Oni Dagba Agu Aboro Mbori Akpinyemu Yo?

“Gu ni du gi [mi] rugute be ni ni ki ka kuti ni, kina ni nakpi nyemu re; gu ni du nyemu re ti ni Buba akpi nyemu ni akpi.”—YOANE 14:21.

1, 2. (a) Waigu Yekova ayugu gako nyemuse tipa ngbatunga aboro? (b) Gine Yesu asigiraha rogo gu yuru nangia ga Nisana ti rameru 14, rogo gu garã nangia 33 ti Gaani Regbo?

YEKOVA nakpinyemu gu gako aboro ko akusiyo. Nirengo, ko nakpinyemu ngbatunga aboro akpi zegino gbe si du ko ‘afu bangisa Wiriko tini ya guni ka idi pako ni kpinga te, ono nyenye unga du adu beni.’ (Yoane 3:16) Wa regbo Tingidapa Kpio Kristo ambeda, si naida ndikidi aKristano rugu tiyo susi gu nidu mbata na gupai nga, Yekova ‘akpinyemu rani ki kedi Wiriko ko duni motumo gaani ingaapai.’—1 Yoane 4:10.

² Rogo gu yuru nangia ga Nisana ti rameru 14, rogo gu garã nangia 33 ti Gaani Regbo, Yesu na gako abawiriki 12 adungura tiyo kurogo gu vurubambu nadu kuari Yerusarema yo tipa ka ri Pumbo Susiri ni tingidapa batasa aYisaraere Ezipeta yo. (Matayo 26:17-20) Fuo nyasa yo na gi ga aYuda pumbo re, Yesu ambu Yuda Keriota ko kuru kusayo dagba yo, fuo gure ko ki sigira gu riahe nga ga nyemu nga gu si adu nga si nika duni Tingidapa Kpio Kristo fu aKristano.a Ni manga Yesu sunge na gu kpakuto naadunga na agbooro rogo ya ni guhe narukuba kpotoko gbiakuti zamba imekakue ni guhe narukuba kureko, ko adungura gu yangara gako abawiriki nadu 11 kurogo ba sa i ri gi riahe nga ga tingidapa kpioko re. Agu abakeke abuku Wene Pangbanga nga Matayo, Marako, na Ruka nayugo wai ko amangihe na gu futufutuapai nadu tipaha gbiakuti gu mokedi nangia Pauro nga guko nayambuhe tigako nga “ga Gbia riahe.”—1 AKorindo 11:20; Matayo 26:26-28; Marako 14:22-25; Ruka 22:19, 20.

3. Gini nyanyakipa apai du rogo gu wene pangbanga gu mokedi nangia Yoane akehe du kia ti akuraha tipa gu yangara asaa Yesu adihe na gako abawiriki rogo gu vurubambu nadu kuari yo Yerusarema yo?

³ Ono kina afugo gu mokedi nangia Yoane afuranga tipa tanga kpakuto na imekakue be aboro ya, isoke si rengbe ka du wo mbiko ti gu regbo ko ake gako buku nga ga Wene Pangbanga (bara ti gu garã nangia 98 ti Gaani Regbo), i aima sigira gu mangaapai re dagba bambata aKristano sidu ka si aidanga i fura tipaha berewe ya. (1 AKorindo 11:23-26) Ono tie, mbiko gu tingidapai naye be ga Mbori toro, kina Yoane nisako nafu gu nyanyakipa tingidapai fu rani du tipa gupai Yesu agumbaha na ki mangihe ni yangaraha mbata fu Ko sigira Tingidapa Kpioko na gupai ko agumbaha na ki mangihe niyangaraha fuoho. Gi futufutuapai re hiisi akapita bisue rogo ga Yoane buku nga ga Wene Pangbanga. Si nayugopa agu aboro nzunzu Mbori akpinyemu yo. Ani wisiginga Yoane kapita 13 da ti digido kapita 17.

Oni Wirikipai be ga Yesu Kpiapai nga ga Nyemuse

4. (a) Waigu Yoane anyakasi pa gu banguapai Yesu afura riipaha na gako abawiriki ho ko asigira Tingidapa Kpioko ni? (b) Gine nga nyanyaki ndupai sa Yekova akpinyemu Yesu tini?

⁴ Pa nyemuse hiisi agu akapita du ga Yesu yangara arugute rogo fu apefuo ko. Nirengo, dungu ngbatunga agu afugo du tipa “nyemuse” rogoho yo bara 31. Anga kura ba ho yugu yo pa ga Yesu bakere nyemuse ziazia tipa Bako nga Yekova, na tipa gako abawiriki wa gu duhe rogo agi akapita re te. Ani rengbe arengba wenengai ka ino pa ga Yesu nyemuse tipa Yekova rogo agu abuku nga ga Wene Pangbanga nga gu nafura tipa gako raka, ono kina Yoane sa nake gupai ziazia Yesu agumbaha nga: “Mi nakpi nyemu Buba.” (Yoane 14:31) Yesu agumba gupai a nga Yekova nakpinyemu ko na ki sakirogo pa nduhe. Ko ayaa: “Wa Buba nakpi nyemu re, mi nakpi nyemu roni a; oni nyé rogo gi nyemuse. Ka oni ka kuti gi rugute, oni nye anye rogo gi nyemuse; wa ka mi kuti ga Buba rugute, ki nye rogo gako nyemuse.” (Yoane 15:9, 10) Ii, Yekova nakpinyemu Wiriko mbikopa gako ndikidi giasangbaa. Nga gu wene kpiapai tipa apefuo Yesu Kristo dunduko wirikipai behe!

5. Waigu Yesu ayugu gako nyemuse koyo du gako abawiriki ni?

⁵ Yoane nanyakasapa ga Yesu bakere nyemuse tipa apefuo ko ti kina tonatona gako pangbanga tipa ga Yesu yangara dunguratise na gako abawiriki. Ko natangaraha niyaa: “Were mbata rago pumbo susiri nika da, Yesu ki niini ya ragoko da ko guari rogo gi zegino re ka ga koyo du Bako ni, ko nakpi nyemu gu gako aboro akpi nadu zegino, ko anakpi nyemu yo akpi kindi dati yangara rago.” (Yoane 13:1) Rogo gu yuru nangia ga tingidapa kpio Yesu re, ko ayugupai fu gako abawiriki tipa manga yo sunge fu akurayo rogo nyemuse, ni zunda ko anduyo, nga gu yugopai ka bangirise agonga tini ya. Wa i adu nibasasa, gere nangia gupai ka i aduna nyemu ka mangaha tipa Yesu na tipa awirinayo, ono i aidanga ka mangaha te. Yesu amangi gi sunge nga ga umbasitise re na ko ki ya fu gako abawiriki: “Wa du mi tie, ni Gbia ni Bayugupai, zundu kpenduroni, oni ka zunda kpendu akuaroni a. Bambiko mi yugu [kpia]pai fu roni, oni nimangi wa mangi mi fu roni.” (Yoane 13:14, 15) Si naida ndikidi aKristano duna nyemu mangasunge fu awirinayo na kini mangihe na ngbarago.—Matayo 20:26, 27; Yoane 13:17.

Oni Mangi Vovo Rugute

6, 7. (a) Gini futufutuapai Yoane akehe tipa sigira Tingidapa Kpio Yesu? (b) Gini vovo rugute Yesu afuhe fu gako abawiriki, na gini vovopai nadu rogo?

⁶ Gu ga Yoane pangbanga du tipa gupai namangi rogo gu vurubambu nadu kuari rogo gu yuru nangia ga Nisana ti rameru 14, nga gu yangara pangbanga natingida rani zukazuka na pa kura Yuda Keriota kusayo dagba akurako. (Yoane 13:21-30) Ni koda ani sangba abuku Wene Pangbanga dunduko si du kina sa zanga tagbagatihe, ani nabi gupai nga, Yesu asigira Tingidapa Kpioko kina fuo kura gi basamungu re kusayo dagba yo. Fuo gure, ko afura ni gbangaha na gako ruru abawiriki, kini fu yangara arugute fuyo. Wa ani ambakada tirani tipa ka du pati Tingidapa Kpio Yesu, si naida ani duna bakere nyemu gupai tirani Yesu agumbaha ti gu regbo re, na ki duna nyemuhe gbe nirengo mbiko ani naida ka du dagba agu aboro Mbori akpinyemu yo.

⁷ Gu bambata rugute Yesu afuhe fu gako abawiriki fuo sigira ko Tingidapa Kpioko angia vovopai. Ko ayaa: “Vovo rugute fu mi fu roni nga, oni kpi nyemu akuaroni akpi; a wa mi akpi nyemu roni, oni kpi nyemu akuaroni a wo. Ka oni akpi nyemu akuaroni, si ka aboro ini ti ni dunduko ya gimi abawiriki nga oni.” (Yoane 13:34, 35) Gine nadu nivovoho rogo gi rugute re? Fuo bete regbo tooni kusa, rogo kina gu nyemu re, Yesu arugusi apai tu gako abawiriki yo niyaa: “[Gere nga gimi rugute], nga oni nikpi nyemu akuaroni, wa gu mi nakpi nyemu roni. A nga boro sa du na bakere nyemuse susi gi nga, boro bagi kpioni tipa abadiangbani te.” (Yoane 15:12, 13) Ga Mose Ndiko azinahe fu aYisaraere i ‘kpinyemu akurayo wa gu i akpinyemu tiyo.’ (Pa Amotumo 19:18) Ono tie ga Yesu rugute ayari kugii gure. Si adu nga aKristano kpinyemu akurayo wa gu Kristo akpinyemu yo, ki duna nyemu ka kpi tipa awirinayo.

8. (a) Gu nyemuse nasa boro ni mbupa gaani apai nakoda gine? (b) Waigu aDezire Yekova ayugo gu nyemuse areme nasa yo i mbupa gayo apai?

⁸ Regbo Tingidapa Kpio Yesu nga wene regbo tipa ani wisigi tirani, wa du ani nibasasa na wa du ani ni dungurati ka bi singia ani na gi nyemuse du wa ga Kristo re tirani nga gu nayugopa ndikidi aKristano. Ti kura aregbo, ngbatunga gu nyemuse re nasa boro ni kpi tipa akurani, na si aima sa kura awirina i kpi tipa akurayo kuba gupai nga ka kusa akurayo fu kpio. Ono dedede tie, si naakoda gupai nga ani duna nyemu ka mbupa gaani apai tipa ka undo awirinarani ni ndu ani sunge fuyo na ka ndusunge fu kura aboro. Gu mokedi nangia Pauro angia wene kpiapai rogo manga gipai re. (2 AKorindo 12:15; AFiripoio 2:17) Aboro ini aDezire Yekova rogo zegino dunduko ti gu gayo sino nga ga mbupa gayo apai kini undo awirinayo na kini undo gayo amurakporo na kini ndu na gu rengo nga ga Ziazia Kekeapai fu akurayo aboro.b—AGaratio 6:10.

Gu Pagume Si Aida Ani Bandaha

9. Tipa ani banda gu gaani kikiipa pagume du dagba rani na Mbori gbiakuti Wiriko, ginipai du ani na ngbarago ka mangaha?

⁹ Anga he ho rengbe paha ka kio bangirani kisusi gupai nga Yekova gbiakuti Wiriko nga Kristo Yesu kpinyemu rani te. Ono tie, tipa ka sa yo i kpinyemu rani, si naida ani mangipai. Rogo gu yangara yuru Yesu adihe na gako abawiriki re, ko ayaa: “Gu ni du gi[mi] rugute be ni ni ki ka kuti ni, kina ni nakpi nyemu re; gu ni du nyemu re ti ni Buba akpi nyemu ni akpi, mi akpi nyemu ni akpi a, ki yugu tire fu ni.” (Yoane 14:21) Wa duhe nga ani nabipa gaani ngbanya na Mbori gbiakuti Wiriko na kikiipaha, ani nairisa gayo arugute na ngbarago tirani. Agi arugute re nakoda gu vovo arugute du tipa yugo gu nyemuse nasa rani ani mbupa gaani apai na ka manga gu kura ga Kristo rugute nga gu ko afuhe fuo zinga ko bekpio tipa ‘tungusapai fu aboro na ka manga dezirepai fuyo wenengai,’ kini asadi tirani ka ‘sa aboro ni abawiriki’ nga aguyo nadia wene pangbanga kugume.—Amokedi 10:42; Matayo 28:19, 20.

10. Gini nyanyakipa pagume du genehe nizazaha fu mbedimbedi aKristano na fu “kura avusende”?

¹⁰ Fuo bete regbo kusa, rogo kina gu yuru re, ni karagapai kuti gu sanahe gako ruru bawiriki nga Yuda (Tadayo) asana ko nani, Yesu ayaa: “Si ngia boro nakpi nyemu re, ni ka kuti gi pai. Buba akpi nyemu ni akpi, ani aye koyo du ni ni, ki nye na ni.” (Yoane 14:22, 23) Zavura ho du mbedimbedi aKristano ni kindi auru kpotosende, nga agu aboro i nayambu yo i ndu ka zogarago ngbangbaturũ yo na Kristo, i na dawedawe pagume dagba tiyo na Yekova gbiakuti Yesu. (Yoane 15:15; 16:27; 17:22; AEbere 3:1; 1 Yoane 3:2, 24) Ono agu abakurea yo nga “kura avusende,” duna gu maabangirise tigayo nga ga raka nyeanye kindi auru kpotosende, na bawene pagume dagba yo a na gu bangisa ‘babanda avusende’ (NW ) nga Yesu Kristo, na dagba yo na Mbori nga Yekova, ono ka si du nga i nagiasangba ko kindi.—Yoane 10:16; Atambuahe 15:1-5; 25:14.

‘Aboro Zegino Nga Oni Te’

11. Gini zahe nadu ziazia Yesu afuhe fu gako abawiriki?

¹¹ Ti regbo gi yangara dunguratise na gako ruru abawiriki mbata fu kpioko re, Yesu afu gu zahe nadu ziazia nga: Kangia Mbori nakpinyemu boro, aboro zegino nika soga ni nibasa. Ko agumbaha ki ya: “Ka aboro asoga roni . . . zegino, oni ini aina ya i aima soga re mbata i nikasoga roni. Ka oni [ni]du ni aboro zegino, ka aboro zegino nakpi nyemu gayo aboro; ono bambiko wa adu nga oni ni aboro zegino ya, . . . [mbiko mi aima sia roni] zegino, si [du] aboro zegino asoga roni ti ni. Oni tíngidi gu pai mi agumba[ha] fu roni ya, ‘Moyambu nakia nga susi bairani te.’ Si ngia i arungosi re . . . , i arúngosi roni arungosi a; si ngia i aka kuti gi pai, i aká [aka] kuti gaoni a.”—Yoane 15:18-20.

12. (a) Tipagine Yesu arugu gako abawiriki tini ya zegino asoga yo asoga? (b) Ginipai ka ngba gbe tipa aboro dunduko berẽ paha wa Tingidapa Kpio Yesu ambeda?

¹² Yesu afu gi zahe re tipa gu gako abawiriki nadu 11 na tipa gu ndikidi aKristano si adu nga i nika ye fuo yo gizo tipa ka ngbaduyo zerenga na i ki mbu rengo be gu sogote i ka gbiaha be aboro zegino ya. Ko agbia gupai kuti ni nga: “Gumba mi agi apai fu roni re, oni ka kota. I adó roni ado bambutiria yo. Ii, ragoho nada ya gu ni ka imi roni ni ya aya ti gu ni narũ he arũ fu Mbori. [Ono] i amánga agi apai re, bambiko i aina nga . . . [re na Buba te].” (Yoane 16:1-3) Gu kura buku sa nga gu nasakarogo Ziazia Kekeapai yo nayaa gu fugo i asaha herẽ nga “ka kota,” rogoyo nga “ka sa boro ni tona kaa kapa kuti gu boro si aida ni naakido kuti ni na kini gisangba ni; watadu ka sa boro ni ti kusayo.” Wa regbo Tingidapa Kpio Yesu ambeda, si naida ani dunduko berẽ kurii gu gene raka nga ga gu ruru airisimbori nadu mbata na aguyo du awere, na ki wiriki yo rogo kakuti ruru mangapai ho du ani ni rogo asada. Ka ani mbunga sogote watadu rungosi si sa rani ani gindigo Yekova gbiakuti Yesu ya, ono ani diberã kaa kido kina kuti yo na kini gisangba yo.

13. Gine Yesu asanahe tipaha rogo gako kparakpee fu Bako tipa apefuo ko?

¹³ Rogo gako yangara kparakpee mbata ko nika kura kusayo rogo gu vurubambu nadu kuari yo Yerusarema yo re, Yesu aya fu Bako: “Mi fu ga pai fu yo; aboro zegino asogo yo asoga, bambiko aboro zegino nga yo te, wa kina re adu nga ni boro zegino ya. Mi akpara nga foro mo rogo yo aroga zegino te, ono mo ka aka kuti yo ti gbegberẽ ko. Aboro zegino nga yo te, wa kina re adu nga ni boro zegino ya.” (Yoane 17:14-16) Ani rengbe ka duna gu kido nga Yekova nabanda agu aboro abanda ko akpinyemu yo, kini ngarasi yo wa i akpara tiyo kusayo ti zegino.—Yesaya 40:29-31.

Oni Nye Rogo ga Mbori Nyemuse na ga Wiriko

14, 15. (a) Gine Yesu aringbisi tiko kuti ni, na du kia ti gini ‘kungbo bakakue nga ga nvuo’? (b) Ada nga ‘abe ndikidi bakakue’?

¹⁴ Ti regbo gu fugo naye ngbaduseyo nadu dagba Yesu na gako ruru abawiriki rogo gu yuru nangia ga Nisana ti rameru 14, ko aringbisipa tiko kuti “ndikidi bakakue” nga gu du kia ti gu ‘kungbo bakakue nga ga nvuo’ nga gu fugo sanza narukuba agu aYisaraere naima mbu manga ruruapai. Ko ayaa: “Mi nga ndikidi bakakue, Buba nga babanda ati.” (Yoane 15:1) Dungu akama agarã mbata fu gu regbo re, gu nebi nangia Yeremaya ake afugo Yekova fu gu gako aboro naima mbu manga rurupai ki ya: “Mi arũ ro wa siasia [zamba] bakakue . . . Waĩ tie sa mo tiro ni payapaya ro ki sa tiro ni kungba bakakue [nga ga] nvuo?” (Yeremaya 2:21) Na gu nebi nangia Osea akepai ki ya: ‘AYisaraere nga gbegbere bakakue. I nazuka rindi bakakue tipa tiyo. Ngbaduyo yo duna biriki.’—Osea 10:1, 2.

¹⁵ Kuba gupai nga aYisaraere kusi zuzu ndikidi pambori, i asamungu kuti ndikidi pambori ki zuku gbegbere rinde nga ga samungu. Areme biata mbata fu ga Yesu yangara dunguratise na gako ruru abawiriki, ko afura fu gu ga aYuda abarumbatayo nangia airabiriki ki ya: “Ya mi fu roni wẽ, gu ngbi nga ga Mbori, i adía ha adia be roni, i ki fu he fu gu rika aboro nikazu kina gaha zuzuhe.” (Matayo 21:43) Gu vovo rikaaboro re nga “ga Mbori Yisaraere,” nga aguyo nakoda mbedimbedi aKristano 144,000 ringbisi yo payo kuti ‘abe ndikidi bakakue,’ nga Yesu Kristo.—AGaratio 6:16; Yoane 15:5; Yugoti 14:1, 3.

16. Gine Yesu angarasi gu gako abawiriki nadu 11 i mangihe, na ginipai rengbe ani ka gumbaha tipa gu yangara ruru mbedimbedi aKristano du ti gi yangara regbo re?

¹⁶ Yesu afura fu agu abawiriki nadu 11 na ko rogo gu vurubambu nadu kuari yo re ki ya: ‘Agu abe bakakue du ti re dunduko azukanga ya, ko adehe ade kusayo. Ono agu abe bakakue dunduko nazuka, ko agirisaha agirisa si zuku susi gu nidu mbata. Oni zi tironi kuti re, mi ki zi tire kuti roni a. Ka be bakakue zunga nitihe te, kinagu ka si nye kuti katakpa bakakue; wo du oni, kinagu ka oni zi tironi kuti re.’ (Yoane 15:2, 4) Gu vovo pangbanga du tipa ga Yekova aboro nayugo gupai nga yangara ruru mbedimbedi aKristano azi tiyo kuti Baira yo nga Kristo Yesu. (AEfeso 5:23) I aima ida gupai nga i girisi yo ki kafu agu abeyo kusayo duni uguhe. (Maraki 3:2, 3) Natona rogo gu garã nangia 1919, i akusi zuzu Kindo kpaima, gu zuzu kindo nadu mbata nga, gu mbedimbedi aKristano i adungura yo, fuo gure, natona rogo gu garã nangia 1935, i kini tona dungura agu abadiangbayo nga “bakere rimbasa aboro” nga aguyo bangeyo akio kina kumbatayo.—Yugoti 7:9; Yesaya 60:4, 8-11.

17, 18. (a) Gini afugo Yesu naundo mbedimbedi aKristano na kura avusende i nye rogo ga Yekova nyemuse? (b) Waigu agu apai ani ka giaha pati Tingidapa Kpio Yesu nika undo rani?

¹⁷ Gu kura ga Yesu afugo naye re, si fu mbedimbedi aKristano na fu abadiangbayo a nga agu afugo nayaa: “Ka oni azuka gbe, si ka Buba du ti ni ni taasitaasi ko; si ka oni du tini a ni gimi abawiriki. Wa Buba nakpi nyemu re, mi nakpi nyemu roni a; oni nyé rogo gi nyemuse. Ka oni ka kuti gi rugute, oni nye anye rogo gi nyemuse; wa ka mi kuti ga Buba rugute, ki nye rogo gako nyemuse.”—Yoane 15:8-10.

¹⁸ Ani dunduko duna nyemu ka nye rogo ga Mbori nyemuse, na gere nafõngbaduraniyo ani duni agu aKristano nazuka. Ani namanga gipai re ni tungusa ani “wene pangbanga nga ga [kindo]” ti agu aregbo dunduko ka mamu kuru. (Matayo 24:14) Ani na’asada tirani a nyanyakii ka yugo “zuzu Toro” rogo gaani raka. (AGaratio 5:22, 23) Agu apai ani ka giaha pati Tingidapa Kpio Yesu nika ngarasa rani rogo gaani diaberã ka manga gipai re, mbiko i nika tingida rani yo na pa ga Mbori bakere nyemuse na pa ga Kristo nyemuse tipa rani.—2 AKorindo 5:14, 15.

19. Gini kura undo ani ka wisigopai tipaha rogo gu paparaha naye fuo gere?

¹⁹ Fuo Yesu sigira Tingidapa Kpioko, ko akidohe ya Bako akeda “Mounda, [akeda] nga Ziazia Toro” fu apefuo ko. (Yoane 14:26) Rogo gu paparaha naye fuo gere, ani nika wisigo wai gi toro re aundo mbedimbedi aKristano na wai si aundo kura avusende i nye rogo ga Yekova nyemuse.

[Gu rukutu kekeapai du bandu kpewaraga yo]

Fugöpai

• Tipa ndusunge fu akurase rogo nyemuse, gini wenepai Yesu ayuguhe fu gako abawiriki?

• Nibipa ginipai du regbo Tingidapa Kpio Yesu tini ni wene regbo boro wisigi ti ni rogo agu apai nga ga toro?

• Tipagine si aidanga tini ani mbu rengo mbiko agu afugo Yesu du tipa sogote aboro rani watadu rungosi yo rani ya?

• Da nga “ndikidi bakakue”? Ada nga ‘abehe’ na gine Mbori aidaha beyo?

[Gu kpiahe du ti kpewaraga 23]

Yesu ayugupai fu gako abawiriki tipa manga yo sunge fu akurayo rogo nyemuse nga gu ka bangirise agonga tini ya

[Gu kpiahe du ti kpewaraga 24]

Ga Kristo abawiriki nairisa gako rugute ka yugo gu nyemuse nasa yo i mbupa gayo apai