbarasipa rani rogo toroyo. (Atambuahe 142:3) Ono tie, mbiko wa ani aima ka manga agu apai arunga ya, ‘mbisimorani abati wa zire abati be ga baimiru gbina.’ (Atambuahe 124:7, 8) Nga gu tambuahe du ani nani mbiko Yekova nabatasa rani be gbegbere ‘bazi azire’!—Matayo 6:13.
5, 6. Gini “riri kaza” ye na “agberango” kurii ga Yekova aboro, ono tipagine i ambunga gene tini fuhe ya?
5 Bake Atambuahe afura tipa gu “riri kaza nga gu naye na agberango.” Wa kina riri kaza, pai gu duho rogo zegino naye na “gberango” fu ngbatunga aboro na fu agu aboro nasongoda ga Yekova bakere pagbia. Gu bake kuru apangbanga nga Arnold Toynbee akepai tipa gipai re ki ya: “Natona tingbafuo digo Ue Vura nga ga Zegino, gu berã nga ga kiisopa ringara akiisi bange sigira aboro gayo azogarago nitiyo ka ra niriyo wa bara ue . . . Gu berã du ngbatunga aboro awere nani nga gu namaapai kina kumbatayo, si nga ga kparakapai dagba aboro.”
6 Rogo gu kama agarã susi, gu kura abazogo angarasi aboro rogo dungu aringara kuti gu berã nga ga kparakapai dagba aboro nga gu naye na fudifudiapai. I naida gupai nga aboro irisi yo watadu aboro irisi gu gayo kpiaahe du nibakiakia. Ono Yekova ambunga gako ruru aboro i mbugene fu ngbatunga gu “riri kaza” re te. (Daniere 3:1, 2, 20-27; 6:7-10, 16-22) Ni du ani ni agu awirina duna nyemuse dagba tirani rogo dungu aringara, ani nikparakpara rani tipa ka iriso kina Yekova sa, ki kpara tirani ti agu apai nga ga zegino nga gu nabipa zogarago a wa Ziazia Kekeapai aida ani nehe, na ki zanga gu ngbenapai nga ga soki kuti aboro, mbiko ani idi gupai nga “dagba rika aboro yo dunduko gu ni nagunde ti ko, ki nimangi rurupai, kina ni ngba ti ko.” (Amokedi 10:34, 35; Gate 20:4-6; Yoane 13:34, 35; 17:16; 1 Petero 5:8, 9) Wa ani avura ni rungo be “agberango” rogo agu angbatungaha du wa gu rungosi aboro aye nani kurirani mbiko padu ani ni aKristano, ani na ngbarago tirani na ki du wenengai rogo toroyo rogo “gu barondo nga ga gu Ko nga Bahe ki susi.”
7. Waigu Yekova abanda rani na “pupoko”?
7 Padu ani na Yekova ni gaani bagbuko nasa rani ani gbia wasa be agu afugo nga: ‘ko adáda ro ni pupoko, mo agbú ku tii pupoko yo; padu ko ni irarengo nasa ko ko du wa vurakube na wa ndugu.’ (Atambuahe 91:4, NW ) Mbori nabanda rani a wa zire naayanga rii wiru ka banda ru. (Yesaya 31:5) Ko ‘nadada rani na pupoko tipa ka gbegberehe danga tirani ya.’ Zire nadada awiru na apuporu kini banda ra be agu anyaa watadu be gu kura azire naida ka ri ra. Wa kina gu wiri azire sue ra naima nyaka ami ki mbedi ka gu, wogu du ani tii ga Yekova bandahe du wa pupo zire, si wo mbiko ani bi bagbuko rogo gu riigbu nga ga ndikidi aKristano.—Ruta 2:12; Atambuahe 5:1, 11.
8. Waigu duhe nga, padu Yekova ‘ni irarengo’ nasa ko ko du wa vurakube na wa kina ndugu fu rani?
8 Ani na kido kuti Yekova mbiko ‘ko nga irarengo,’ watadu mbiko ko ni ruruko. Padu ko niruru ko nasa ko ko du wa kina gu bakere vurakube nanidu mbata, nga gu nanidu dedede ni bakerehe wa kpuguru ki rengbe ka dada kpoto boro nabaha. (Atambuahe 5:12) Padu ani na kido kuti ngbatunga gu bandahe re nakusa gorani be gunde. (Bambata Pai 15:1; Atambuahe 84:11) Wa kina gaani idapase, padu Mbori ni irarengo nga bakere vurakube nga gu nabanda rani be ga Satana asiida nga gu nagbiagbi na kini dadi rani ka avurarani arengbanga ka imisa rani ya. (AEfeso 6:16) Gi vurakube re wa kina nyanyaki ndugu, nga nyanyaki tambara sende ani aru nyanyakii kugiihe.
‘Ani Adunga na Gunde Te’
9. Tipagine rengbe yuru ka du tini nga gu regbo naba kina gunde ti aboro, ono tipagine ani agundenga tigaani tini behe ya?
9 Nibipa ga Mbori bandahe, bake Atambuahe nayaa: ‘Mo agúndenga be gu gbudagbuda nata yuru te, na be agu asiida i nazumudoho uru a te; be gu riri kaza ninata rogo bitimo, na gu gbarasarago ninamanga bebere uru a te.’ (Atambuahe 91:5, 6) Wa duhe nga aboro namanga dungu gbigbitaapai rogo bitimo tipa si dadi yo, yuru rengbe ka du nga gu regbo naba kina gunde ti aboro. Rogo gu bitimo nga ga toro nga gu dadi kpotosende areme, avura rani dedede namanga apai ni biriki ni asadatise ka gbarasapa rani rogo toroyo na ka rugusa gaani sunge tungusapai. Ono tie ‘ani agundenga be gbegbere he yuru te,’ mbiko Yekova nabanda rani.—Atambuahe 64:1, 2; 121:4; Yesaya 60:2.
10. (a) Gine nga sino ‘agu asiida i nazumudoho uru,’ na waigu ani amangapai sani? (b) Gine nga ‘gu riri kaza nata rogo bitimo re,’ na tipagine ani agundenga tini behe ya?
10 ‘Agu asiida i nazumudoho uru,’ si nawira i nafura herẽ tipa zubo boro na gbegbere afugo. (Atambuahe 64:3-5; 94:20) Wa ani akpatagara kuti gumba kina agu apangbanga nga rengo, ngbatunga gu sogote kuti gaani ziazia sunge aboro amangaha gbaiga re nada ni kina dogatise. Kurii gure, ani agundenga be ‘gu riri kaza nata rogo bitimo te.’ Gere nga gu riri kaza narukuba kurapai du rogo gu bitimo nga ga iraira mangaapai gbiakuti gu mangaapai nga ga pambori nga gu mangaapai arunga ya du rogo gi zegino du kutii ga Satana ome re. (1 Yoane 5:19) Gi riri kaza re nasa berã aboro na ngbaduyo yo si du nigbegberehe, na kini mbu yo rogo gu bitimo nga ga toro zanga i ini pai tipa Yekova, tipa gako aringbisapai, na tipa agu apai ko ambakadihe ni gako nyemuse tipa aboro. (1 Timoteo 6:4) Ani agundenga rogo gi bitimo re te, mbiko ani nagbia ngbarago kpaima be gu imarago nga ga toro.—Atambuahe 43:3.
11. Sangbana ‘gu gbarasarago namanga bebere uru’ nga gine kuri agu aboro si amanga yo?
11 ‘Gu gbarasarago namanga bebere uru’ agundesinga rani a te. Gu fugo nga ‘bebere uru’ rengbe ka rukuba agu apai i aya tipaha wee si nafu rugatinapai nga ga zegino fu aboro. Agu aboro nambugene fu gu gaha bipai nga ga orafuo aũzegino nagbarasapa tiyo rogo toroyo nikerehe. (1 Timoteo 6:20, 21) Wa ani atakapande gu pangbanga nga ga Kindo gbaiga, ani agundenga be avura rani te, mbiko Yekova nga Babanda rani.—Atambuahe 64:1; Asanza 3:25, 26.
12. Pati ada dungu kutu aboro ‘atiwa,’ na rogo gini gene i atiwa?
12 Bake Atambuahe aafura kindi niyaa: “Aboro 1,000 atiwa pati ro, na 10,000 ku kumbabero; ono si ayé nga ki mbedi na mo te. Ono mo angána ha ni kina bangiro, ki nibi ga gbegberẽ aboro mosoro.” (Atambuahe 91:7, 8) Mbiko wa dungu aboro asanga Yekova ni gayo bagbuko ya, dungu yo ‘nati pati rani’ rogo gu kpio nga ga toro. Gupai nzunzu mangi nga, aboro “10,000” ima ti pati ‘kumbabe’ agu aYisaraere nga ga toro yo du areme. (AGaratio 6:16) Ono singia ani nga mbedimbedi aKristano watadu agu abadiangbayo naima kpara gayo raka fu Mbori, ba rani ima ngba rogo gako ‘barondo.’ Gupai ani amangaha gbua nga ka ru kini bi “ga gbegberẽ aboro mosoro,” nga aguyo nagbia fudifudiapai rogo sunge bagaahe, rogo pambori, na rogo agu akuraha.—AGaratio 6:7.
‘Anga Gbigbitapai Ho Nika Ye sa Rani Te’
13. Gini gbegbereapai amanganga rani ya, na tipagine?
13 Wa vura duhe nga ngbakinga ba aboro berewe rogo gi zegino re wa gu nadu mbata te, ani namaa Mbori mbata fu kura apai na fuo gure, ani ki ngarasi tirani na afugo bake Atambuahe nga gu nayaa: “Bambiko mo moi Yekova ni ga bagbuko, gu Ko nga Bahe ki susi ni ga baraka, si du gbigbitapai ayé nga sa ro te, a nga gberãngbi [“gbegberepai,” “NW” ] sa nikambeda na ga kporo [“bambu rokoo,” “NW” ] wa sa te.” (Atambuahe 91:9, 10) Ii, Yekova nga gaani bagbuko. Ono tie, ani nasa gu Mbori nga Bahe Kisusi ni ‘gaani kporo’ a, nga gu ba du ani nibandabanda rani rogo. Ani nasambuo Yekova ni Bakere Bakindo zegino dunduko, kini ‘raki kporo’ na ko ni gaani Mburu bandahe, na kini takipande gu wene pangbanga nga ga gako Kindo. (Matayo 24:14) Sidu, ‘gbegberepai ho nika manga rani te,’ anga gu gbegbereapai gumba yo paha mbata rogo gi bia tambuahe re nika manga rani te. Zavura ho ngbatunga gu kereapai re ati ni kurirani na kurii kura aboro wa abazigizo, bakamikami awege, hihi ime, bakere gomoro, na kere asangbana vura, agi apai re agbarasanga pa gaani idapase watadu ka gbarasapa rani rogo toro te.
14. Ni ga Yekova amoyambu, tipagine gi gbegbereapai re amanganga rani tini ya?
14 Mbedimbedi aKristano wa kina agu aboro naraka tii abambu rokoo rogo gu ringara angianga gayo ya ki duni kparakpara yo kusayo ti gi sino raka re. (1 Petero 2:11) ‘Anga gbegberepai ho nika mbeda na gayo bambu rokoo te.’ Singia ani namaa bangirani tipa ka raka ngbangbaturũ yo watadu auru kpotosende, ani ni papara gi zegino re te, na gu gaha kere akaza du wa wasiro, nyemu aũzegino, zire pambori, na iriso “nyarinde” na iriso ‘kpiaru,’ nga UN agbarasanga pa rani te.—Yugoti 9:20, 21; 13:1-18; Yoane 17:16.
15. Rogo gini agene ani agbia ngbarago be gu banda rani amaraika amangaha?
15 Nibipa gu bandahe ani agbia ngbarago behe, bake Atambuahe nayaa: “[Yekova] arúga gako amaraika tipa ro, ka banda ro ngba gamo agene dunduko. I asóngoda ro ni beyo, mo ka fõ nduro ti mbia.” (Atambuahe 91:11, 12) I aima fu ome fu amaraika i banda rani nani. (2 Abakindo 6:17; Atambuahe 34:7-9; 104:4; Matayo 26:53; Ruka 1:19) I nabanda rani ‘ngba gaani agene dunduko.’ (Matayo 18:10) Ani nagbia ngbarago wa amaraika ayugo gene fu rani na kini banda rani mbiko ani nga atakipande Kindo na kini banda rani ani ka kota rogo agu apai nga ga toro. (Yugoti 14:6, 7) Zavura ngbatunga agu ‘ambia’ du wa zahe ti gaani sunge asanga rani ani koto ki ti kusayo ti gbia ga Mbori weneringise te.
16. Waigu du gu zubohe nga ga “paranga bahu” kia ti ga ‘basuru,’ na waigu ani amangapai kuti ngbatunga agi azubohe re?
16 Bake Atambuahe nagumba gako afugo kindi kini yaa: ‘Mo así ri bahu ni nduro na ri basuru, mo así ri paranga bahu, na ri bakere woo.’ (Atambuahe 91:13, NW ) A wa paranga bahu naazubo anyaa gbaiga, bete avura rani ayugu gayo sogote wa kina gure gbaiga rogo rũndiko nga gu i ambakadihe tipa si rugusi gaani sunge tungusapai. Ono gu kura zubo rani nitunguotunguoho kina tini i amangaha a, nga gu du wa ga basuru, nga guru nagu rogo gu ba gbu u rogo ka de boro. Ti kura aregbo, abarumbatayo rogo pambori natagbu kugii kura aboro kini zubo rani, wa kugii abarũndiko, kugii abasapungbanga, na gu kugii kura aboro. Ono tie, mbiko ga Yekova undo, ani nasana agbia ngbanga rogo pazereda i rugusipai kubara rani yo, rogo gi gene re ani kini ‘ru kugii wene pangbanga na kini sigiraha kuti sangba ndiko.’—AFiripoio 1:7; Atambuahe 94:14, 20-22.
17. Waigu ani asimbo ‘paranga bahu ku sande’?
17 Bake Atambuahe nafura tipa simbo ani ‘paranga bahu ku sande na bakere woo.’ Paranga bahu rengbe ka duni kere nyarinde, na gi bakere woo re rengbe ka rukuba gu bakikii nya-ire nagbe tiru sande wa gu woo nga gbara. (Yesaya 31:4) Ono tie, ka pepai ni sanza, ka paranga bahu vura engira wa kina gine ho u azubo rani ni gbaiga, ani nasimbo ru asimbo ni gia ani sangba Mbori kuba giasangba ru nga agu aboro du wa abahu watadu agu ariigbu du wa bahu. (Amokedi 5:29) Sidu ni manga ani he wo, ka gu “bahu” du nzengerenzengere re arengbanga ka gbarasapa rani rogo toro ya.
18. “Bakere woo” rengbe ka tingida rani na pa da, na ginipai si aida ani mangihe ka si du nga gi woo re zubo rani?
18 Rogo gu sasafugo Ziazia Kekeapai nga Septuagint du rogo pa-Giriki, i nayamba “bakere woo” yo nga “daragona.” Gipai re rengbe ka tingida rani na pa “bakere daragona . . . nga gu bakuru wo, nga gu ko i aniya ti ko, Bakitingbanga nga Satana.” (Yugoti 12:7-9; Bambata Pai 3:15) Ko wa kina gu kpukuyu nya-ire nagbe tiru sande rengbe ka bubuna gau nyaa na ki mbiri ru nibasa. (Yeremaya 51:34) Ho Satana aida ka kaya rani ni na angiriko, na ka bubuna rani na gu sosodapai nga ga zegino, na ka mbira rani, ani zigizo tirani ki kuru kusayo rogo angiri gi “bakere woo” re na ki simbi ru kusande. (1 Petero 5:8) Si naida gu mbedimbedi yangara yo mangi gipai re ka i aida ka duni adigisi sangba ARomo 16:20.
Yekova Nga Mburu Gaani Bata
19. Tipagine sa ani Yekova tini ni gaani bagbuko?
19 Tipa ndikidi airisimbori, bake Atambuahe afura kuba Mbori niyaa: “Bambiko wa ko aka kuti re ni nyemuse, si du mi abátasa ko ti ni; mi abánda ko, bambiko ko ini rimore.” (Atambuahe 91:14) Gu gumbapai nga, “mi abánda ko,” rogoyo ngburungburu nga, “mi amaa ko kina boro ariyo,” nga wee, ka maa ko rogo gu ba adunga ba gbia ko tini ya. Ani nandu ka gbu yo du Yekova ni ni iriso ko, gbe mbiko ‘ani kakuti ko ni nyemuse.’ (Marako 12:29, 30; 1 Yoane 4:19) Tipa Mbori tigako, ‘ko nabatasa rani’ be avura rani. Boro ho nika gbarasa rani auru kpotosende te. Kuba gure, Mbori abatasa rani abatasa mbiko ani ima ino rimo ko na kini yambuhe rogo idapase. (ARomo 10:11-13) Na ani ima diaberã kaa ‘ta rogo rimo Yekova nyeanye kindi.’—Mika 4:5; Yesaya 43:10-12.
20. Gine Yekova nakido gako amoyambu tipaha rogo digido Atambuahe 91?
20 Ti digido Atambuahe 91, Yekova nayaa tipa gako ruru moyambu wee: “Ho ko nakpara ni fere, mi akáraga pai fu ko; mi adú na ko rago fudifudipai, mi abátasa ko, ki irisi pa ko. Mi ambísa ko na gbanga rame [“mi afu gu mosoro fuko nga gbanga rame,” “NW” ] ki yugu pa gi bata fu ko.” (Atambuahe 91:15, 16) Ho ani asana Mbori ni rogo kparakpee tipa agu apai duna ngbanya dagbaha na gupai ko akpinyemuhe, ko nakaragapai akaraga fu rani. (1 Yoane 5:13-15) Wa du rago re, ani ima susa rogo dungu fudifudiapai nga gu naye be gu sogote Satana atiga we tini. Ono agu afugo nga, “mi adú na ko rago fudifudipai” nangarasa rani tipa agu a’asada du kumbatayo na kini kido rani ya Mbori abanda rani abanda ho ko ka gbarasa gi gbegbere zegino ni re.
21. Waigu i naima taasarimo gu mbedimbediyo?
21 Wa Satana avura ni sogote gu mbedimbediyo nikerehe, Yekova nika taasa pa aguyo du awere dagba rani ti gako regbo fuo dungura ko yo dunduko ku ngbangbaturũ yo. Gere amanga fuo dia yo “gbanga rame” auru kpotosende. Wa vura duhe wo, pa batasa Mbori yo rogo iiriwo agene aima ye na taarimo nga ga toro fu gu mbedimbediyo. Na nga gu irisa ngaha nga i ngia agu aboro nangbe mbatayo ni ga Yekova aDezire auru kpotosende rogo gi yangara arame re! (Yesaya 43:10-12) Yekova nika batasa gako aboro rogo bakere gene gbe ti regbo gako bakere vura nga ga Aramegido ho ko ka dia gbarasarimo ni kusayo ti gako bakere pagbia na ki girisi ziazia rimo ko ti gbarasarimo.—Atambuahe 83:18; Yezekere 38:23; Yugoti 16:14, 16.
22. Ada nika ‘bi bata be Yekova’?
22 Singia ani nga mbedimbedi aKristano watadu agu abadiangbayo naima kpara gayo raka fu Mbori, ani dunduko nangera kube Mbori tipa bata. Ti regbo ‘gu bakere iiriwo uru nga ga Yekova,’ agu aboro namangasunge fu Mbori niruruhe, i ko ka batasa yo. (Yoere 2:30-32) Agu rani nika du dagba gu “bakere rimbasa aboro” nika bata kurogo ga Mbori vovo zegino na nika nye niruru rani rogo yangara asada, ko ‘afu gu mosoro fu rani nga gbanga arame,’ nga gu unga adunga digidoho tini ya. Na ko azingisa gu kura ndurumo aboro a bekpio. (Yugoti 7:9; 20:7-15) Nirengo, Yekova aduna bakere ngbarago tipa ka ‘sa rani ani gbia bata’ rogo Yesu Kristo yo. (Atambuahe 3:8) Ani tamaa gi bakere maabangirise re barabangirani, ani ki kakuti ngera kube Mbori tipa ko undo rani rogo wai ka gida gaani arame si taasi rimo ko. Rogo gaani afugo na mangaapai, ani yugunga gupai nga Yekova nga gaani bagbuko.
[Gu rukutu kekeapai du bandu kpewaraga yo]
a Abake gu Ziazia Kekeapai i akehe rogo pa-Giriki asakanga rogo Atambuahe 91 nibipa gu sangbanebi du tipa Masiya te. Rengo ngaha, Yekova angia bagbuko na nyanyaki gbata fu gu kumba nangia Yesu Kristo, kinawo a du Ko ti gi ‘digido rago’ re fu mbedimbedi apefuo Yesu na fu agu abadiangbayo duni gu riko naima kpara gayo raka fu Mbori.—Daniere 12:4.
Gaoni Karagapai Nga Gine?
• Gine nga “gu barondo nga ga gu Ko nga Bahe ki susi”?
• Tipagine ani agundenga tini ya?
• Waigu duhe nga ‘gbegberepai ho nika manga rani te’?
• Tipagine rengbe ani ka ya tini Yekova nga mburu gaani bata?
[Caption on page 15]
Oni ini wai duhe nga, padu Yekova ni irarengo nasa ko ko duni bakere vurakube fu rani?
[Gu kpiahe du ti kpewaraga 9Caption on page 16]
Cobra: A. N. Jagannatha Rao, Trustee, Madras Snake Park Trust ▼
[Gu kpiahe du ti kpewaraga 9Caption on page 16]
Yekova naundo gako amoyambu i mangi gayo sunge tungusapai aboro ki vura nitunguo yo na sogote watadu ka zubo yo gbaiga vurũ