“Agu Apai Du Na Tandu Nga Ga Mbori” Nafõngbaduraniyo Sa Sunge
‘Ani nagia fugoyo i nigumba agu apai duna tandu nga ga Mbori rogo afugo rani yo.’—AMOKEDI 2:11.
1, 2. Gini iiriwopai namangi Yerusarema yo ti regbo Pendekote rogo gu garã nangia 33 ti Gaani Regbo?
ROGO kura uru sa wiso ti tonatona kito rogo gu garã nangia 33 ti Gaani Regbo, iiriwopai amangi fu badona akumba na adee, nangia ga Yesu Kristo abawiriki nga aguyo nadungura tiyo kurogo kporo sa Yerusarema yo. ‘I agi woro he si niwo ariyo wa ka kina bakere yuge aya ariyo, si ki du adu vuru gu bambu yo dunduko i asungu ni. I ki bi mirãhe si nikparaka wa kina mirã we. I ki hiki ahika be Ziazia Toro dunduko, i ki tona ka fura ni kura ngbatunga afugo.’—Amokedi 2:2-4, 15.
2 Bakere rimbasa aboro adungura tiyo ku barabangiri gu bambu agu abawiriki adu tiihe re. Agu aYuda i abatika yo rogo kura aringara aduku dagba agi aboro re, nangia “ruru aboro” naye ku Yerusarema yo tipa pumbo Pendekote. Ngba agi aboro re azere mbiko i nibasasa aagia agi abawiriki re i nifura rogo afugoyo tipa “agu apai du na tandu nga ga Mbori.” Wai gupai re arengbe ka manga wa agu aboro dunduko naafura re angia aboro Gariraya?—Amokedi 2:5-8, 11.
3. Gini pangbanga gu mokedi nangia Petero agumbaha fu gu rimbasa aboro nadu pati pumbo Pendekote?
3 Guni sa dagba agu aboro Gariraya re angia gu mokedi nangia Petero. Ko asakirogo gipai namangi re ya mbata fu kina bete aposo gbua kusayo, iraira akumba aimi Yesu Kristo. Ono wa si avura du wo, Mbori azingisi Wiriko dagba gu kpikpiyo. Ngbutuko fuo gure, Yesu akuru fu dungu gako abawiriki, kodihe na Petero na gu kurayo naduho ti gu regbo re. Arame bawe mbata kusayo, Yesu adakpa ku ngbangbaturũ yo. Ko nga gu boro nauka ziazia toro kurii gako abawiriki. Ya mo gipai re adu na rogoyo tini fu agu aboro naye tipa pumbo Pendekote re? Ii, nirengo. Pa kpio Yesu amoi mburupai tipa i rengbe ka mbupai fuyo ti gayo aingapai na i ki rengbe ka dia “gu ũgume nga Ziazia Toro” ka i duna idapase kuti ko. (Amokedi 2:22-24, 32, 33, 38) Sidu, wai agi aboro naagia agi apai re akaragapai sa “agu apai du na tandu nga ga Mbori” re? Na wai rengbe gi pangbanga re ka undo rani ani ini ngbanya gaani sunge fu Yekova?
Pai Afõngbaduyo Yo I ki Guari sa Sunge!
4. Gini sangba gu nebi nangia Yoere nadu nidigisidigisihe rago Pendekote rogo 33 ti Gaani Regbo?
4 Fuo dia agu abawiriki nadu Yerusarema yo ziazia toro, i aguari nibasa ka gbaraga gu wene pangbanga nga ga bata fu kura aboro, kini tonaha na kina gu rimbasa aboro nadungura tiyo rogo gu wiso nangia ga Pendekote re. Gayo tungusapai angia digisidigisi iiriwo sangbanebi, nga gu gu nebi nangia Yoere wiri Petuere akehe mbata fu muambe kama agarã bakuru kusayo niyaa: “Mi aúka torore ku ri aboro dunduko; awironi nga akumba na agu awironi nga ade i ki nigumba pai, gaoni gbinza aboro ki nirari amusumo, gaoni aparanga ki nibi yuguyuguapai. Mi aúka torore a wo ni gu arago re, ku ri akanga nga akumba na ku ri agu akanga nga ade . . . mbata gu bakere iiriwo rago nga ga Yekova nikada.”—Yoere 1:1; 2:28, 29, 31; Amokedi 2:17, 18, 20.
5. Rogo gini gene agu aKristano nadu rogo bambata kama agarã agumba sangbaanebi? (Oni bi gu rukutu kekepai du kuari ku kumbabee yo.)
5 Ya mo rogo gipai yo re angia wee Mbori nika kusa rikaaboro ni anebi, nga akumba gbiati adee wa gu si adu tipa Davide, Yoere, na Debora, na kini mangisunge na yo tipa i naafura tipa apai kumbatayo? Oó. Si adu nga, ‘agu akumbagude nga aKristano na adegude, na agu amoyambu nga akumba na aguyo nga adee’ nika du ni anebi rogo gu gene nga, ga Yekova toro nika fõngbaduyo yo i takipande “agu apai du na tandu” nga gu Yekova namangihe na gu ko ka mangaha kindi kumbatayo. Sidu, si adu nga i nika mangasunge ni agu aboro nafura kuba guko nga Bahe Kisusi.a Ono tie, ginipai gu rimbasa aboro re amangihe?—AEbere 1:1, 2.
6. Fuo aboro gi gupai Petero agumbaha, gine dungu agu aboro nadu dagba gu rimbasa re adiberã ka mangaha?
6 Fuo rimbasa aboro gi gu sakarogopai yo nangia ga Petero, dunguyo adiberã ki guari ka mangapai. I ‘akakuti gako pai’ na i “ki bapatizi yo; ni gu rago re i ki gedi agu yo na yo i ki du wa ka i du 3000.” (Amokedi 2:41) Ni du yo ni ndikidi aYuda gbiati agu aboro nasa tiyo kurogo gu pambori nga ga aYuda, i aima duna gu bambata inohe nga ga Ziazia Kekeapai. Gu inohe i adu nani re, gbiakuti gu idapase i adu nani mbiko gupai i awirikihe be Petero, angia agu apai nasa yo i zi bapatiza ti rimo “Ba na [ti rimo] Wiri na [ti rimo] Ziazia Toro.” (Matayo 28:19) Fuo zio yo bapatiza, “i . . . anye rogo ga amokedi yugopai yo.” Ti kina gu bangisa regbo re, i atona kaa pepa gayo vovo idapase fu kura aboro. Nirengo, i “adu kina ku bani [sa] yekaru yo . . . nitambua Mbori, aboro ki ningba angba na yo dunduko.” Ni sangbana gi sunge dezirepai re, “Gbia ki nifu agu aboro nanabata ku dagba yo yo na [a’uru dunduko].” (Amokedi 2:42, 46, 47) I asigira agu adungurati nga ga aKristano rogo dungu agu aringara gi vovo aidipase re anaraka rogoho. Zanga kapa, gi kio bange abawiriki re adu wo mbiko gu bakere asadatise zaaza nangia ga gi vovo abawiriki re rogo tungusa “wene pangbanga” ho i akaraga tiyo ni ku ringara kpuyo yo.—AKorosaio 1:23.
Fugo Mbori na Ome Tini
7. (a) Gine naye na aboro dagba rikaaboro dunduko kurogo ga Yekova riigbu areme? (b) Ginipai duho nayugo gupai nga, bange abawiriki rogo zegino dunduko na rogo gaoni dagbarago nika sona asona? (Oni bi gu rukutu kekepai du ti kpewaraga 29 barii asanahe.)
7 Ginipai tipa agu aboro naida ka duni ga Mbori amoyambu areme? Si naida i wisigi Fugo Mbori a wenengai. Wa i amangaha, i naye ka ino Yekova ni gu Mbori “du adu na nunga aboro na undahe ti ko, du ni bayee ko tipa zinga, ki du na inapai kpaima na rengo.” (Gate 34:6; Amokedi 13:48) I nawirikapa gu ga Yekova mbakadapai ni weneringise nga ga tumorii aboro rogo Yesu Kristo yo, nga guko rengbe gu kureko nauka ka giriso yo be aingapai dunduko. (1 Yoane 1:7) I a na tambuahe tipa ga Mbori ringbisapai ‘ka zingisa ruru aboro bekpio na iraira yo a.’ (Amokedi 24:15) Nyemu gi boro nga Baenge “agu apai du na tandu” re nakio ngbaduyo yo na kini sa yo i tungusi gi kikiipa rengo re fu kura aboro. Fuo gure, i nada ni agu amoyambu nga ga Mbori yo naima kpara tiyo fuko na ki zi bapatiza na kini ndu kumbatayo ‘kini sono rogo ruru ino pa Mbori.’b—AKorosaio 1:10b; 2 AKorindo 5:14.
8-10. (a) Wai gu pangbanga namangi tipa dee sa ayugo gupai nga, Fugo Mbori “na tandu” tini? (b) Gine gi pangbanga re ayugoho foro tipa Yekova na gako mangaapai na gako amoyambu? (Gate 4:12)
8 Gu inohe ga Mbori amoyambu agbiaha be gayo wisigo Ziazia Kekeapai ni ngbarangbaraha te. Ngbatunga gu inohe re nafõngbaduyo yo, kini aria gu gene i aberã rogoho, na kini sa tihe ni papara gayo berã. (AEbere 4:12) Ni kpiapai, i adi dee tipa sunge du rimori nga Camille ri naangera fuo sosono aboro rogo gu kporo du tipa yo. Dee sa dagba aguyo ri angera fuo yo rimori angia Martha, kingia guni sa dagba aDezire Yekova. Wa si adu nga, Martha aarungo gbegberee be gu kaza nasa ri wa kina gu boro nga toyu, si aidi i naangera fuo ri zanga piriga. Si aidi i naatingida ri na pa riahe ri rihe, na zavura ka tingida ri na pa mbira gu riahe du ngbariyo. Wa apai avura du tipa Martha were, pai aduho sa naima sigira tihe ku berãri yo, a wa ani ka bihe.
9 Rogo kura uru sa, Martha abi Camille ri nikpari be gupai naafuda ri berã ri yo. Martha adungo Camille na ki sana ri tipa ka wisigo Ziazia Kekeapai na ri. Ono, wa apai adu tipa Martha wa gere, ya mo ri arengbe ka wisigo Ziazia Kekeapai na boro? Ii, ri arengbe arengba! Wa si avura du nga Martha arengbanga berewe ka tingida gu dungu apai ri ainihe mbata te, bangiiri agonga ti gari bakerepa Mbori duna tandu te; na bangiiri agonga a ti gu kikiipa arengo ri awirikihe rogo Ziazia Kekeapai te. Ti regbo gayo wisigopai, Martha anaya fu Camille wee ri naageda agenewaraga, kini zara agu averesi ka gedaha ke yo kina paha gbua, kini gedi agu asanahe du tii mburu kpewaraga yo, na fuo gure, ki karagapai sani. I amangi gipai re tipa bete regbo, na wa Martha avuranga kaa yugopai ni bakerehe ya, Camille asono rogo gari inohe nga ga Ziazia Kekeapai. Martha akparia gupai nga, si naida Camille naakoda tiri na gu kura aboro duna nyemu mangasunge tiyo fu Mbori. Wa ri aaberã gipai re, si asari ri fu rokoo-adee gbiati rakata fu Camille tipa wa ka ri vo tiri nani wenengai ho ri ka ndu ni tipa gari bambata dunguratise ku tii Bambu Kindo yo.
10 Rago angba ti Camille na gu nyemuse gbiati gu kpiapai Martha ayuguhe furi kodihe na gu nyanyaki ida ri adu nani. Ri adigisihe kuti gupai nga, gupai Martha aa’sada tiri ka yugoho furi rogo Ziazia Kekeapai re angia nyanyakipa pai, mbiko bangiri Martha aima go ti apai dunduko ono ka bangiiri agonga ti gu rengo nga ga Ziazia Kekeapai ri awirikihe beri re ya. Kusa, ho i akedi Camille ni tipa sunge kurogo kura ba, ri abi gupai nga si naida ri mangipai. Ho bambata mamu adani furi tipa ri ndu ku tii Bambu Kindo yo, ri andu nibasa kini vo gu rokoo gbiati gu rakata Martha afuhe furi, na ki sanahe yo tipa boro wisigi Ziazia Kekeapai na ri. Camille asono wenengai rogo gari wirikapai na ki zi bapatiza.
Si Afõngbaduyo Yo I Berẽ Kurii ga Yekova ANdiko
11. Ku pati du zaaza rogo sunge tungusapai, wai rengbe ani ka yugo gupai nga, gu pangbanga nga ga Kindo ima fõngbaduraniyo?
11 Areme, bange aDezire nga ga Yekova yo susi amirioni sita nga aguyo du wa Martha na wa Camille awere, natungusa ‘wene pangbanga nga ga Kindo’ rogo zegino dunduko. (Matayo 24:14; 28:19, 20) Wa kina agu aKristano nadu rogo bambata kama agarã, “agu apai du na tandu nga ga Mbori” nafõngbaduyo yo sa sunge. I na tambuahe mbiko gu irisa du beyo ni agu aboro i ayamba yo ti rimo Yekova na mbiko gu ziazia toro ko naukaha kuriyo. Ni sangbana gipai re, i namanga bakere asadatise ka ta “rogo gu gene rẽ arẽ na gupai Yekova akpinyemuhe tipa ka sa ngbarago tiko wenengai,” kini mangi gako andiko rogo agu apai dunduko du rogo gayo raka. Dagba agu akuraha, si nakoda gu sino vorokoo sigira Mbori he ni kpiapai fu aboro gbiati sino mbakadarii.—AKorosaio 1:10a; Tito 2:10.
12. Gini kparakpara rugute tipa vorokoo gbiati mbakadarii ani abihe rogo 1 Timoteo 2:9, 10?
12 Ii, Yekova ima sigira agu arugute duni kpiapai fu rani nibipa wai si aida bangera rani du. Gu mokedi nangia Pauro ayugu bete agu apai Mbori akpinyemuhe rogo gipai re niyaa: “[Mi nakpinyemu] ade ka ukadi tiyo na gu roko adu nga na enda ti ni ya, nizogo tiyo na zera; ni kãikãi mangeriyo, na dahabu, na ambia fongo na gu roko kii genoho te; ono rogo wene mangapai wa ngba ha fu agu ade idi pa sinombori.”c Ginipai ani awirikaha rogo agi afugo re?—1 Timoteo 2:9, 10.
13. (a) Ginipai i aberãha na gu fugo nga, “gu roko adu nga na enda ti ni ya”? (b) Tipagine rengbe ani ka ya tini ngba ga Yekova arugute angba?
13 Afugo Pauro nayugo gupai nga, si naida aKristano “ukadi tiyo na gu roko adu nga na enda ti ni ya.” Si aidanga i du wosokowosoko, ni bibiriko yo, na ka du nzepenzepe bangiri aboro te. Si mbedi ka du nzunzu nga, aboro dunduko rengbe gayo arokoo arengba ka du gigirii, bibi yo ki ngba angba bangiri aboro, zavura aguyo duna kina bete mosoro beyo vurũ. Ni kpiapai, rogo agarã nibasasa, aDezire rogo ringara sa du Amerika yo ku Sudiyo naandu rogo bire ni nduyo tipa dungu akirometere na fuo gure ki ndu gbanga nunguro rogo rukutu akurungba tipa ka du pati gayo bakere dunguratise nga ga a’uru biata. Dedede, wo i naatiwa bangiri adi ki be tiyo na fuka na angua kini sipi gayo arokoo ti regbo gayo nunguro. Sidu, ho i ada ni rogo gu ba i ka manga bakere dunguratise rogoho, bibi yo naangbanga angba gbe te. Fuo si du were, i naadia regbo ka rungo agu azirari nakafu, ka mbakada agu asusta nagbere na ka rungo gu bangiri arokoo nasipi, fuo gure, i ki zunduhe na ki kpewe tini tipa ka voho ti regbo bakere dunguratise. I nabi gu yambahe yambu yo yo nani tipa i ngba be riahe rii ga Yekova mbisa ni nyanyakipa pai, sidu i kini kpinyemu ka vo gu rokoo rẽ na gipai re.
14. (a) Ho ya yo ni ani vodi tirani ‘na iriiri arokoo na ki duna ruru berã,’ rogoyo nga gine? (b) Ginipai si aidaha berani tipa vorokoo ‘wa agu aboro nayaa i nga airisimbori’?
14 Kurii gure, Pauro aya si naida ani vodi tirani ‘na iriiri arokoo na ki duna ruru berã.’ Gere nayugo gupai nga, si aidanga ani vo arokoo kaa enda nani te, ani zanga vo agu arokoo angbanga bibihe ti aboro ya, agu rokoo nazingisa nyemu kodaba ti aboro, agu arokoo adadanga gu papara kpoto boro si aida si dadihe adada ya, na gu vovo sangisangi rungurungu arokoo nga ga enda. Kurii gure, si naida ani vodi tirani rogo gu gene nafu ‘irisa fu Mbori.’ Gupai re nasa rani ani naaberã, anga wo tee? Anga gupai si aidaha berani nga ani vodi tirani wenengai ho du ani ni pati agu adunguratise nga ga dungurati ono ki he mangaha ti agu aregbo adunga ani pati dunguratise ya te. Si naida bangera rani dedede yugu gupai nga, ani na iriiri berã tirani, mbiko ani ni aKristano rogo a’uru dunduko pitipiti na sasasa. Si ziazia nga, gu rokoo ani avoho tipa sunge na gu nga roko sukuru, si naida si rẽ arẽ na ngbatunga gu sunge ani amangaha. Wa vura duhe wo, si naida gupai kindi nga ani vodi iriiri arokoo ti aregbo dunduko. Ka gaani arokoo ayugo gaani aida dedede kuti Mbori, zee manginga rani ti manga dezirepai zanga sogimaha mbiko ngbanga bibi rani bangiri aboro te te.—1 Petero 3:15.
‘Ka Oni Kpinga Nyemu Zegino Ya’
15, 16. (a) Tipagine duhe tini ni nyanyakipa pai ka ani wirikinga zegino rogo vorokoo na mbakadarii ya? (1 Yoane 5:19) (b) Gini wene ndupai si aida tini ani ne gu sino vorokoo na mbakadarii aboro ata mangaha kini mbuhe kini gbisi fuo gu?
15 Gu rugute ke yo ho rogo 1 Yoane 2:15, 16 naundo rani a ani sia gu rokoo ngbaa na gu sino mbakadarii ngbaa. Ani nagedaha yo were: “Ka nyemu zegino du nga ti roni ya, na agu ahe du zegino. Ka nyemu zegino du ti boro, ga Mbori nga Ba nyemuse du nga ti ni te. [Mbiko] agu ahe dunduko du zegino, gu nyemuhe nga ga borose, na gu nyemuhe nga ga bangirise, na gu ũmosangi enda nga ga unga, adu nga ni ga Mbori nga Ba ya, du ni kina ga zegino.”
16 Nangbaa gupai nga, gu rugute re ye ti kina boro regboho! Rogo gi gaani regbo aboro nagasi be sosoda akurayo sa apai rogoho re, si aidanga ani mbu zegino si yugu gu rungurungu rokoo fu rani si aida ani naavoho te; na si aidanga a ani duni akanga fu gupai kura aboro amangaha te. Rogo agi a’uru nga gu susi re, ga aboro sino vorokoo na gayo sino mbakadarii ima gbera. Zavura gu sino vorokoo nga ga iriiripa abamangisunge, si dedede ni wene kpiapai tipa aKristano te. Gere nga kura ndupai si aida tini ani du dedede na rubangirise ka ne ‘mera fuo manga agu apai nga ga gi zegino re’ ka ani aida ka raka ringbisihe kuti ga Mbori andiko na were kini “fongo gu yugopai nga ga Mbori Batasirani ti apai dunduko.”—ARomo 12:2; Tito 2:10.
17. (a) Gini asanahe si aida ani wisigihe ho ani aida ka ngbe rokoo ni watadu ka sia gu kura rungurungu rokoo ngbaa tirani? (b) Tipagine si aida abairakporo du tini na nyemu ka bi gayo aborokporo i nivodi tiyo wenengai?
17 Mbata fu oni diberã singia si naida oni ngbe rokoo, si ni pa tatamana oni sana tironi ki ya: ‘Tipagine ngbaa ngbatunga gi rungurungu rokoo re tini tire? Si nga gu rungurungu rokoo bangbasia bangimbori naavoho, ni gu boro ngba bibi ni bangire? Agu abandii nga ga bangiri gene yo watadu gu rimbasa aboro duna gu toro nga ga samungu ka raka ngbariyo i du ngbaa voda gi rungurungu arokoo re tiyo?’ Si naida ani kparia gu rokoo re a wenengai. Ka singia si nga rokoo-adee watadu agbaya du, bagizoho gu daada? Gini sino rungurungu rokoo ngaha? Si ni rokoo zee, ki daada tipa boro voho angianga ni mbutio ho ya, ni iriiri rokoo, watadu si nagbida boro agbida, si nazingisa nyemu kodaba ti kura aboro, watadu si ni babakerehe kisusi? Oni sananga tironi ki ya, ‘Pa vo mi gi rokoo re asa kura aboro i koto?’ (2 AKorindo 6:3, 4) Tipagine si aida ani bakibangirani tini ti gipai re? Mbiko Ziazia Kekeapai nayaa: “Bambiko Kristo . . . amanga nga gu pai [na]ngba ti kina ko te.” (ARomo 15:3) Si naida agu abairakporo nga aKristano duna nyemu ka bi gayo aborokporo i nivodi tiyo wenengai. Tipa i fu irisa fu gu taasitaasipa Mbori i airiso ko, si aidanga abairakporo du adu dindikodindiko ka fu nyanyaki rugute nga ga nyemuse fu gayo aborokporo ho si aidaha ni te.—Yakoba 3:13.
18. Gine nasa roni oni moi berã roni fuo gu rokoo oni avoho na wai oni ambakada rironi?
18 Gu pangbanga du berani ani andu nani fu kura aboro naenga be Yekova, nga gu boro duna bakere kiki ni tini na du ziazia. (Yesaya 6:3) Ziazia Kekeapai nazungodi rani ani wiriki ko “ni awiri manguse.” (AEfeso 5:1) Gaani sino vorokoo gbiati sino mbakadarii rengbe ka taasarimo gu Barani nga ga ngbangbaturũ ko watadu ka gbarasaha. Ono tie, gupai ani aida nirengo ka mangaha nga ka fu ngbarago fuko!—Asanza 27:11.
19. Gini undo naye fu rani tipa taka ani pande “agu apai du na tandu nga ga Mbori” fu kura aboro?
19 Ginipai oni aberãha tipa “agu apai du na tandu nga ga Mbori” nga gu wiriki oni he? Nairiwo gu mamu nirengo du ani nani nga ani ima ino rengo! Mbiko wa du ani na idapase kuti gu kure Yesu Kristo nauka, si du i ambupai tini fu rani ti gaani aingapai. (Amokedi 2:38) Ni sangbana gipai re, ani barabangiri Mbori na ranirii ka fura. Ani agundenga be kpio wa agu aboro adunga na maabangirise ya te. Kuba gure, ani nakido kuti gupai Yesu agumbaha yaa “ragoho nada, ho agu yo ka gia fugoko ni dunduko du rogo amurã yo, ki kuru.” (Yoane 5:28, 29) Yekova ayugu agi apai fu rani dunduko re ni weneringise. Kurii gure, ko ima uka gako toro kurii rani. Sidu tie, si naida gu tambuahe du ani nani fuko tipa agi agamahe re fõngbaduraniyo ani duna irisa tipa gako bawene kikiipa andiko na kini taasi rimoko zaaza, kini takipande “agu apai du na tandu nga ga Mbori” fu kura aboro.
[Gu rukutu kekeapai du bandu kpewaraga yo]
a Ho Yekova asia aMose na Arona ni i ndu ka fura fu Faro kuba gako aboro, Ko ayaa fu Mose wee: “Mo bi, mi sa ro wa Mbori fu Faro. Arona nga unvuruamo nikangia ga nebi.” (Gate 7:1, gu kekepai duni pigipigihe re, ani du pigihe.) Arona aamangasunge wa nebi, angianga tipa ka fura tipa apai kumbatayo ya, ono ka fura kuba Mose, watadu ka pe fugo Mose fu kura boro.
b Dungu aboro gu du kinaho dagba gu bakere rimbasa aboro naye ku pati Ga Gbia Riahe nga ga Nyemu nga gu i amangihe rogo Marungu ti rameru 28, rogo 2002 nga agu aboro ata tonanga ka mangasunge zaaza fu Yekova ya. Si nga gupai ani akparakpee fu Mbori tipaha ya ngbadu agi aboro yo duna nyemu rengo tiyo re fõnga yo niipo i gbata gene ka rẽ tipa gu mamu nga ga tungusa wene pangbanga.
c Wa si avura du nga, Pauro aagumba gi gako afugo re fu agu adee nangia aKristano, kina gu bangisa arugute re du tipa agu aKristano nga akumba na paranga aboro a.
Gaoni Karagapai Nga Gine?
• Gine nga “agu apai du na tandu” aboro agipai tipaha ti regbo Pendekote rogo 33 ti Gaani Regbo, na gayo karagapai sani angia gine?
• Wai boro adani ga Yesu Kristo bawiriki, na gu sunge nga ga abawiriki nakoda gine?
• Tipagine duhe tini ni nyanyakipa pai ani moi berã rani fuo agu arokoo ani avoho na wai ani ambakada rirani?
• Gini apai si aida boro wisigihe ho ni adiaberã ni ka ngbe rokoo?
[Gu kpiahe du ti kpewaraga 29]
Petero atakipande gupai nga, i azingisi Yesu dagba gu kpikpiyo
[Gu kpiahe du ti kpewaraga 31]
Gaoni sino vorokoo gbiati bibi roni nafu irisa fu gu Mbori oni airiso ko?
[Gu kpiahe du ti kpewaraga 32]
Agu aKristano nga avunguagude si naida i bi gupai nga, bibi gayo aborokporo gu ngba angba bangiri aboro